Nissan-ന് കരുത്തായി Magnite; എതിരാളികളെപ്പോലും ഞെട്ടിച്ച് ബുക്കിംഗ്

2020 ഡിസംബറില്‍ ആദ്യമായി അവതരിപ്പിച്ചതിന് ശേഷം നാളിതുവരെ മോഡലിന് 60,000 ബുക്കിംഗുകള്‍ ലഭിച്ചുവെന്നും കമ്പനി അറിയിച്ചു. അതേസമയം 2021 ഓഗസ്റ്റ് മാസത്തിലെ വില്‍പ്പന കണക്കുകളും കമ്പനി പങ്കുവെച്ചു.

കഴിഞ്ഞ മാസം Nissan, Datsun ശ്രേണി ഉള്‍പ്പെടെ 3,209 യൂണിറ്റുകളുടെ ആഭ്യന്തര മൊത്തക്കച്ചവടം കമ്പനി റിപ്പോര്‍ട്ട് ചെയ്തു, കഴിഞ്ഞ വര്‍ഷം ഇതേ മാസത്തില്‍ വിറ്റ 810 യൂണിറ്റുകളെ അപേക്ഷിച്ച് 296 ശതമാനം വളര്‍ച്ചയാണ് വില്‍പ്പനയില്‍ രേഖപ്പെടുത്തിയിരിക്കുന്നത്.

എന്നിരുന്നാലും, ഈ വര്‍ഷം ജൂലൈയില്‍ വിറ്റ 8,156 യൂണിറ്റുകളെ അപേക്ഷിച്ച് ജാപ്പനീസ് കാര്‍ നിര്‍മാതാക്കളുടെ പ്രതിമാസ വില്‍പ്പന 154 ശതമാനത്തിലധികം കുറഞ്ഞു. എന്നിരുന്നാലും Magnite സബ്-കോംപാക്ട് എസ്‌യുവി വില്‍പ്പനയില്‍ ബ്രാന്‍ഡിന്റെ നെടുംതൂണായി നിലകൊള്ളുകയും ചെയ്യുന്നു.

'ഉത്സവ സീസണ്‍ ആരംഭിച്ചതോടെ, ബുക്കിംഗുകളുടെ വര്‍ധിച്ച വരവില്‍ ഉപഭോക്തൃ വികാരങ്ങള്‍ അനുകൂലമാണ്, സെമി കണ്ടക്ടര്‍ വിതരണത്തിന്റെ കുറവും വര്‍ധിച്ച ലീഡ് സമയവും വെല്ലുവിളി നേരിടുന്നു വാഹനങ്ങളുടെ ലഭ്യതയെ ബാധിക്കുന്നുവെന്നാണ് നിസാന്‍ മോട്ടോര്‍ ഇന്ത്യ ലിമിറ്റഡ് മാനേജിംഗ് ഡയറക്ടര്‍ രാകേഷ് ശ്രീവാസ്തവ പറഞ്ഞു.

വരും മാസങ്ങളിലും ഈ വെല്ലുവിളി തുടരുമെന്നണ് തങ്ങള്‍ പ്രതീക്ഷിക്കുന്നതെന്നും, ഉപഭോക്താക്കള്‍ക്ക് കൂടുതല്‍ Magnite എത്തിക്കുന്നതിനുള്ള വിതരണ ശൃംഖലയില്‍ പ്രവര്‍ത്തിക്കുന്നത് തുടരുമെന്നും അദ്ദേഹം പറഞ്ഞു.

Nissan Magnite 20 ഗ്രേഡ് ലൈനപ്പില്‍ ലഭ്യമാണ്, തെരഞ്ഞെടുക്കാന്‍ 36 കോമ്പിനേഷനുകളുമുണ്ട്. സബ്-കോംപാക്ട് എസ്‌യുവി ശ്രേണിയില്‍ എത്തുന്ന മോഡലിന് 5.59 ലക്ഷം രൂപ മുതല്‍ 9.74 ലക്ഷം രൂപ വരെയാണ് എക്‌സ്‌ഷോറൂം വില.

രണ്ട് പെട്രോള്‍ എഞ്ചിന്‍ ഓപ്ഷനുകളിലാണ് എസ്‌യുവി വരുന്നത് - 1.0 ലിറ്റര്‍ നാച്ചുറലി ആസ്പിറേറ്റഡ് മോട്ടോറും 1.0 ലിറ്റര്‍ ടര്‍ബോ പെട്രോള്‍ യൂണിറ്റുമാണ് വാഹനത്തിന് കരുത്ത് നല്‍കുന്നത്.

നാച്ചുറലി ആസ്പിറേറ്റഡ് യൂണിറ്റ് ഏകദേശം 71 bhp കരുത്തും 96 Nm torque ഉം സൃഷ്ടിക്കുമ്പോള്‍, രണ്ടാമത്തേത് 99 bhp കരുത്തും 160 Nm torque ഉം സൃഷ്ടിക്കും. ഗിയര്‍ബോക്‌സ് ഓപ്ഷനുകളില്‍ അഞ്ച് സ്പീഡ് മാനുവല്‍ ഗിയര്‍ബോക്‌സ് സ്റ്റാന്‍ഡേര്‍ഡായി ലഭിക്കും.

അതേസമയം ടര്‍ബോ പെട്രോള്‍ യൂണിറ്റിന് ഓപ്ഷണല്‍ CVT ഓട്ടോമാറ്റിക് യൂണിറ്റും ഉണ്ട്. CVT വേരിയന്റ് 152 Nm ല്‍ അല്പം കുറഞ്ഞ ടോര്‍ക്ക് വാഗ്ദാനം ചെയ്യുന്നുവെന്ന് വേണം പറയാന്‍.

Renault Kiger, Kia Sonet, Hyundai Venue, Maruti Vitara Brezza, Tata Nexon, Mahindra XUV300, Toyota Urban Cruiser, Ford EcoSport എന്നിവയ്‌ക്കെതിരെയാണ് മോഡല്‍ വിപണിയില്‍ മത്സരിക്കുന്നത്. ശക്തരായ എതിരാളികള്‍ ആണെങ്കില്‍ കൂടിയും വില നിര്‍ണയം വന്നതോടെ ഉപഭോക്താക്കള്‍ Magnite-നെ തേടിയെത്തിയെന്ന് വേണം പറയാന്‍.

ഫീച്ചറുകളുടെ അടിസ്ഥാനത്തിലും വാഹനം മികച്ചതെന്നാണ് വിപണി പറയുന്നത്. Magnite -ല്‍ സണ്‍റൂഫ് അല്ലെങ്കില്‍ വെന്റിലേറ്റഡ് സീറ്റുകള്‍ ലഭിക്കുന്നില്ലെങ്കിലും - ഇന്ത്യന്‍ കാര്‍ വാങ്ങുന്നവര്‍ക്കിടയില്‍ ഇത് ജനപ്രിയമാണെന്നാണ് റിപ്പോര്‍ട്ട്.

വാഹനത്തില്‍ എട്ട് ഇഞ്ച് ഇന്‍ഫോടെയ്ന്‍മെന്റ് യൂണിറ്റ് കമ്പനി നല്‍കുന്നു. മുന്നിലും പിന്നിലും വശങ്ങളിലുമുള്ള ക്യാമറകള്‍ സുരക്ഷിതമായ ഡ്രൈവിംഗിന് സഹായിക്കുന്നു, അതേസമയം എയര്‍ പ്യൂരിഫയറില്‍ ഓപ്ഷണല്‍ ടെക് പായ്ക്ക് പായ്ക്കുകള്‍, വയര്‍ലെസ് ഫോണ്‍ ചാര്‍ജിംഗ്, ആംബിയന്റ് ലൈറ്റിംഗ്, പ്രീമിയം സൗണ്ട് സിസ്റ്റം എന്നവയും സവിശേഷതകളാണ്.

സുരക്ഷയുടെ കാര്യത്തിലും വാഹനം ഒട്ടുംപിന്നിലല്ലെന്ന് വേണം പറയാന്‍. ഡ്യുവല്‍ എയര്‍ബാഗുകള്‍, എബിഎസ് വിത്ത് ഇബിഡി, സീറ്റ് ബെല്‍റ്റ് പ്രീ-ടെന്‍ഷനര്‍മാര്‍, ബ്രേക്ക് അസിസ്റ്റ്, വെഹിക്കിള്‍ ഡൈനാമിക് കണ്‍ട്രോള്‍, ട്രാക്ഷന്‍ കണ്‍ട്രോള്‍, ഹില്‍ സ്റ്റാര്‍ട്ട് അസിസ്റ്റ്, ടയര്‍ പ്രഷര്‍ മോണിറ്ററിംഗ് സിസ്റ്റം, ISOFIX ചൈല്‍ഡ് സീറ്റ് ആങ്കറേജുകളും മറ്റു സവിശേഷതകളുമായിട്ടാണ് എത്തുന്നത്.

കൂടാതെ, തെരഞ്ഞെടുക്കാന്‍ അഞ്ച് സിംഗിള്‍-ടോണും മൂന്ന് ഡ്യുവല്‍-ടോണ്‍ കളര്‍ ഓപ്ഷനുകളും ഉണ്ട്. ഇവയ്‌ക്കെല്ലാം ഇടയില്‍, ഫ്‌ലെയര്‍ റെഡ് ഗാര്‍ണറ്റ് നിറം പ്രാധാന്യമര്‍ഹിക്കുന്നു, കാരണം Nissan അവകാശപ്പെടുന്നത് ഇതിന് ഒരു പ്രത്യേക കോട്ടിംഗ് ലഭിക്കുന്നു, ഇത് വ്യത്യസ്ത കോണുകളില്‍ നിന്ന് നോക്കുമ്പോള്‍ ചെറുതായി വ്യത്യാസമുള്ള ഷേഡുകള്‍ സ്വീകരിക്കാന്‍ സഹായിക്കുന്നുവെന്നാണ്.

ഇന്ധനക്ഷമതയുടെ കാര്യത്തിലും Magnite മികച്ചതെന്ന് വേണം പറയാന്‍. അഞ്ച് സ്പീഡ് മാനുവല്‍ ട്രാന്‍സ്മിഷനോടുകൂടിയ Magnite ടര്‍ബോ എഞ്ചിന്റെ ARAI- സാക്ഷ്യപ്പെടുത്തിയ ഇന്ധനക്ഷമത 20 kmpl ആണ്. CVT ഉള്ള ഓപ്ഷന്‍ ഒരു ലിറ്റര്‍ ഇന്ധനത്തിന് 17.7 കിലോമീറ്റര്‍ നല്‍കുന്നുവെന്നും റിപ്പോര്‍ട്ടില്‍ പറയുന്നു.

വില്‍പ്പനയില്‍ ശ്രദ്ധിക്കുന്നതിനൊപ്പം കാര്‍ നിര്‍മ്മാതാവ് രാജ്യത്തെ സേവന ശൃംഖലയും ശക്തിപ്പെടുത്താന്‍ ഒരുങ്ങുകയാണ്. അധികം വൈകാതെ തന്നെ രാജ്യത്ത് സേവന ശൃംഖല വര്‍ധിപ്പിക്കുമെന്നും കമ്പനി അറിയിച്ചു.