ഓട്ടോ എക്സ്പോ 2020: സിഎൻജി എസ്-പ്രെസ്സോ പ്രദർശിപ്പിച്ച് മാരുതി

2019 സെപ്റ്റംബറിൽ വിപണിയിൽ എത്തിയ മാരുതി എസ്-പ്രെസ്സോ ഇന്ത്യൻ വിപണിയിൽ ഏറ്റവും കൂടുതൽ വിറ്റഴിക്കപ്പെടുന്ന മോഡലുകളിൽ ഒന്നായി അതിവേഗം മാറി. നിലവിൽ 1.0 ലിറ്റർ പെട്രോൾ എഞ്ചിൻ ഓപ്ഷനിൽ മാത്രമാണ് എസ്-പ്രസ്സോ വിൽപ്പനക്കെത്തുന്നത്. എന്നാൽ സി‌എൻ‌ജി സാങ്കേതികവിദ്യയിൽ ഹാച്ച്ബാക്ക് ഉടൻ വിപണിയിൽ എത്തും.

സി‌എൻ‌ജി വകഭേദത്തിന് പുറമേ ഓട്ടോ എക്‌സ്‌പോയിൽ മാരുതി എസ്-പ്രസ്സോ ഹാച്ച്ബാക്കിനായി ബ്രാൻഡിന്റെ ഏറ്റവും പുതിയ ഫാക്ടറി ഫിറ്റ് ആക്‌സസറികളും കമ്പനി പ്രദർശിപ്പിച്ചു. ആക്‌സസറികളിൽ അധിക ഡെക്കലുകൾ, റൂഫ് സ്‌പോയ്‌ലറുകൾ, ഡോർ പാനലുകൾ, ബമ്പറുകൾ, മറ്റ് സ്ഥലങ്ങളിലെ വ്യത്യസ്‌ത ഹൈലൈറ്റുകൾ ഉൾപ്പെടുന്നു.

മാരുതി എസ്-പ്രെസ്സോയുടെ സി‌എൻ‌ജി വകഭേദത്തിനും അതേ 998 സിസി ത്രീ സിലിണ്ടർ പെട്രോൾ എഞ്ചിനാണ് കരുത്ത് നൽകുന്നത്. സി‌എൻ‌ജി പതിപ്പിന്റെ പവർ, ടോർഖ് കണക്കുകൾ ഇതുവരെ കമ്പനി സ്ഥിരീകരിക്കുകയോ ഔദ്യോഗികമായി പ്രഖ്യാപിക്കുകയോ ചെയ്തിട്ടില്ല.

അഞ്ച് സ്പീഡ് മാനുവൽ ഗിയർബോക്‌സുമായി ജോടിയാക്കിയ പെട്രോൾ യൂണിറ്റ് 67 bhp കരുത്തും 90 Nm torque ഉം ഉത്പാദിപ്പിക്കും. എന്നാൽ സിഎൻജി വകഭേദത്തിന് പെട്രോൾ മോഡലിന്റെ പവർ ഔട്ട്പുട്ടിനേക്കാൾ കുറവായിരിക്കുമെന്ന് വ്യക്തമാണ്.

എക്സ്പോ അവസാനിക്കുന്ന ഉടൻ തന്നെ എസ്-പ്രെസ്സോ സി‌എൻ‌ജി ഇന്ത്യൻ വിപണിയിൽ വിൽപ്പനയ്‌ക്കെത്തുമെന്ന് പ്രതീക്ഷിക്കുന്നു. ഇതുകൂടാതെ സ്വിഫ്റ്റിന്റെ ഹൈബ്രിഡ് പതിപ്പും ഫ്യൂച്ചുറോ-ഇ കോണ്‍സെപ്റ്റും ആദ്യ ദിനത്തിന്റെ പകുതിയിൽ കമ്പനി അവതരിപ്പിച്ചിട്ടുണ്ട്.

ഹൈബ്രിഡെന്ന് പേരുണ്ടെങ്കിലും സ്വിഫ്റ്റിനെ പൂര്‍ണമായി ഹൈബ്രിഡാക്കാന്‍ കമ്പനി തയ്യാറായിട്ടില്ല. 1.2 ലിറ്റര്‍ ഡ്യൂവല്‍ജെറ്റ് K12C പെട്രോള്‍ എഞ്ചിനാണ് സ്വിഫ്റ്റ് ഹൈബ്രിഡിന് കരുത്തേകുന്നത്.