പോളോയ്ക്കും വെന്റോയ്ക്കും വിട! Virtus പ്രീമിയം സെഡാനായുള്ള നിർമാണം ആരംഭിച്ച് Volkswagen ഇന്ത്യ

സ്ലാവിയ, കുഷാഖ്, ടൈഗൂൺ എന്നിവയുൾപ്പെടെയുള്ള സ്കോഡ, ഫോക്‌സ്‌വാഗൺ കാറുകളുടെ നിലവിലെ തലമുറ മോഡലുകൾക്ക് അടിവരയിടുന്ന അതേ MQB A0 IN പ്ലാറ്റ്ഫോമിനെ അടിസ്ഥാനമാക്കിയാണ് പുതിയ വെർട്ടീസ് സെഡാനും ഒരുങ്ങുന്നത്. 95 ശതമാനം പ്രാദേശികവൽക്കരണത്തോടെയാണ് പ്രീമിയം സി-സെഗ്മെന്റ് സെഡാൻ തയാറാക്കുന്നത്.

നിർമാണം ആരംഭിച്ചതിനാൽ ഈ വർഷം മെയ് മാസത്തോടെ വെർട്ടീസ് വിൽപ്പനയ്‌ക്കെത്തും. രാജ്യത്തുടനീളമുള്ള എല്ലാ ഫോക്‌സ്‌വാഗൺ ഡീലർഷിപ്പുകളിലും കമ്പനിയുടെ ഔദ്യോഗിക വെബ്‌സൈറ്റിലും മോഡലിനായുള്ള ബുക്കിംഗും ജർമൻ ബ്രാൻഡ് ആരംഭിച്ചു കഴിഞ്ഞിട്ടുണ്ട്. ഇന്നാണ് പൂനെയ്ക്കടുത്തുള്ള ചകാൻ പ്ലാന്റിൽ വെർട്ടിസിനായുള്ള ഉത്പാദനം ഔദ്യോഗികമായി ആരംഭിച്ചത്.

പുതിയ വെർട്ടീസിന്റെ ഉത്പാദനം ആരംഭിച്ചതോടെ ഫോക്‌സ്‌വാഗൺ ബ്രാൻഡിന് കീഴിലുള്ള വിപണിയിൽ MQB A0 IN പ്ലാറ്റ്‌ഫോമിനെ അടിസ്ഥാനമാക്കി ഇന്ത്യ 2.0 പ്രോജക്റ്റിന് കീഴിൽ രണ്ട് പുതിയ ഉൽപ്പന്നങ്ങൾ അവതരിപ്പിക്കാനുള്ള തങ്ങളുടെ പ്രതിജ്ഞാബദ്ധത വിജയകരമായി പൂർത്തിയാക്കിയതായി സ്‌കോഡ ഓട്ടോ ഫോക്‌സ്‌വാഗൺ ഇന്ത്യ പ്രൈവറ്റ് ലിമിറ്റഡ് മാനേജിംഗ് ഡയറക്ടർ പിയൂഷ് അറോറ പറഞ്ഞു.

വെർട്ടീസ് നിർമാണത്തിലേക്ക് പ്രവേശിക്കുന്നതോടെ വെന്റോയുടെയും പോളോയുടെയും നിർമാണവും ഫോക്‌സ്‌വാഗൺ അവസാനിപ്പിക്കും. ഡൈനാമിക്, പെർഫോമൻസ് എന്നിങ്ങനെ രണ്ട് വ്യത്യസ്‌ത വേരിയന്റ് ലൈനുകളിൽ വെർട്ടീസ് സെഡാൻ ലഭ്യമാകും. പെർഫോമൻസ് ലൈനിന് കീഴിൽ ഒരു സോളിറ്ററി GT വേരിയന്റിൽ മാത്രമേ വാഹനം വാഗ്‌ദാനം ചെയ്യപ്പെടുകയുള്ളൂ.

ഇന്ത്യയിൽ വിൽപ്പനയ്ക്ക് എത്തുന്നതോടെ സ്ലാവിയ, ഹോണ്ട സിറ്റി, ഹ്യുണ്ടായി വേർണ എന്നിവയുമായി ഫോക്‌സ്‌വാഗൺ വെർട്ടിസ് മാറ്റുരയ്ക്കുക. എന്നാൽ ഇരട്ട മോഡലായ സ്കോഡ സ്ലാവിയയുടെ അനുബന്ധ വകഭേദങ്ങളേക്കാൾ 30,000 രൂപ വരെ കൂടുതലായിരിക്കും വെർട്ടീസിന് മുടക്കേണ്ടി വരികയെന്നാണ് അനുമാനം.

വെന്റോയുടെ പകരക്കാരനായി എത്തുന്ന വെർട്ടീസിന്റെ ജിടി വേരിയന്റ് ഒരു ഓട്ടോമാറ്റിക് ഗിയർബോക്‌സ് ഓപ്ഷനിൽ മാത്രമേ ലഭ്യമാകൂ. അതായത് മാനുവൽ ഓപ്ഷൻ സെഡാനിൽ ഉണ്ടായിരിക്കില്ലെന്ന് സാരം. 148 bhp കരുത്തിൽ 250 Nm torque പുറപ്പെടുവിക്കുന്ന 1.5 ലിറ്റർ TSI ടർബോ പെട്രോൾ EVO എഞ്ചിനാണ് വെർട്ടീസ് ജിടിയ്ക്ക് തുടിപ്പേകുന്നത്. ഈ എഞ്ചിൻ സ്റ്റാൻഡേർഡായി 7 സ്പീഡ് ഡിസി‌ജി ഓട്ടോമാറ്റിക് ഗിയർബോക്സുമായി ഘടിപ്പിക്കുകയും ചെയ്യും.

വെർട്ടീസിലെ 1.5 ലിറ്റർ ടർബോ പെട്രോൾ യൂണിറ്റിനൊപ്പം ഫോക്‌സ്‌വാഗൺ 6 സ്പീഡ് മാനുവൽ ഗിയർബോക്‌സ് വാഗ്ദാനം ചെയ്യുന്നില്ലെങ്കിലും മറുവശത്ത് സ്‌കോഡ 1.5 ലിറ്റർ പെട്രോൾ എഞ്ചിൻ 7 സ്പീഡ് ഡിഎസ്‌ജി കൂടാതെ സ്ലാവിയയിലും കുഷാഖിലും 6 സ്പീഡ് മാനുവൽ ഓപ്ഷനും വാഗ്ദാനം ചെയ്യുന്നുണ്ട്.

എന്നാൽ ടൈഗൂണിലെ 1.5 ലിറ്റർ യൂണിറ്റിനൊപ്പം 6 സ്പീഡ് മാനുവൽ ഗിയർബോക്സും ഫോക്‌സ്‌വാഗൺ വാഗ്ദാനം ചെയ്യുന്നുണ്ടെന്നത് കൗതുകകരമാണ്. എന്നാൽ ഓട്ടോമാറ്റിക് കാറുകൾക്ക് കൂടുതൽ ജനപ്രീതി ലഭിക്കുന്ന ഈ കാലഘട്ടത്തിൽ വെർട്ടീസുമായി വ്യത്യസ്തമായ സമീപനം സ്വീകരിക്കാൻ കമ്പനി തീരുമാനിച്ചത് ശ്രദ്ധേയമാണ്.

ഈ തീരുമാനത്തിന് പിന്നിലെ സാധ്യമായ മറ്റൊരു കാരണം സ്ലാവിയയ്ക്ക് ഒരു സ്പോർട്ടിയർ ബദലായി വെർട്ടീസ് ജിടിയെ സ്ഥാപിക്കുക എന്നതാണ്. ഇത് അതിന്റെ വില നിർണയത്തിലും പ്രതിഫലിക്കും. ഫോക്‌സ്‌വാഗൺ സെഡാന്റെ ജിടി വേരിയന്റ് മറ്റ് വേരിയന്റുകളിൽ നിന്ന് വ്യത്യസ്തമാക്കുന്ന ബാഹ്യ, ഇന്റീരിയർ ഹൈലൈറ്റുകളോടെയും വരും.

1.5 ലിറ്റർ TSI യൂണിറ്റിന് പുറമെ 1.0 ലിറ്റർ TSI ടർബോ പെട്രോൾ 3 സിലിണ്ടർ യൂണിറ്റും ഫോക്‌സ്‌വാഗൺ വാഗ്ദാനം ചെയ്യും, ഇത് കമ്പനിക്കായി വൻതോതിൽ വിൽപ്പന സൃഷ്ടിക്കുമെന്ന് പ്രതീക്ഷിക്കുന്നു. ഈ എഞ്ചിന് പരമാവധി 114 bhp പവറും 178 Nm torque ഉം ഉത്പാദിപ്പിക്കാനാവും. ഇതിന്റെ ഗിയർബോക്‌സ് ഓപ്ഷനുകളിൽ 6 സ്പീഡ് മാനുവലും 6 സ്പീഡ് ടോർഖ് കൺവെർട്ടർ ഓട്ടോമാറ്റിക് ഗിയർബോക്സും ഉൾപ്പെടും.

ഫീച്ചറുകളുടെ കാര്യത്തിൽ വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ, ഡിജിറ്റൽ ഇൻസ്ട്രുമെന്റ് കൺസോൾ, കണക്റ്റുചെയ്‌ത കാർ ടെക്, ഇലക്ട്രിക് സൺറൂഫ്, വയർലെസ് മൊബൈൽ ചാർജിംഗ് എന്നിവയും അതിലേറെയും സംവിധാനങ്ങൾ ഉപയോഗിച്ച് പ്രവർത്തനക്ഷമമാക്കിയ 10 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം പോലുള്ള ആധുനിക സവിശേഷകളാണ് ഫോക്‌സ്‌വാഗണ്‍ പുത്തൻ കാറിൽ നിറഞ്ഞിരിക്കുന്നത്.

ആറ് എയർബാഗുകൾ, പിൻ പാർക്കിംഗ് സെൻസറുകൾ, ടയർ പ്രഷർ മോണിറ്ററിംഗ് സിസ്റ്റം, ഇലക്ട്രോണിക് സ്റ്റെബിലിറ്റി കൺട്രോൾ, ഇബിഡി സഹിതമുള്ള എബിഎസ് എന്നിവ സുരക്ഷാ ഫീച്ചറുകളും ഫോക്‌സ്‌വാഗണ്‍ വെർട്ടീസിഫോക്‌സ്‌വാഗണ്‍ൽ വാഗ്ദാനം ചെയ്യും.