പുത്തൻ Maruti Suzuki WagonR ഫെയ്‌സ്‌ലിഫ്റ്റ്; വേരിയന്റ്, വില വിശദാംശങ്ങൾ അറിയാം

Published: Tuesday, March 1, 2022, 12:36 [IST]

ഒരു ജോടി പുതിയ എഞ്ചിനുകളും ഫീച്ചറുകളും ലുക്കിൽ അൽപം നവീകരണങ്ങളുമായി ജനപ്രിയ ഫാമിലി കാറായ വാഗൺആറിനെ മാരുതി സുസുക്കി അടുത്തിടെ ഒന്നു പരിഷ്ക്കരിച്ചു. ഫാക്ടറി ഫിറ്റഡ് സിഎൻജി കിറ്റ് പോലും കൂടുതൽ വേരിയന്റുകളിൽ ലഭ്യമാക്കിയതും ശ്രദ്ധേയമാണ്.

പുത്തൻ Maruti Suzuki WagonR ഫെയ്‌സ്‌ലിഫ്റ്റ്; വേരിയന്റ്, വില വിശദാംശങ്ങൾ അറിയാം

വിലയുടെ കാര്യത്തിലും കമ്പനി ചെറിയ വർധവവ് നടപ്പിലാക്കിയിട്ടുണ്ട്. 2022 മാരുതി സുസുക്കി വാഗൺആറിന്റെ എക്സ്ഷോറൂം വില ഇപ്പോൾ 5.40 ലക്ഷം മുതൽ 7.10 ലക്ഷം വരെയാണ്.

വാഗൺആറിന്റെ ഓരോ വേരിയന്റിലും ലഭ്യമായ വേരിയന്റ് ലൈനപ്പും എഞ്ചിൻ ഓപ്ഷനുകളും പുനഃക്രമീകരിക്കാനും മാരുതി സുസുക്കി ഈ അവസരം ഉപയോഗിച്ചുവെന്നതാണ് മറ്റൊരു ശ്രദ്ധേയമായ കാര്യം. പുതിയ വാഗൺആറിനൊപ്പം ലഭ്യമായ വേരിയന്റ് തിരിച്ചുള്ള സവിശേഷതകളും എഞ്ചിൻ ഓപ്ഷനുകളും ഒന്നു പരിചയപ്പെട്ടാലോ?

പുതിയ വാഗൺആറിന്റെ ഏറ്റവും വലിയ പുതുമ സെലേറിയോയിൽ നിന്നും പുതിയ ബലേനോയിൽ നിന്നും ലഭിച്ച ഒരു ജോടി പുതിയ എഞ്ചിനുകളാണ്. വാഗൺആറിന്റെ 68 bhp പവറുണ്ടായിരുന്ന 1.0 ലിറ്റർ K10B എഞ്ചിന് പകരം പുതിയ 67 bhp കരുത്തുള്ള 1.0 ലിറ്റർ K10C ഡ്യുവൽജെറ്റ് എഞ്ചിൻ സെലേറിയോയിൽ നിന്നും ഫാമിലി ഹാച്ചിലേക്ക് മാരുതി സിസുക്കി കടമെടുത്തു.

അതുപോലെ വലിയ 83 bhp കരുത്തുള്ള 1.2 ലിറ്റർ K12M എഞ്ചിന് പകരം 90 bhp ശേഷിയുള്ള 1.2 ലിറ്റർ K12N എഞ്ചിൻ പുതിയ ബലേനോ, സ്വിഫ്റ്റ്, ഡിസയർ എന്നിവയിൽ നിന്നുമാണ് പുതിയ 2022 മോഡൽ വാഗൺആറിലേക്കും വിപുലീകരിച്ചിരിക്കുന്നത്. രണ്ട് എഞ്ചിനുകളും 5 സ്പീഡ് മാനുവലും എഎംടി ഗിയർബോക്‌സും വാഗ്ദാനം ചെയ്യുന്നത് തുടരുന്നു.

ഫാക്ടറി ഫിറ്റഡ് സിഎൻജി കിറ്റും വാഗൺആറിൽ മാരുതി സുസുക്കി നിലനിർത്തിയിട്ടുണ്ട്. കാറിന് പുതിയ ZXi+ ടോപ്പ് വേരിയന്റ് ഇപ്പോൾ അവതരിപ്പിച്ചിട്ടുണ്ട് കമ്പനി. കൂടാതെ VXi പതിപ്പിൽ ഇപ്പോൾ ഫാക്ടറി ഫിറ്റഡ് സിഎൻജി കിറ്റുമായി വരുന്നതോടൊപ്പം പുതിയ ഐഡിൽ സ്റ്റാർട്ട്/സ്റ്റോപ്പ്, ഹിൽ-ഹോൾഡ് കൺട്രോൾ എന്നിവയും വാഹനത്തിലേക്ക് കൂട്ടിച്ചേർത്തിട്ടുണ്ട്.

തീർച്ചയായും പുത്തൻ മോഡൽ രാജ്യത്ത് നടപ്പിലാക്കാൻ ഒരുങ്ങുന്ന CAFE 2 മാനദണ്ഡങ്ങൾക്കനുസൃതമായാണ് വരുന്നത്. അതിനാൽ വാഗൺആർ കർശനമായ മലിനീകരണ മാനദണ്ഡങ്ങൾ പാലിക്കേണ്ടതും മികച്ച ഇന്ധന സമ്പദ്‌വ്യവസ്ഥ തിരികെ നൽകേണ്ടതും അത്യാവിശ്യമാണ്. ഡ്യുവൽ ജെറ്റ്, ഡ്യുവൽ വിവിടി (വേരിയബിൾ വാൽവ് ടൈമിംഗ്), കൂൾഡ് ഇജിആർ (എക്‌സ്‌ഹോസ്റ്റ് ഗ്യാസ് റീസർക്കുലേഷൻ), ഐഎസ്‌എസ് (ഐഡിൽ സ്റ്റാർട്ട്-സ്റ്റോപ്പ്) ടെക്‌നോളജി തുടങ്ങിയ ഫീച്ചറുകൾ രണ്ട് എഞ്ചിനുകളിലും ഒരേ നേട്ടം കൈവരിക്കാൻ സഹായിക്കും.

വാഗൺആറിന്റെ വേരിയന്റ് ലൈനപ്പ് പരിഷ്ക്കരിക്കാൻ മാരുതി സുസുക്കിയും ഈ അവസരം ഉപയോഗിച്ചു. മുമ്പ്, LXi, VXi, ZXi എന്നീ മൂന്ന് വകഭേദങ്ങളിൽ വാഗൺആർ വാഗ്ദാനം ചെയ്തിരുന്നു. വേരിയന്റുകളിൽ രണ്ടാമത്തേതിൽ എഎംടി ഗിയർബോക്സും ഒരു ഓപ്ഷനായി ലഭിക്കുന്നു. അതേസമയം 1.2 ലിറ്റർ K12M എഞ്ചിൻ VXi, ZXi വേരിയന്റുകളിലാണ് എത്തുന്നത്.

രണ്ടിലും ബ്രാൻഡ് എഎംടി ഗിയർബോക്‌സ് ഓപ്ഷനുകൾ നൽകിയിരുന്നു. അടിസ്ഥാന LXi വേരിയന്റിൽ മാത്രമാണ് നേരത്തെ സിഎൻജി കിറ്റ് വാഗ്ദാനം ചെയ്തത്. പുതിയ വാഗൺആറിലേക്ക് വരുമ്പോൾ മാരുതി സുസുക്കി ഇപ്പോൾ ഇത് നാല് വേരിയന്റുകളിൽ വാഗ്ദാനം ചെയ്യുന്നു.

അതിൽ LXi, VXi, ZXi, ഒരു പുതിയ ZXi+ വേരിയന്റ് എന്നിവയാണ് ഇപ്പോൾ തെരഞ്ഞെടുക്കാൻ സാധിക്കുന്നത്. LXi, VXi വേരിയന്റുകളിൽ പുതിയ 1.0 ലിറ്റർ K10C എഞ്ചിൻ മാരുതി സുസുക്കി വാഗ്ദാനം ചെയ്യുന്നു. 1.2 ലിറ്റർ K10N എഞ്ചിൻ ഇപ്പോൾ ZXi, ZXi+ വേരിയന്റുകളിൽ ലഭ്യമാണ്. കൂടാതെ 1.0 ലിറ്റർ എഞ്ചിൻ ഉള്ള സിഎൻജി കിറ്റ് ഇപ്പോൾ മിഡ് VXi വേരിയന്റിലും ലഭ്യമാണ്.