വന്നിട്ട് പത്തു വര്‍ഷം, ഇന്നും എസ്‌യുവി ലോകത്തെ രാജാവായി ടൊയോട്ട ഫോര്‍ച്യൂണര്‍

അവതരിച്ച കാലംതൊട്ട് ഇന്നുവരെ ഫോര്‍ച്യൂണറിന് പ്രചാരം കൂടിയതല്ലാതെ കുറഞ്ഞിട്ടില്ല. ഇതിനിടയില്‍ എതിരാളികള്‍ ഒരുപാട് കടന്നുപോയി. ഫോര്‍ച്യൂണര്‍ മാത്രം നിരയില്‍ തലയുയര്‍ത്തി നില്‍പ്പുണ്ട്. ഒരുലക്ഷത്തില്‍പ്പരം ടൊയോട്ട ഫോര്‍ച്യൂണറകളാണ് ഇന്നു ഇന്ത്യന്‍ നിരത്തിലോടുന്നത്. പ്രതിമാസം ശരാശരി 1,500 യൂണിറ്റുകളുടെ വില്‍പ്പന ഫോര്‍ച്യൂണര്‍ നേടുന്നുണ്ട്.

ശ്രേണിയില്‍ ഫോര്‍ഡ് എന്‍ഡവറടക്കമുള്ള മറ്റു എതിരാളികളുടെ വില്‍പ്പന നോക്കിയാല്‍ അറിയാം ഫോര്‍ച്യൂണ്‍ എന്തുമാത്രം മുന്നിലാണെന്ന്. 2009 -ല്‍ 3.0 ലിറ്റര്‍ എഞ്ചിനൊപ്പമായിരുന്നു ടൊയോട്ട ഫോര്‍ച്യൂണര്‍ വില്‍പ്പനയ്ക്ക് വന്നത്. ആദ്യതവണ 4X4 സംവിധാനം മാത്രം നല്‍കിയാല്‍ മതിയെന്ന് കമ്പനി തീരുമാനിച്ചു.

എന്നാല്‍ എസ്‌യുവിയുടെ പ്രചാരം കണ്ട ടൊയോട്ട, തൊട്ടടുത്ത വര്‍ഷംതന്നെ 4X2 പതിപ്പിനെയും വിപണിയില്‍ കൊണ്ടുവരികയായിരുന്നു. ഫോര്‍ച്യൂണറിന് ഓട്ടോമാറ്റിക് ഗിയര്‍ബോക്‌സ് നല്‍കാനുള്ള ടൊയോട്ടയുടെ തീരുമാനവും മോഡലിന്റെ സ്വീകാര്യത കൂട്ടി. 2016 -ലാണ് ഫോര്‍ച്യൂണറിന്റെ ആദ്യതലമുറയ്ക്ക് തിരശ്ശീല വീണത്.

ആറു വര്‍ഷംകൊണ്ടു ശ്രേണിയില്‍ 75 ശതമാനം വില്‍പ്പനയും ഫോര്‍ച്യൂണര്‍ കൈയ്യടക്കിയിരുന്നു. 2016 -ല്‍ ഫോര്‍ച്യൂണറിനെ കമ്പനി പരിഷ്‌കരിച്ചു. പുതിയ ഡിസൈന്‍. പുതിയ ഫീച്ചറുകള്‍. പുതിയ എഞ്ചിന്‍ ഓപ്ഷനുകള്‍. നിലവില്‍ 27.8 ലക്ഷം രൂപ മുതലാണ് വിപണിയില്‍ ഫോര്‍ച്യൂണറിന് വില. ഏറ്റവും ഉയര്‍ന്ന ഫോര്‍ച്യൂണര്‍ പതിപ്പ് 33.6 ലക്ഷം രൂപ വരെ വില കുറിക്കും.

ഇന്ന് പെട്രോള്‍, ഡീസല്‍ എഞ്ചിന്‍ പരിവേഷങ്ങള്‍ ടൊയോട്ട ഫോര്‍ച്യൂണറിലുണ്ട്. ഫോര്‍ച്യൂണറിലെ 3.0 ലിറ്റര്‍ ഡീസല്‍ എഞ്ചിന്‍ 175 bhp കരുത്തും 420 Nm torque ഉം സൃഷ്ടിക്കാന്‍ പ്രാപ്തമാണ്. ആറു സ്പീഡാണ് എസ്‌യുവിയിലെ മാനുവല്‍ ഗിയര്‍ബോക്‌സ്. ഓട്ടോമാറ്റിക് ഗിയര്‍ബോക്‌സും ഡീസല്‍ മോഡലില്‍ ടൊയോട്ട സമര്‍പ്പിക്കുന്നുണ്ട്.

Most Read: മാരുതി ഉള്ളപ്പോള്‍ ചെറു കാറുകള്‍ പുറത്തിറക്കിയിട്ട് കാര്യമില്ല: കിയ

കരുത്തില്‍ മാറ്റമില്ലെങ്കിലും ഫോര്‍ച്യൂണര്‍ ഡീസല്‍ ഓട്ടോമാറ്റിക്കില്‍ ടോര്‍ഖ് ഉത്പാദനം കൂടും (450 Nm). 2.7 ലിറ്റര്‍ എഞ്ചിനാണ് ഫോര്‍ച്യൂണര്‍ പെട്രോളില്‍ ഒരുങ്ങുന്നത്. ആറു സ്പീഡ് ഓട്ടോമാറ്റിക്, അഞ്ചു സ്പീഡ് മാനുവല്‍ ഗിയര്‍ബോക്‌സ് ഓപ്ഷനുകള്‍ പെട്രോള്‍ മോഡലില്‍ ലഭ്യമാണ്.

Most Read: വിറ്റാലും നഷ്ടമില്ല, ഏറ്റവും കൂടുതൽ റീസെയിൽ വിലയുള്ള പത്ത് കാറുകൾ

164 bhp കരുത്തും 245 Nm torque -മാണ് ഫോര്‍ച്യൂണര്‍ പെട്രോള്‍ പരമാവധി അവകാശപ്പെടുക. ഇതേസമയം, 4X4 യൂണിറ്റിന്റെ പിന്തുണ പെട്രോള്‍ പതിപ്പിനില്ല. വിപണിയില്‍ ഹോണ്ട CR-V, ഫോര്‍ഡ് എന്‍ഡവര്‍, സ്‌കോഡ കൊഡിയാക്ക്, മഹീന്ദ്ര ആള്‍ട്യുറാസ് G4 തുടങ്ങിയ എസ്‌യുവികളുമായാണ് ടൊയോട്ട ഫോര്‍ച്യൂണറിന്റെ മത്സരം.

Most Read: വിജയക്കൊടി പാറിച്ച് ഹ്യുണ്ടായി വെന്യു, ബുക്കിങ് 33,000 പിന്നിട്ടു

എന്നാല്‍ ഫോര്‍ച്യൂണറിന്റെ പ്രചാരത്തിന് മുന്നില്‍ ഇവരെല്ലാം ബഹുദൂരം പിന്നിലാണ്. ലാഡര്‍ ഓണ്‍ ഫ്രെയിം ഷാസിയും 4X4 സംവിധാനവും ആഢംബര അകത്തളവും ഫോര്‍ച്യൂണറിന്റെ പ്രായോഗികത ഉയര്‍ത്തും. പുതിയ ഫോര്‍ച്യൂണറില്‍ ആധുനിക സൗകര്യങ്ങള്‍ക്കും കുറവില്ല.