ഇലക്‌ട്രിക് ഭാവിയിലേക്കുള്ള വജ്രായുധങ്ങളുമായി Honda, പുതിയ e:Ny1 പ്രോട്ടോടൈപ്പ് എസ്‌യുവിയെ പരിചയപ്പെടുത്തി

സമീപഭാവിയിൽ ചൈനയിൽ വിൽപ്പനയ്‌ക്കെത്തുന്ന ഹോണ്ട e:Ns1, e:Np1 എന്നീ ഇലക്ട്രിക് എസ്‌യുവികളുടെ മറ്റൊരു വകഭേദമായിരിക്കും പുതിയ e:Ny1 എന്നാണ് ആദ്യ വിവരം. പുതിയ ഹോണ്ട e:Ny1 എസ്‌യുവി കഴിഞ്ഞ വർഷം ചൈനയിൽ പ്രദർശിപ്പിച്ച e:N സീരീസ് എസ്‌യുവികളിലെ മൂന്നാമത്തെ മോഡലാണ്.

മൂന്ന് മോഡലുകളും ഏറ്റവും പുതിയ തലമുറ ഹോണ്ട HR-V-യെ അടിസ്ഥാനമാക്കിയുള്ളതാണെന്ന് തോന്നുന്നു. ജാപ്പനീസ് ബ്രാൻഡ് ഇപ്പോൾ പരിചയപ്പെടുത്തിയിരിക്കുന്ന എസ്‌യുവി പുതുതായി വികസിപ്പിച്ച ഇ:എൻ ആർക്കിടെക്ച്ചർ എഫ് പ്ലാറ്റ്‌ഫോമിലായിരിക്കും നിർമിക്കുകയെന്നാണ് കമ്പനി അറിയിച്ചിട്ടുമുണ്ട്.

ഇത് പുതിയ മോഡലിന് വേണ്ടി സൃഷ്ടിച്ചതാണെന്നും ഹോണ്ട പറയുന്നു. കൂടാതെ ഈ പ്ലാറ്റ്ഫോം ഭാവിയിലെ നിരവധി മോഡലുകളിൽ ഉപയോഗിക്കാനും സാധ്യതയുണ്ട്. e:N സീരീസ് മോഡലുകൾ ഇലക്‌ട്രിക് വാഹനങ്ങൾക്കായി മാത്രം വികസിപ്പിച്ചെടുത്ത ഒരു ആർക്കിടെക്ചർ ഉപയോഗിക്കുമെന്ന് കമ്പനി നേരത്തെ വെളിപ്പെടുത്തിയിരുന്നു.

ഹോണ്ട E പ്ലാറ്റ്‌ഫോമിന്റെ വിപുലീകൃത പതിപ്പായ ഇത് സ്പോർട്ടിയറും മികച്ചതുമായ ഡ്രൈവിംഗ് അനുഭവം പ്രദാനം ചെയ്യുമെന്നുമാണ് വിശകലനം. നേരത്തെ ചൈനയിൽ മാത്രമായിരിക്കുമെന്ന് പ്രതീക്ഷിച്ചിരുന്ന ഹോണ്ടയുടെ പുതിയ ഇലക്ട്രിക് വാഹനങ്ങൾ ഇപ്പോൾ ആഗോളതലത്തിൽ കൂടുതൽ വിപണികളിലേക്ക് എത്തുന്നുണ്ടെന്നതും കാണാനാവും.

ഹോണ്ടയിൽ നിന്നുള്ള എല്ലാ പുതിയ ഇലക്ട്രിക് എസ്‌യുവികളും പുതിയ ഇ:എൻ സീരീസ് ബ്രാൻഡിംഗായിരിക്കും ഉപയോഗിക്കുക. പേരിലെ 'e' എന്നത് സ്ഥാപനത്തിന്റെ ഇ:ടെക്‌നോളജി ബ്രാൻഡിനെയാണ് പരാമർശിക്കുന്നത്. അതേസമയം 'N' എന്നത് നൌ ആൻഡ് നെക്സ്റ്റ് എന്നതിനെയാണ് സൂചിപ്പിക്കുന്നത്. കൂടാതെ അടുത്ത തലമുറ മൊബിലിറ്റിക്ക് വേണ്ടിയുള്ള പുതിയ മൂല്യ സൃഷ്ടിയെയും ഇത് പ്രതിനിധീകരിക്കുന്നു.

ആദ്യത്തെ രണ്ട് e:N മോഡലുകളായ e:Ns1, e:Np1 എന്നിവ പുതിയ HR-V അടിസ്ഥാനമാക്കിയുള്ള സഹോദര കാറുകളാണ്. അവ ഹോണ്ടയുടെ ചൈനീസ് സംയുക്ത സംരംഭങ്ങളായ ഡോങ്ഫെങ് ഹോണ്ടയും GAC ഹോണ്ടയുമാണ് വാഗ്ദാനം ചെയ്യുക. ഇവ രണ്ടും 2022 സ്പ്രിംഗ് സീസണിൽ വിൽപ്പനയ്‌ക്കെത്തും. e:Ny1 എന്ന് വിളിക്കപ്പെടുന്ന മൂന്നാമത്തെ മോഡൽ യൂറോപ്പ്, വടക്കേ അമേരിക്ക തുടങ്ങിയ വിപണികൾക്കായും പ്രത്യേകം വിഭാനം ചെയ്യും.

e:Ns1, e:Np1 എന്നിവ 2020-ലെ ബീജിംഗ് മോട്ടോർ ഷോയിൽ ഹോണ്ട പ്രദർശിപ്പിച്ച e:പ്രോട്ടോടൈപ്പ് എസ്‌യുവികളുടെ പ്രൊഡക്ഷൻ മോഡലായിരിക്കും. ഇവയ്ക്ക് മൂന്നിനു പകരം 5-ഡോർ സംവിധാനമായിരിക്കും കമ്പനി സമ്മാനിക്കുക. ഇലക്‌ട്രിക് കാറിനുള്ള ശൂന്യമായ ഗ്രില്ലും മുൻവശത്ത് കാണാനാവും. e: Ny1 പ്രോട്ടോടൈപ്പ് എസ്‌യുവിക്ക് സമാനമായ രൂപകൽപ്പനയായിരിക്കും ഇതു വഹിക്കുക.

ബോഡി ഡിസൈനിലേക്ക് വരുമ്പോൾ അൽപം പരിഷ്ക്കാരങ്ങളും കാണാനായേക്കും. എസ്‌യുവികളുടെ ഇ: സീരീസ് കൂടാതെ, ഇ:എൻ കൂപ്പെ, ഇ:എൻ എസ്‌യുവി, ഇ:എൻ ജിടി എന്നിവയും ഹോണ്ട നേരത്തെ പ്രദർശിപ്പിച്ചിരുന്നു. അവ അടുത്ത അഞ്ച് വർഷത്തിനുള്ളിൽ പ്രൊഡക്ഷൻ കാറുകൾക്ക് അടിസ്ഥാനമായി ഉപയോഗിക്കാനാണ് പദ്ധതിയിടുന്നത്.

ഈ മെഷീനുകൾ e:NS1, e:NP1 എന്നിവയേക്കാൾ കൂടുതൽ ആക്രമണാത്മകവും ധീരവുമായ ഇലക്ട്രിക്-ഒൺലി സ്റ്റൈലിംഗാണ് കാണിക്കുന്നത്. ഇവയൊന്നും ഉടൻ നമ്മുടെ വിപണിയിലേക്ക് എത്താൻ സാധ്യയില്ല. ഇന്ത്യയിലെ ഏറ്റവും ഇന്ധനക്ഷമതയുള്ള പെട്രോൾ കാറായി മാറിയേക്കാവുന്ന സിറ്റി ഹൈബ്രിഡ് വരും മാസങ്ങളിൽ അവതരിപ്പിക്കാൻ ഹോണ്ട ഒരുങ്ങുകയാണ്.

അതിനെ തുടർന്ന് കമ്പനി ഇന്ത്യയെ കേന്ദ്രീകരിച്ചുള്ള ഒരു ഇടത്തരം എസ്‌യുവിയും കമ്പനി വികസിപ്പിക്കുന്നുണ്ട്. അത് 2023-ൽ ഇന്ത്യയിയിൽ അവതരിപ്പിക്കുമെന്നാണ് പ്രതീക്ഷിക്കുന്നത്. ഇത് സിറ്റിയുടെ പ്ലാറ്റ്‌ഫോമിനെ അടിസ്ഥാനമാക്കിയുള്ളതായിരിക്കും. മാത്രമല്ല കാറിൽ നിന്ന് അതിന്റെ എഞ്ചിൻ ഓപ്ഷനുകൾ കടമെടുക്കുകയും ചെയ്തേക്കും.