മൈലേജിന്റെ കാര്യത്തിലും കേമനാണ് പുത്തൻ XL6, ഇന്ധനക്ഷമത കണക്കുകളുമായി Maruti Suzuki

പോയ വർഷങ്ങളിൽ കാര്യമായി പുതിയ മോഡലുകളൊന്നും തന്നെ അവതരിപ്പിക്കാതിരുന്ന രാജ്യത്തെ ഏറ്റവും വലിയ വാഹന നിർമാതാക്കളായ മാരുതി സുസുക്കി 2022-ൽ കാര്യങ്ങളെല്ലാം മാറ്റിപ്പിടിച്ചിരിക്കുകയാണ്. അടിമുടി പരിഷ്ക്കാരങ്ങളുമായി കമ്പനിയുടെ കാറുകളെല്ലാം കളംനിറയുകയാണ്.

പുതിയ പരിഷ്ക്കാരങ്ങളുടെ ഭാഗമായി ആദ്യം ബലേനോ പ്രീമിയം ഹാച്ച്ബാക്കാണ് എത്തിയത്. പിന്നീട് ജനപ്രിയമായ എർട്ടിഗയും നിരത്തുകളെ കീഴടക്കാൻ മുഖംമിനുക്കിയെത്തി. അതിനു പിന്നാലെ എർട്ടിഗയുടെ 6 സീറ്റർ പ്രീമിയം വകഭേദമായ XL6 ഉം ഫെയ്‌സ്‌ലിഫ്റ്റോടെ കഴിഞ്ഞ ആഴ്ച്ച വിപണിയിൽ എത്തി.

വാഹനം മാറ്റങ്ങളോടെ നിരത്തിലെത്തിയപ്പോഴാണ് XL6-ന് ഇത്രയും ആരാധകവൃന്ദമുണ്ടെന്ന് വിപണി മനസിലാക്കിയത്. ഗംഭീര സ്വീകരണമാണ് പുത്തൻ എംപിവിക്ക് ലഭിച്ചുകൊണ്ടിരിക്കുന്നതെന്നാണ് വിവരം. പുതിയ XL6 ഫെയ്‌സ്‌ലിഫ്റ്റിനായി ഇതുവരെ 3600 ലധികം ബുക്കിംഗുകൾ ലഭിച്ചതായാണ് റിപ്പോർട്ട്. അതായത് പ്രതിദിനം ശരാശരി 325 ബുക്കിംഗുകൾ ലഭിക്കുന്നുണ്ടെന്ന് സാരം.

ഏപ്രിൽ 11-ന് 11,000 രൂപ ടോക്കൺ തുകയ്ക്കാണ് പുതിയ XL6 ഫെയ്‌സ്‌ലിഫ്റ്റിനായി മാരുതി സുസുക്കി പ്രീ-ബുക്കിംഗ് ആരംഭിച്ചത്. എന്തായാലും ഹിറ്റായ സാഹചര്യത്തിൽ മോഡലിനായുള്ള ഡെിവറിയും കമ്പനി ഉടൻ തുടങ്ങും. അതിനു മുന്നോടിയായി വാഹനത്തിന്റെ മൈലേജ് കണക്കുകൾ പുറത്തുവിട്ടിരിക്കുകയാണ് ബ്രാൻഡ്.

102 bhp കരുത്തിൽ 137 Nm torque ഉത്പാദിപ്പിക്കുന്ന പുതിയ 1.5 ലിറ്റർ, ഡ്യുവൽജെറ്റ്, ഡ്യുവൽ VVT, K12C പെട്രോൾ എഞ്ചിനാണ് 2022 മാരുതി സുസുക്കി XL6 എംപിവിയിൽ തുടിക്കുന്നത്. ഈ എഞ്ചിൻ അഞ്ച് സ്പീഡ് മാനുവൽ അല്ലെങ്കിൽ ആറ് സ്പീഡ് ടോർക്ക് കൺവെർട്ടർ ഓട്ടോമാറ്റിക് ഗിയർബോക്‌സ് ഓപ്ഷനിൽ ഉപഭോക്താക്കൾക്ക് യഥേഷ്‌ടം തെരഞ്ഞെടുക്കാം.

പുതിയ XL6 ഫെയ്‌സ്‌ലിഫ്റ്റ് മാനുവൽ, ഓട്ടോമാറ്റിക് വേരിയന്റുകളിൽ യഥാക്രമം 20.97 കിലോമീറ്റർ, 20.27 കിലോമീറ്റർ ഇന്ധനക്ഷമത നൽകുമെന്നാണ് മാരുതി സുസുക്കി അവകാശപ്പെടുന്നത്. മോഡൽ സീറ്റ, ആൽഫ, ആൽഫ പ്ലസ് എന്നിവയുൾപ്പെടെ മൂന്ന് വേരിയന്റുകളിൽ ലഭ്യമാണ്. ഇവയെ പല വകഭേദങ്ങളായി കമ്പനി തിരിച്ചിട്ടുമുണ്ട്.

ഡ്യുവൽജെറ്റ് സാങ്കേതികവിദ്യയുള്ള 1.5 ലിറ്റർ പെട്രോൾ എഞ്ചിനും പുതിയ 6 സ്പീഡ് ടോർക്ക് കൺവെർട്ടർ ഓട്ടോമാറ്റിക് ഗിയർബോക്‌സുമായി ജോടിയാക്കിയ എഞ്ചിനിൽ മാരുതി സുസുക്കി മൈൽഡ്-ഹൈബ്രിഡ് സിസ്റ്റവും കോർത്തിണക്കിയിട്ടുണ്ട്. ബ്രാൻഡിന്റെ സബ്‌സ്‌ക്രിപ്ഷൻ പദ്ധതി വഴി 24,599 രൂപ പ്രതിമാസ സബ്‌സ്‌ക്രിപ്‌ഷൻ ഫീസായി നൽകിയും പുതിയ XL6 സ്വന്തമാക്കാം.

XL6 ഫെയ്‌സ്‌ലിഫ്റ്റ് മാനുവൽ വകഭേദങ്ങൾക്ക് വില 11.29 ലക്ഷം മുതൽ 13.05 ലക്ഷം രൂപ വരെയും ഓട്ടോമാറ്റിക് വേരിയന്റുകൾക്ക് 12.79 ലക്ഷം മുതൽ 14.55 ലക്ഷം രൂപ വരെയുമാണ് ഇന്ത്യയിലെ എക്സ്ഷോറൂം വില.

എർട്ടിഗയ്ക്ക് കൂടുതൽ പ്രീമിയം ബദലായി സ്ഥാനം പിടിച്ചിരിക്കുന്ന, XL6-ലെ കോസ്‌മെറ്റിക് നവീകരണങ്ങളിൽ കൂടുതൽ ക്രോം ഉള്ള ചെറുതായി പുതുക്കിയ ഗ്രില്ലും ടെയിൽ ഗേറ്റിൽ പുതിയ ക്രോം ബാറും പുതിയ 16 ഇഞ്ച് ഡ്യുവൽ-ടോൺ അലോയ് വീലുകളുമാണ് ഉൾപ്പെടുന്നത്.

പുതിയ എർട്ടിഗ പോലെ തന്നെ കോസ്‌മെറ്റിക് പരിഷ്ക്കാരങ്ങൾ വളരെ കുറച്ച് മാത്രമേ നടപ്പിലാക്കിയിട്ടുള്ളൂ. വാഹനത്തിന് പുത്തൻ ഡ്യുവൽ-ടോൺ കളർ ഓപ്ഷനുകളും മാരുതി സമ്മാനിച്ചിട്ടുണ്ട്. റെഡ്, സിൽവർ, ഖാക്കി ഷേഡുകളിൽ കറുത്ത റൂഫുകളുള്ള ഡ്യുവൽ-ടോൺ നിറങ്ങളാണ് ലിസ്റ്റിലുള്ളത്.

ഇതിനു പുറമെ ആർട്ടിക് വൈറ്റ്, സ്‌പ്ലെൻഡിഡ് സിൽവർ, ഗ്രാൻഡിയർ ഗ്രേ, ബ്രേവ് കാക്കി, ഒപുലന്റ് റെഡ്, സെലസ്റ്റിയൽ ബ്ലൂ എന്നിങ്ങനെ ആറ് സിംഗിൾ-ടോൺ കളർ ഓപ്ഷനുകളിലും XL6 ഫെയ്‌സ്‌ലിഫ്റ്റ് സ്വന്തമാക്കാം. വാഹനത്തിൽ നാല് എയർബാഗുകൾ സ്റ്റാൻഡേർഡ്, 360-ഡിഗ്രി പാർക്കിംഗ് ക്യാമറ, ടോപ്പ് വേരിയന്റിൽ, മാരുതിയുടെ നവീകരിച്ച സ്മാർട്ട്‌പ്ലേ പ്രോ ഇൻഫോടെയ്ൻമെന്റ് സിസ്റ്റം 7 ഇഞ്ച് ടച്ച്‌സ്‌ക്രീനിലൂടെ പ്രവർത്തിക്കുന്ന സംവിധാനം എന്നിവയും സജ്ജീകരിച്ചിട്ടുണ്ട്.

വോയ്‌സ് അസിസ്റ്റന്റ് ഫംഗ്‌ഷനുകൾ വാഗ്ദാനം ചെയ്യുന്ന സുസുക്കി കണക്റ്റ് എന്ന കണക്റ്റഡ് കാർ ഫീച്ചറുകളും 2022 മോഡൽ XL6-ൽ കമ്പനി കോർത്തിണക്കിയിട്ടുണ്ട്. അതോടൊപ്പം തന്നെ വെൻറിലേറ്റഡ് ഫ്രണ്ട് സീറ്റുകളാണ് മറ്റൊരു സ്വാഗതാർഹമായ കൂട്ടിച്ചേർക്കൽ. അത് നമ്മുടെ കാലാവസ്ഥയിൽ തീർത്തും യോഗ്യമായ ഒരു സവിശേഷതയാണ്.

സ്റ്റിയറിംഗ് വീലിനുള്ള പുതിയ ടെലിസ്‌കോപ്പിക് ക്രമീകരണം, പുതിയ ആംബിയന്റ് ഫുട്‌വെൽ ലൈറ്റിംഗ്, പുതിയ ഫ്രണ്ട് ഡോർ ലാമ്പുകൾ, ഫുൾ-എൽഇഡി ഹെഡ്‌ലാമ്പുകൾ, രണ്ടാം നിര ക്യാപ്റ്റൻ സീറ്റുകൾ, ഓട്ടോമാറ്റിക് എസി, കൂൾഡ് കപ്പ് ഹോൾഡറുകൾ, പുതിയ ടയർ പ്രഷർ മോണിറ്ററിംഗ് സിസ്റ്റം, ഇഎസ്പി, ഹിൽ ഹോൾഡ് അസിസ്റ്റ് എന്നിവയാണ് വാഹനത്തിന്റെ മറ്റു പ്രത്യേകതകൾ.