മിഡ്-സൈസ് എസ്‌യുവി സെഗ്മെന്റ് ഇളക്കി മറിക്കുമെന്നുറപ്പ്, Toyota Urban Cruiser Hyryder റിവ്യൂ വിശേഷങ്ങൾ

പല പല വെറൈറ്റികളുമായി സ്കോഡ കുഷാഖ്, ഫോക്‌സ്‌വാഗൺ ടൈഗൂൺ, നിസാൻ കിക്‌സ് എന്നിവരെല്ലാം ഈ ശ്രേണിയിലുണ്ടെങ്കിലും ഹ്യുണ്ടായി ക്രെറ്റയെ വെല്ലുവിളിക്കാനുള്ള ആവതൊന്നും ഇവർക്കില്ലായിരുന്നു. ഈ സെഗ്മെന്റിൽ ഇറങ്ങാതെ പ്രമുഖരായ ടൊയോട്ടയും മാരുതി സുസുക്കിയും ഗ്യാലറിയിൽ ഇരുന്നു ഇതുവരെ കളികാണുകയായിരുന്നു.

എന്നാൽ അർബൻ ക്രൂയിസർ ഹൈറൈഡർ എന്ന വജ്രായുധവുമായി കളിക്കളത്തിലേക്ക് ഇറങ്ങുകയാണ് ടൊയോട്ട. ദക്ഷിണ കൊറിയൻ ബ്രാൻഡുകളുടെ ചീട്ടുകീറാൻ ഹൈറൈഡർ എത്തുമ്പോൾ എന്തെല്ലാമാണ് വാഹന ലോകം ഉറ്റുനോക്കുന്നതറിയാൻ ടൊയോട്ട മിഡ്-സൈസ് എസ്‌യുവിയുടെ ടെസ്റ്റ് റൈഡ് റിവ്യുവിലേക്ക് നമുക്ക് ഒന്നു കടന്നാലോ?

എക്സ്റ്റീരിയർ ഡിസൈൻ

രൂപകൽപ്പനയുടെ കാര്യത്തിൽ ഒരു വിട്ടുവീഴ്ച്ചയുമില്ലാതെയാണ് പുതിയ അർബൻ ക്രൂയിസർ ഹൈറൈഡറിന്റെ ടൊയോട്ട ഒരുക്കിയെടുത്തിരിക്കുന്നത്. ബോഡിയിലുടനീളം ഷാർപ്പ് ലൈനുകൾ ഉപയോഗിച്ചിരിക്കുന്നത് എസ്‌യുവിക്ക് തികച്ചും സ്പോർട്ടി രൂപം നൽകാൻ സഹായകരമായിട്ടുണ്ട്.

മുൻഭാഗത്തേക്ക് നോക്കിയാൽ ഇന്നത്തെ എസ്‌യുവികളിൽ ഏറെ പ്രചാരം നേടിയ ഹെഡ്‌ലാമ്പ് സ്‌പ്ലിറ്റ് രൂപത്തിലേക്ക് ഹൈറൈഡർ എത്തിയിരിക്കുന്നതായി കാണാം. അതിനു മുകളിലായി ട്വിൻ എൽഇഡി ഡേടൈം റണ്ണിംഗ് ലൈറ്റുകൾ ഇടംപിടിച്ചിരിക്കുന്നതും മനോഹരമാണ്. അവ ക്രിസ്റ്റൽ അക്രിലിക് അപ്പർ ഗ്രിൽ ഘടകത്തിലൂടെ പ്രവർത്തിക്കുന്ന ക്രോം സ്ട്രിപ്പുകൾ ഉപയോഗിച്ച് മധ്യഭാഗത്തുള്ള ടൊയോട്ട ബാഡ്ജുമായി ബന്ധിപ്പിച്ചിരിക്കുകയാണ് ചെയ്‌തിരിക്കുന്നത്.

സ്കൾപ്പഡ് ശൈലിയുള്ള ഫ്രണ്ട് ബമ്പറിന് താഴെ ക്രോമിയത്താൽ ചുറ്റപ്പെട്ട ട്രപസോയ്ഡൽ ലോവർ ഗ്രില്ലാണ്. ഒരു യഥാർത്ഥ എയറോഡൈനാമിക് മൂലകത്തേക്കാൾ കൂടുതൽ സ്റ്റൈലിംഗ് കാര്യമായി തോന്നുമെങ്കിലും ഈ ഗ്രില്ലിന് കീഴിൽ ഒരു സ്പ്ലിറ്റർ എലമെന്റാണ് ഇത് ചേർക്കുന്നത്.

ഹൈറൈഡറിന്റെ വശങ്ങളിലേക്ക് നോക്കിയാൽ ക്രീസുകളും ബൾജുകളുമാണ് കാണാനാവുക. പ്ലാസ്റ്റിക് കൊണ്ട് നിർമിച്ച ചുറ്റുപാടുകളോട് കൂടിയ ചങ്കി വീൽ ആർച്ചുകൾ ഹൈറൈഡറിന്റെ സവിശേഷതയാണ്. വലിപ്പം തീരെ ചെറുതായി തോന്നുന്ന 17 ഇഞ്ച് അലോയ് വീലുകൾക്ക് ഈ വീലർച്ചുകൾ ആതിഥേയത്വം വഹിക്കുന്നു.

വശങ്ങളിലെ മറ്റ് ഡിസൈൻ ഘടകങ്ങളിൽ കറുപ്പിൽ ഒരുക്കിയിരിക്കുന്ന ORVM-കൾ, വിൻഡോകളിൽ അൽപ്പം ക്രോം, D-പില്ലറിന് ഡ്യുവൽ-ടോൺ ലുക്ക് നൽകുന്ന ഫ്ലോട്ടിംഗ് റൂഫ് ഡിസൈൻ എന്നിവ ഉൾപ്പെടുന്നു.

പിൻഭാഗത്ത് ടൊയോട്ട ബാഡ്ജ് ഉൾപ്പെടുന്ന ഒരു ബാർ ക്രോം ബന്ധിപ്പിച്ച സുഗമമായ എൽഇഡി ബ്രേക്ക് ലൈറ്റുകളുള്ള ഹൈറൈഡർ പതിവുപോലെ എല്ലാ ടൊയോട്ട കാറുകളെയും പോലെ തന്നെ മനോഹരമായിട്ടുണ്ട്. ടേൺ ഇൻഡിക്കേറ്ററുകളും റിവേഴ്‌സിംഗ് ലൈറ്റുകളും എസ്‌യുവിയുടെ ശിൽപ്പമുള്ള ടെയിൽ വിഭാഗത്തിന്റെ ഇരുവശത്തും ലംബമായി അടുക്കിയിരിക്കുന്ന യൂണിറ്റുകളായാണ് സ്ഥാപിച്ചിരിക്കുന്നത്.

മൂന്നാമത്തെ ബ്രേക്ക് ലൈറ്റിന് ആതിഥേയത്വം വഹിക്കുന്ന ഒരു സംയോജിത റൂഫ് സ്‌പോയിലറും ഒരു ഫാക്‌സ് സ്‌കിഡ് പ്ലേറ്റും എസ്‌യുവിയുടെ പിന്നിലെ മറ്റ് സവിശേഷതകളിൽ ഉൾപ്പെടുന്നു.

ഇനി ഇന്റീരിയർ

ടൊയോട്ടയുടെ എസ്‌യുവിയിൽ പലരേയും കൂടുതൽ ആകർഷിച്ചേക്കാവുന്ന ഘടകം അതിന്റെ അകത്തളമായിരിക്കുമെന്നാണ് വിലയിരുത്തൽ. ധാരാളം സവിശേഷതകളാൽ സമ്പന്നമായ ഇന്റീരിയർ തികച്ചും പ്രീമിയം ഫീൽ നൽകുന്നുണ്ടെന്ന് പറയാതെ വയ്യ. ഹൈറൈഡറിന്റെ ഇന്റീരിയർ ഡ്യുവൽ-ടോൺ ബ്ലാക്ക് ആൻഡ് ബ്രൗൺ നിറച്ചിസാണ് പൂർത്തിയാക്കിയിരിക്കുന്നത്.

എസ്‌യുവിക്ക് വളരെ പ്രീമിയം ഫീൽ നൽകാൻ എല്ലായിടത്തും സോഫ്റ്റ് ടച്ച് മെറ്റീരിയലുകളാണ് കമ്പനി ഉപയോഗിച്ചിരിക്കുന്നത്. വലിയ പനോരമിക് സൺറൂഫുള്ള ക്യാബിൻ വളരെ വിശാലവും വായുസഞ്ചാരമുള്ളതുമാക്കുന്നു. എന്നിരുന്നാലും ഹാർഡ് പ്ലാസ്റ്റിക് വിഭാഗങ്ങൾ കണ്ടെത്തുന്നത് അത്ര ബുദ്ധിമുട്ടുള്ള കാര്യമല്ല. മാത്രമല്ല അത് ഒരു വലിയ നിരാശയും അനുഭവപ്പെടുത്തിയേക്കാം.

മൾട്ടി-ലേയേർഡ് ഡാഷ്‌ബോർഡ് വലതുവശത്ത് ഒരു ഡിജിറ്റൽ ഡ്രൈവർ ഡിസ്‌പ്ലേയ്ക്കും എസ്‌യുവിയുടെ സെൻട്രൽ വിഭാഗത്തിൽ ആധിപത്യം പുലർത്തുന്ന മധ്യഭാഗത്ത് 9 ഇഞ്ച് ടച്ച്‌സ്‌ക്രീൻ യൂണിറ്റിനുമായി ഒഴിച്ചിട്ടിരിക്കുകയാണ്. ആൻഡ്രോയിഡ് ഓട്ടോ, ആപ്പിൾ കാർപ്ലേ എന്നിവയ്‌ക്കുള്ള പിന്തുണയും ടൊയോട്ട ഹൈറൈഡർ ഫീച്ചർ ചെയ്യുന്നുണ്ട്.

കൂടാതെ ആൻഡ്രോയിഡ്, iOS എന്നിവയിൽ നിന്നുള്ള വോയ്‌സ് അസിസ്റ്റന്റുകളിൽ നിന്ന് കമാൻഡുകൾ സ്വീകരിക്കാനും ഇതിന് കഴിയും. 360-ഡിഗ്രി ക്യാമറയുടെ ഔട്ട്പുട്ട് സ്ക്രീനായും ഡിസ്പ്ലേ പ്രവർത്തിക്കുന്നു.

റിമോട്ട് ഇഗ്നിഷൻ ഓൺ/ഓഫ്, റിമോട്ട് എസി കൺട്രോൾ, ഡോർ ലോക്ക്/അൺലോക്ക്, മോഷ്ടിച്ച വെഹിക്കിൾ ട്രാക്കർ, ഇമോബിലൈസർ എന്നിങ്ങനെ നിരവധി കണക്റ്റഡ് കാർ ഫീച്ചറുകളാണ് ടൊയോട്ട ഹൈറൈഡറിന്റെ സവിശേഷത.

ഫീച്ചർ പായ്ക്ക് ചെയ്ത ഹൈറൈഡറിലെ മറ്റ് ഹൈലൈറ്റുകളിൽ വെന്റിലേറ്റഡ് ഫ്രണ്ട് സീറ്റുകൾ, സ്ലൈഡിംഗ് ഫ്രണ്ട് ആംറെസ്റ്റ്, നിങ്ങൾക്ക് ആവശ്യമെങ്കിൽ കൂടുതൽ സ്റ്റോറേജിനായി 60:40 സ്പ്ലിറ്റുള്ള റിക്ലൈനിംഗ് റിയർ സീറ്റുകൾ ഉൾപ്പെടുന്നു.

തീർന്നില്ല, ഹെഡ്‌സ് അപ്പ് ഡിസ്‌പ്ലേ, പാഡിൽ ഷിഫ്റ്ററുകൾ, വയർലെസ് ചാർജിംഗ് പാഡ്, റിയർ എസി വെന്റുകൾ, യുഎസ്ബി പോർട്ടുകൾ, ആംബിയന്റ് ലൈറ്റിംഗ്, ട്രങ്കിനുള്ള ലൈറ്റ് എന്നിവയും അതിലേറെയും സവിശേഷതകളും വാഹനത്തിലുണ്ട്.

സുരക്ഷയുടെ കാര്യത്തിൽ ടൊയോട്ട അർബൻ ക്രൂയിസർ ഹൈറൈഡറിന് ആറ് എയർബാഗുകൾ, ഇബിഡിയുള്ള എബിഎസ്, വെഹിക്കിൾ സ്റ്റെബിലിറ്റി കൺട്രോൾ, ഹിൽ ഹോൾഡ് കൺട്രോൾ, ഹിൽ ഡിസന്റ് കൺട്രോൾ, ഓൾ വീൽ ഡിസ്‌ക് ബ്രേക്കുകൾ, പിൻ യാത്രക്കാർക്ക് 3-പോയിന്റ് സീറ്റ് ബെൽറ്റുകൾ, ടിപിഎംഎസ് സിസ്റ്റം എന്നിവയും അവതരിപ്പിക്കുന്നുണ്ട്.

എഞ്ചിൻ

ടൊയോട്ട അർബൻ ക്രൂയിസർ ഹൈറൈഡറിന് രണ്ട് എഞ്ചിൻ ഓപ്ഷനുകളാണ് കമ്പനി പരിചയപ്പെടുത്തുന്നത്. മാരുതി സുസുക്കിയിൽ നിന്നുള്ള 1.5 ലിറ്റർ മൈൽഡ് ഹൈബ്രിഡ് സിസ്റ്റമുള്ള പെട്രോൾൾ, ടൊയോട്ടയുടെ സ്വന്തം 1.5 ലിറ്റർ അറ്റ്കിൻസൺ സൈക്കിൾ പെട്രോൾ എഞ്ചിൻ എന്നിവയാണ് അവ രണ്ടും. കാമ്രിയിൽ കാണുന്നതുപോലെ ശരിയായ സെൽഫ് ചാർജിംഗ് ഹൈബ്രിഡ് സിസ്റ്റമാണ് എസ്‌യുവിയുടെ പ്രധാന ഹൈലൈറ്റ് എന്നു വേണം പറയാൻ.

മാരുതിയിൽ നിന്നുള്ള മൈൽഡ്-ഹൈബ്രിഡ് സജ്ജീകരണത്തെ ആ ബ്രാൻഡിന്റെ ആരാധകർക്കും ചെറിയ അർബൻ ക്രൂയിസറിന്റെ ഉടമകൾക്കും നന്നായി അറിയാവുന്ന കാര്യമാണ്. 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ എഞ്ചിൻ ഒരു സംയോജിത സ്റ്റാർട്ടർ ജനറേറ്ററുമായി ജോടിയാക്കിയിരിക്കുന്നത്.

അങ്ങനെ പരമാവധി 102 bhp കരുത്തിൽ 137 Nm torque വരെ നൽകാൻ ഈ എഞ്ചിൻ പ്രാപ്‌തമാക്കിയിരിക്കുകയാണ്. ഈ മൈൽഡ് ഹൈബ്രിഡ് സജ്ജീകരണം 5 സ്പീഡ് മാനുവൽ അല്ലെങ്കിൽ 6 സ്പീഡ് ഓട്ടോമാറ്റിക് ട്രാൻസ്മിഷൻ ഉപയോഗിച്ചാണ് സ്വന്തമാക്കാൻ കഴിയുന്നത്. ഫ്രണ്ട് വീൽ ഡ്രൈവ്, ഫോർ വീൽ ഡ്രൈവ് എന്നീ വ്യത്യസ്‌ത ഓപ്ഷനുകളും ഹൈറൈഡറിനുണ്ട്.

രണ്ടാമത്തെ 1.5 ലിറ്റർ അറ്റ്കിൻസൺ സൈക്കിൾ പെട്രോൾ എഞ്ചിൻ ഒറ്റ ഇലക്ട്രിക് മോട്ടോർ ഉള്ള സെൽഫ് ചാർജിംഗ് ശക്തമായ ഹൈബ്രിഡ് സജ്ജീകരണമാണുള്ളത്. e-CVT ഗിയർബോക്‌സോടു കൂടിയ ഈ യൂണിറ്റ് 116 bhp കരുത്തിൽ പരമാവധി 141 Nm torque വരെ നൽകും.

ഈ സംയോജിത പെർഫോമൻസിനായി 1.5 ലിറ്റർ പെട്രോൾ എഞ്ചിനും ഒരു ഇലക്ട്രിക് മോട്ടോറുമാണ് മിഡ്-സൈസ് എസ്‌യുവി ഉപയോഗിക്കുന്നത്.27.97 കിലോമീറ്റർ മൈലേജാണ് വാഹനത്തിൽ കമ്പനി അവകാശപ്പെടുന്നതും.

ഇനി വലിപ്പത്തിന്റെ കാര്യത്തിലേക്ക് നോക്കിയാൽ ടൊയോട്ട അർബൻ ക്രൂയിസർ ഹൈറൈഡറിന് 4,365 mm നീളവും 1,795 mm വീതിയും 1,645 mm ഉയരവുമുണ്ട്. ഹൈറൈഡറിന്റെ വീൽബേസ് 2,600 mm ആണ്. എസ്‌യുവിക്ക് 1,755 കിലോഗ്രാം ഭാരമുണ്ടെന്നാണ് ടൊയോട്ട വിശദമാക്കിയിരിക്കുന്നത്.

റിവ്യൂ വിശേഷങ്ങൾക്കായി ഡ്രൈവിംഗിന് ലഭിച്ചതും ഹൈറൈഡറിന്റെ പുതിയ സ്ട്രോംഗ് ഹൈബ്രിഡ് മോഡൽ തന്നെയായിരുന്നുവെന്നതും സന്തോഷം നൽകുന്ന കാര്യമായിരുന്നു. ഇക്കോ, നോർമൽ മോഡുകളിൽ ഹൈബ്രിഡ് മോഡൽ പവറെടുക്കുന്നത് വളരെ മന്ദഗതിയിലാണ്. ബാറ്ററി റീജൻ മോഡ് ഹൈറൈഡറിൽ ഒരു പെഡൽ ഡ്രൈവിംഗ് സാധ്യമാക്കുന്നുണ്ട്.

സിവിടി ഗിയർബോക്സിന്റെ റബർബാൻഡ് ഇഫക്ട് ഇപ്പോഴും അനുഭവപ്പെടുന്നുണ്ടെന്നതും പലരേയും അലോസരപ്പെടുത്തിയേക്കാം. എങ്കിലും ഡ്രൈവിംഗ് ഒട്ടും മടുപ്പുളവാക്കുന്നില്ല എന്നതാണ് ഹൈലൈറ്റ്. ബൂട്ടിൽ ഇടംപിടിച്ചിരിക്കുന്ന ഹൈബ്രിഡ് സിസ്റ്റത്തിനായുള്ള ബാറ്ററികളുടെ ഭാരത്തെ ചെറുക്കുന്നതിനായി കടുപ്പമുള്ള സസ്പെൻഷൻ സജ്ജീകരണമാണ് ഹൈറൈഡർ അവതരിപ്പിക്കുന്നത്.

ഹൈറൈഡർ ബോഡി റോളിന്റെ ന്യായമായ അളവ് പ്രകടിപ്പിക്കുന്നുമുണ്ട്. സ്റ്റിയറിംഗ് വീൽ ഒരു മാരുതി സുസുക്കിയിൽ നിന്നും കടമെടുത്തിരിക്കുന്നതാണ്. ഇതിന്റെ ഫീൽ ബ്രാൻഡിന്റെ സാധാരണമാണ്.

കുറഞ്ഞ വേഗതയിൽ സ്റ്റിയറിംഗ് ഭാരം വളരെ കുറവാണ്.ഇത് സിറ്റി സാഹചര്യങ്ങളിൽ സഹായിക്കും. എന്നിരുന്നാലും ഉയർന്ന വേഗതയിൽ സ്റ്റിയറിംഗ് വീലിന് അൽപം ഭാരം അനുഭപ്പെടുന്നുണ്ടായിരുന്നുവെന്ന കാര്യവും എടുത്തു പറയേണ്ടതാണ്.

പുതിയ ഹൈറൈഡറിലെ ബ്രേക്കുകൾ നാലുവീലിലും ഡിസ്‌കുകളാണ്. മികച്ച പെർഫോമൻസാണ് ബ്രേക്കിംഗിലും കാണാനാവുന്നത്. ഹൈറൈഡറിന്റെ ക്യാബിനിലെ എൻവിഎച്ച് ലെവലുകൾ ഏറ്റവും മികച്ചവയാണ്. പുറത്തുനിന്നും യാതൊരു ശബ്ദവും അകത്തേക്ക് എത്തുന്നില്ല എന്നത് വളരെ ശ്രദ്ധേയമാണ്.