അരങ്ങേറ്റത്തിന് സജ്ജമായി, Kia EV6 ഇലക്‌ട്രിക് ക്രോസ്ഓവറിനായുള്ള ബുക്കിംഗ് മെയ് 26-ന് തുടങ്ങും

ഇന്ധന വില സർവകാല റെക്കോർഡും ഭേദിച്ച് മുന്നേറുമ്പോൾ ഇലക്ട്രിക് വാഹനങ്ങളിലേക്ക് ചേക്കേറാൻ നിർബന്ധിതരാവുന്ന സാഹചര്യത്തിലാണ് കിയയുടെ ഈ നീക്കം. ആഭ്യന്തര വിപണിയിൽ ആഢംബര ഇലക്ട്രിക് വാഹനങ്ങൾക്കു പോലും അതിഗംഭീര സ്വീകരണം ലഭിക്കുന്നതു വരെ കിയയ്ക്ക് ഊർജം നൽകും.

നേരത്തെ പുറത്തുവന്ന വാർത്തകൾ പ്രകാരം കിയ EV6 ഇലക്ട്രിക് ക്രോസ്ഓവർ അധികം വൈകാതെ തന്നെ വിപണിയിലെത്തും. ദക്ഷിണ കൊറിയൻ വാഹന നിർമാതാക്കൾ 2022 മെയ് 26-ന് വാഹനത്തിനായുള്ള ബുക്കിംഗ് ഇന്ത്യയിൽ ആരംഭിക്കുമെന്നതാണ് ഏറ്റവും പുതിയ റിപ്പോർട്ടുകൾ.

മാത്രമല്ല വാഹനത്തിനായുള്ള ഡെലിവറിയും കമ്പനി ഉടൻ ആരംഭിക്കുമെന്നുമാണ് സ്ഥിരീകരണം. കംപ്ലീറ്റ്ലി ബിൽറ്റ് യൂണിറ്റ് (CBU) റൂട്ടിലൂടെയാണ് കിയ EV6 ഇലക്ട്രിക് ക്രോസ്ഓവർ ഇന്ത്യയിലെത്തുന്നത്. പൂർണ ഇറക്കുമതി മോഡലായതിനാൽ 50 ലക്ഷം രൂപയ്ക്ക് മുകളിലായിരിക്കും ഇതിന്റെ വില.

ഒരുപക്ഷേ ഫുള്ളി-ലോഡഡ്‌ വേരിയന്റിൽ മാത്രമായിരിക്കും പ്രീമിയം വാഹനത്തെ ബ്രാൻഡ് പരിചയപ്പെടുത്തുക. എന്നിരുന്നാലും കിയ EV6 ഇലക്ട്രിക് ക്രോസ്ഓവർ പരിമിതമായ സംഖ്യകളിൽ മാത്രമായിരിക്കും വിൽപ്പനയ്ക്ക് എത്തുക. കാരണം വിപണിയിലെ പ്രതികരണം എങ്ങനെയായിരിക്കുമെന്ന് അറിയാൻ കമ്പനിക്ക് താത്പര്യമുണ്ടാവും.

ആദ്യ വർഷത്തേക്ക് 100 യൂണിറ്റുകൾ മാത്രമേ കിയ അനുവദിച്ചിട്ടുള്ളൂവെന്നാണ് സൂചന. അവതരണത്തിനു മുന്നോടിയായി അടുത്തിടെ EV6 ഇവിക്കായുള്ള പരീക്ഷണയോട്ടം ബ്രാൻഡ് ഹൈദരാബാദിൽ ആരംഭിക്കുകയും ചെയ്‌തിട്ടുണ്ട്. ബുക്കിംഗ് മെയ് മാസത്തോടെ ആരംഭിക്കുമെങ്കിലും ഉത്സവ സീസണോടു കൂടി മാത്രമായിരിക്കും വാഹനം ചിലപ്പോൾ ഉപഭോക്താക്കൾക്ക് കൈമാറുകയെന്നാണ് സൂചന.

മറ്റ് സവിശേഷതകളെ സംബന്ധിച്ചിടത്തോളം കിയ EV6 ഇലക്ട്രിക് ക്രോസ്ഓവർ 320 bhp കരുത്തും 605 Nm torque ഉം നൽകുന്ന 77.4 kWh ബാറ്ററിയുമായി ജോടിയാക്കിയ ഡ്യുവൽ e-AWD സംവിധാനമുള്ള GT ലൈൻ വേരിയന്റിലാണ് വാഗ്ദാനം ചെയ്യുന്നത്. ഇതിലൂടെ ഒറ്റ ചാർജിൽ ഏകദേശം 425 കിലോമീറ്റർ റേഞ്ച് വാഗ്‌ദാനം ചെയ്യാൻ ഇവിയ്ക്ക് സാധിക്കുമെന്നാണ് റിപ്പോർട്ടുകൾ.

രണ്ട് കോൺഫിഗറേഷനുകളിലായി ഒരു ചെറിയ, 58kWh ബാറ്ററി പായ്ക്കും കിയ EV6 ഇലക്ട്രിക്കിൽ വാഗ്‌ദാനം ചെയ്യുന്നുണ്ട്. 168 bhp ഉള്ള ഒരു റിയർ-വീൽ-ഡ്രൈവ് (RWD) സജ്ജീകരണം, അല്ലെങ്കിൽ 235 bhp നൽകുന്ന ഡ്യുവൽ-മോട്ടോർ സജ്ജീകരണമുള്ള ഓൾ-വീൽ-ഡ്രൈവ് ലേഔട്ടിലാണ് ഇത് സജ്ജീകരിച്ചിരിക്കുന്നത്.

ഇത് ആദ്യഘട്ടത്തിൽ ഇന്ത്യയിൽ എത്തില്ലെങ്കിലും വാഹനത്തിന് ലഭിക്കുന്ന പ്രതികരണം കണക്കിലെടുത്തതിന് ശേഷം പിന്നീടുള്ള ഘട്ടത്തിൽ കിയ ഇത് ഇന്ത്യൻ വിപണിയിൽ അവതരിപ്പിക്കുമെന്ന് തന്നെയാണ് പ്രതീക്ഷിക്കുന്നത്.

വിദേശ വിപണിയിൽ മികച്ച സ്വീകാര്യത ലഭിച്ച കിയ EV6 ഈ വർഷത്തെ (2021) യൂറോപ്യൻ കാർ ഓഫ് ദി ഇയർ അവാർഡും സ്വന്തമാക്കിയിരുന്നു. ദക്ഷിണ കൊറിയൻ വാഹന നിർമാതാക്കളുടെ ആദ്യത്തെ സമർപ്പിത ഇലക്ട്രിക് വാഹനമാണ് ക്രോസ്ഓവർ ശൈലിയിൽ ഒരുങ്ങിയിരിക്കുന്ന EV6.

ഇ-ജിഎംപി എന്നറിയപ്പെടുന്ന ഇലക്‌ട്രിക്-ഗ്ലോബൽ മോഡുലാർ പ്ലാറ്റ്‌ഫോമിനെ അടിസ്ഥാനമാക്കിയാണ് വാഹനം നിർമിച്ചിരിക്കുന്നത്. ഡിസൈനിന്റെ കാര്യത്തിലേക്ക് നോക്കിയാൽ ബ്രാൻഡിന്റെ ഏറ്റവും പുതിയ ഓപ്പോസിറ്റ്സ് യുണൈറ്റഡ് ഡിസൈൻ ഫിലോസഫിയെ അടിസ്ഥാനമാക്കിയാണ് കിയ EV6 ഇലക്‌ട്രിക് ഒരുങ്ങിയിരിക്കുന്നത്.

ഒരു ക്ലാംഷെൽ ബോണറ്റ്, ഷോർട്ട് ഓവർഹാംഗുകൾ, മിനുസമാർന്ന എൽഇഡി ഹെഡ്‌ലൈറ്റുകൾ, 'ഡിജിറ്റൽ ടൈഗർ ഫെയ്‌സ്' പൂരകമാകുന്ന ബൂമറാംഗ് ആകൃതിയിലുള്ള എൽഇഡി ഡേടൈം റണ്ണിംഗ് ലൈറ്റുകൾ എന്നിവയാണ് ഇലക്ട്രിക് ക്രോസ്ഓവറിലെ ഡിസൈൻ ഹൈലൈറ്റുകൾ.

ഇതോടൊപ്പം മുൻവശത്തെ വിൻഡ്‌ഷീൽഡ്, ഉയർന്ന വീൽബാക്ക് -മൌണ്ട് ചെയ്ത സ്റ്റോപ്പ് ലാമ്പ്, ചരിഞ്ഞ സി-പില്ലറുകൾ, വീതിയിൽ പ്രവർത്തിക്കുന്ന എൽഇഡി ടെയിൽ ലൈറ്റ് ബാർ, ടു-ടോൺ അലോയ് വീലുകൾ തുടങ്ങിയ സജ്ജീകരണങ്ങളും ഇവിയുടെ ഏറ്റവും വലിയ പ്രത്യേകതകളാണ്.

ഇനി ഇന്റീരിയറിലേക്ക് നോക്കിയാൽ ടു സ്‌പോക്ക് സ്റ്റിയറിംഗ് വീൽ, റീസൈക്കിൾ ചെയ്‌ത പ്ലാസ്റ്റിക് ഘടകങ്ങൾ, ഡ്യുവൽ-ടോൺ നിറം, ഡ്രൈവർ ഫോക്കസ്‌ഡ് ഡിജിറ്റൽ ഇൻസ്ട്രുമെന്റ് ക്ലസ്റ്റർ, എസി കൺട്രോളുകൾക്കായി ഹാപ്‌റ്റിക് ഫീഡ്‌ബാക്ക് ഉള്ള ടച്ച്‌സ്‌ക്രീൻ ബട്ടണുകൾ, ഓഗ്‌മെന്റഡ് റിയാലിറ്റി, ഡ്രൈവർ അസിസ്റ്റ് എന്നീ സവിശേഷതകളാണ് ഇലക്‌ട്രിക് ക്രോസ്ഓവറിൽ ലഭ്യമാവുന്നത്.

350 kW ഫാസ്റ്റ് ചാർജർ ഉപയോഗിച്ച് വെറും 18 മിനിറ്റിനുള്ളിൽ 80 ശതമാനം വരെ ചാർജ് ചെയ്യാൻ കിയ EV6 പ്രാപ്‌തമായിരിക്കും. e-GMP പ്ലാറ്റ്ഫോമാണ് ഈ ഫാസ്റ്റ് ചാർജിംഗ് സംവിധാനത്തിന് കാരണമാവുന്നത്. ഇതിനുപുറമെ കിയ EV6 സ്റ്റാൻഡേർഡ് 800V ചാർജിംഗ് ശേഷിയും വാഗ്ദാനം ചെയ്യുന്നുണ്ട്.

2026-ഓടെ 11 പുതിയ BEV മോഡലുകൾ - E-GMP ആർക്കിടെക്ചറിൽ നിർമ്മിച്ച ഏഴ് മോഡലുകളും നിലവിലുള്ള മോഡലുകളെ അടിസ്ഥാനമാക്കിയുള്ള നാല് ഡെറിവേറ്റീവ് EV-കളുമായി Kia അതിന്റെ EV ലൈനപ്പ് ശക്തിപ്പെടുത്താൻ പദ്ധതിയിടുന്നു. എന്നിരുന്നാലും, ഇന്ത്യൻ വിപണിയിൽ ഇത്തരമൊരു പ്ലാനൊന്നും കമ്പനി ഇതുവരെ സ്ഥിരീകരിച്ചിട്ടില്ല.