ഓട്ടോ എക്സ്പോ 2020: ബിഎസ്-VI ഗൂർഖയുമായി ഫോഴ്സ് മോട്ടോർസ്

മുൻ ബിഎസ്-IV മോഡലിനെ അപേക്ഷിച്ച് 2020 ഫോഴ്‌സ് ഗൂർഖയുടെ സ്റ്റൈലിംഗിലും ഫീച്ചറുകളിലും കാര്യമായ പരിഷ്ക്കരണങ്ങളുമായാണ് കമ്പനി എത്തുന്നത്. ഓഫ് റോഡിംഗ് പ്രേമികളുടെ ഇടയിൽ താരമായ ഗൂർഖ ഫോഴ്സ് നിരയിലെ വാഹനങ്ങളുടെ വിൽപ്പനയിൽ മികച്ച പ്രകടനം കാഴ്ച്ചവെക്കുമെന്നാണ് പ്രതീക്ഷിക്കുന്നത്.

മഹീന്ദ്ര ഥാറുമായുള്ള മത്സരത്തില്‍ പിടിച്ചുനില്‍ക്കണമെങ്കില്‍ ഗൂര്‍ഖയ്ക്ക് മാറ്റം അനിവാര്യമായിരുന്നു. അതിനായി വാഹനത്തിൽ നിരവധി പരിഷ്ക്കരിക്കരണങ്ങളാണ് കമ്പനി കൊണ്ടുവന്നിരിക്കുന്നത്.

നിലവിലെ ക്രാഷ്-ടെസ്റ്റ് മാനദണ്ഡങ്ങൾക്കും വരാനിരിക്കുന്ന കാൽനട സുരക്ഷാ മാനദണ്ഡങ്ങൾക്കും അനുസൃതമായി ഒരു പുതിയ ചേസിസും ബോഡിഷെലും വാഹനത്തിന് ലഭിക്കുന്നു. ഗൂർഖ അതിന്റെ ചതുരാകൃതിയിലുള്ള റെട്രോ രൂപം നിലനിർത്തിയിട്ടുണ്ടെങ്കിലും അതിന്റെ മുൻഗാമികളിൽ നിന്ന് വേർതിരിച്ചറിയാൻ ധാരാളം സൗന്ദര്യവർദ്ധക മാറ്റങ്ങൾ കമ്പനി ഉൾപ്പെടുത്തിയിട്ടുണ്ട്.

എസ്‌യുവിയുടെ മുന്നിലും പിന്നിലും പുതിയ സെറ്റ് ബമ്പറുകളും ലൈറ്റ് ക്ലസ്റ്ററുകളും ഒരു പുതിയ ഗ്രില്ലും ലഭിക്കുന്നു. ബൾഗിംഗ് വീൽ ആർച്ചുകളും ക്ലാഡിംഗുകളും പുതിയ ഗൂർഖയെ വ്യത്യസ്തമാക്കുന്നു. 245/70 ട്യൂബ്‌ലെസ് ടയറുകളുള്ള 16 ഇഞ്ച് അലോയ് വീലുകളാണ് എസ്‌യുവിയിൽ ഇടംപിടിക്കുന്നത്.

എസ്‌യുവിയുടെ ആകർഷണം വിശാലമാക്കുന്നതിനായി ക്യാബിൻ അതിന്റെ മുൻഗാമിയുടെ യൂട്ടിലിറ്റേറിയൻ ഡിസൈനിൽ നിന്ന് ഒരു വലിയ മാറ്റത്തിലേക്ക് ചുവടുവെച്ചു. ഒരു ഓഫ്-റോഡ് സ്വഭാവത്തിന് പുറമേ ഒരു ദൈനംദിന ദൈനംദിന വാഹനം എന്ന നിലയിലേക്ക് ഗൂർഖയുടെ അകത്തളം ഒരുങ്ങിയിരിക്കുന്നു.

ഡാഷ്‌ബോർഡ് ഇപ്പോഴും ആഴമില്ലാത്തതും നേരെയുള്ളതുമാണ്. എങ്കിലും സമഗ്രമായ ഒരു മേക്കോവർ ലഭിച്ചിട്ടുണ്ടെന്നത് ശ്രദ്ധേയമാണ്. ടച്ച്സ്ക്രീൻ ഇൻഫോടെയിൻമെന്റ് സംവിധാനമുള്ള സെന്റർ കൺസോൾ പുതിയതാണ്. വാഹനത്തിന്റെ ഇൻസ്ട്രുമെന്റ് ക്ലസ്റ്ററും പുതുക്കിയിട്ടുണ്ട്. ഒരു ഡിജിറ്റൽ MID ഇപ്പോൾ ടാക്കോയ്ക്കും സ്പീഡോമീറ്ററിനും ഇടിയിലായാണ് സ്ഥാനംപിടിച്ചിരിക്കുന്നത്.

ഡ്യുവൽ എയർബാഗുകൾ, എബിഎസ്, റിയർ പാർക്കിംഗ് സെൻസറുകൾ, പവർ വിൻഡോകൾ, ഡിആർഎല്ലുകളുള്ള എൽഇഡി ഹെഡ്‌ലാമ്പുകൾ എന്നിവ ഉൾപ്പെടുത്തിയാണ് പുതിയ ഗൂർഖ പായ്ക്ക് ചെയ്യുന്നത്. സീറ്റുകളിലേക്ക് നീങ്ങുമ്പോൾ, ക്യാബിനിൽ നാല് മുൻ ഫേസിംഗ് സീറ്റുകളാണ് ഉൾപ്പെടുത്തിയിരിക്കുന്നത്.

മെക്കാനിക്ക് ഘടകങ്ങളിലേക്ക് നീങ്ങുമ്പോൾ ഗൂർഖ പഴയ 2.6 ലിറ്റർ ഡീസൽ എഞ്ചിൻ മുന്നോട്ട് കൊണ്ടുപോകുന്നു. ബിഎസ്-VI മലിനീകരണ മാനദണ്ഡങ്ങൾക്കനുസൃതമായി എഞ്ചിൻ നവീകരിച്ചിട്ടുണ്ട്. ഇത് 90 bhp കരുത്താണ് ഉത്പാദിപ്പിക്കുന്നത്.അഞ്ച് സ്പീഡ് മാനുവൽ ഗിയർബോക്‌സുമായി എഞ്ചിൻ ജോടിയാക്കിയിരിക്കുന്നു.

മുമ്പത്തെപ്പോലെ ഫോർ-വീൽ-ഡ്രൈവ് മോഡൽ ഡ്രൈവറും കോ-ഡ്രൈവറും തമ്മിലുള്ള ഫ്ലോർ കൺസോളിലെ ലിവർ വഴി നിയന്ത്രിക്കുന്ന മാനുവൽ ലോക്കിംഗ് ഡിഫറൻഷ്യലുകൾക്കൊപ്പം ഇരുവശത്തും ലൈവ് ആക്‌സിലുകൾ ഉപയോഗിക്കുന്നു. ഇരുചക്ര ഡ്രൈവ് മോഡലും ലഭ്യമാകും. പഴയ ഗൂർഖയെപ്പോലെ, പുതിയ എസ്‌യുവിക്ക് ഒരു സ്വതന്ത്ര ഫ്രണ്ട് സസ്‌പെൻഷനും നാല് കോണുകളിലും കോയിൽ സ്പ്രിംഗുകളും ലഭിക്കുന്നു.

2020 മെയ് മാസത്തിൽ വാഹനം വിപണിയിൽ എത്തുമ്പോൾ പുതിയ ഗൂർഖയുടെ വിലകൾ കമ്പനി വെളിപ്പെടുത്തും.