ബിഎസ്-VI എലൈറ്റ് i20 വിപണിയിൽ അവതരിപ്പിച്ച് ഹ്യുണ്ടായി

എലൈറ്റ് i20, ഗ്രാൻഡ് i10, വെന്യു കോംപാക്‌ട് എസ്‌യുവി എന്നിവയുടെ ബിഎസ്-VI കംപ്ലയിന്റ് പതിപ്പുകൾക്കായുള്ള ബുക്കിംഗ് ആരംഭിച്ചതായി ഈ മാസം ആദ്യം ഹ്യുണ്ടായി അറിയിച്ചിരുന്നു.

എഞ്ചിൻ പരിഷ്ക്കരണത്തിനു പുറമെ എലൈറ്റ് i20 യിൽ കാര്യമായ ഒരു മാറ്റവും കൊറിയൻ നിർമ്മാതാക്കൾ വരുത്തിയിട്ടില്ല. മൂന്നാംതലമുറ i20 ഉടൻ ആഗോളതലത്തിൽ അരങ്ങേറ്റം കുറിക്കും. എങ്കിലും ഇന്ത്യയിൽ എത്താൻ കുറച്ചു മാസങ്ങൾ കൂടി കാത്തിരിക്കേണ്ട സാഹചര്യത്തിലാണ് നിലവിലെ മോഡലിനെ പുതിയ മലിനീകരണ മാനദണ്ഡത്തിലേക്ക് പരിഷ്ക്കരിക്കാൻ ഹ്യുണ്ടായി തീരുമാനിച്ചത്.

ഗ്രാൻഡ് i10 നിയോസിൽ നിന്നുള്ള 1.2 ലിറ്റർ പെട്രോൾ ബിഎസ്-VI എഞ്ചിൻ യൂണിറ്റാണ് i20 ക്ക് ലഭിക്കുന്നത്. നിയോസിൽ ഈ യൂണിറ്റ് 83 bhp, 114 Nm torque എന്നിവ ഉത്പാദിപ്പിക്കുന്നു. എന്നാൽ എലൈറ്റിൽ വ്യത്യസ്ത ട്യൂണിലായിരിക്കും എഞ്ചിൻ വാഗ്ദാനം ചെയ്യുക. കാറിന്റെ പവർ കണക്കുകളെക്കുറിച്ചും ഇന്ധനക്ഷമതയെക്കുറിച്ചുമുള്ള കാര്യങ്ങൾ കമ്പനി ഇതുവരെ വെളിപ്പെടുത്തിയിട്ടില്ല.

ബി‌എസ്-VI ലേക്ക് നവീകരിച്ചതോടെ വാഹനത്തിന്റെ മോഡലുകളിൽ ഒരു പുനരവലോകനവും നൽകിയിട്ടുണ്ട് കമ്പനി. അടിസ്ഥാന എറ, പെട്രോൾ-സിവിടി സ്‌പോർട്‌സ് പ്ലസ്, അസ്ത (O) തുടങ്ങിയവയെ ലൈനപ്പിൽ നിന്ന് ഒഴിവാക്കി. നിലവിലെ ബിഎസ്-IV കംപ്ലയിന്റിനേക്കാൾ 90,000 രൂപ കൂടുതലാണ് നവീകരിച്ച മോഡലിന്.

ഉപകരണങ്ങളുടെ കാര്യത്തിൽ ഹ്യുണ്ടായി ഔദ്യോഗിക വിശദാംശങ്ങൾ ഇതുവരെ വെളിപ്പെടുത്തിയിട്ടില്ലെങ്കിലും എൻ‌ട്രി ലെവൽ ബി‌എസ്-VI മോഡലിന് നിലവിലെ ബി‌എസ്-IV കാറിനേക്കാൾ മികച്ച സജ്ജീകരണം ലഭിക്കുമെന്നാണ് പ്രതീക്ഷിക്കുന്നത്.

എറ പതിപ്പുമായി താരതമ്യപ്പെടുത്തുമ്പോൾ ബി‌എസ്-IV മാഗ്ന പ്ലസിന് 2-DIN ഓഡിയോ സിസ്റ്റം, എൽഇഡി ഡിആർഎൽ, റിമോട്ട് ലോക്കിംഗ്, ഇലക്ട്രിക് അഡ്ജസ്റ്റ് വിംഗ് മിററുകൾ, റിയർ എയർ-കോൺ വെന്റുകൾ എന്നിവ പോലുള്ള അധിക കിറ്റ് ലഭിക്കുന്നു.

ഉയർന്ന മോഡലുകൾക്ക് 7.0 ഇഞ്ച് ടച്ച്‌സ്‌ക്രീൻ, ഓട്ടോ ക്ലൈമറ്റ് കൺട്രോൾ, സൈഡ് ആൻഡ് കർട്ടൻ എയർബാഗുകൾ, റിവേഴ്‌സ് ക്യാമറ എന്നിവയും അതിലേറെയും വാഗ്‌ദാനം ചെയ്യുന്നു. മാരുതി ബലേനോ, ഹോണ്ട ജാസ്, ടൊയോട്ട ഗ്ലാൻസ എന്നീ മോഡലുകളാണ് ബിഎസ്-VI എലൈറ്റ് i20 യുടെ എതിരാളികൾ.

2020 ഓട്ടോ എക്‌സ്‌പോയിൽ പ്രദർശിപ്പിച്ച പുതിയ ക്രെറ്റ വിപണിയിൽ എത്തിക്കാൻ ഒരുങ്ങുകയാണ് ഹ്യുണ്ടായി. മിഡ് സൈസ് എസ്‌യുവി മാർച്ച് 17 ന് വിപണിയിലെത്തും.