വോൾവോയുടെ ഇന്ത്യയിലെ ആദ്യത്തെ സമ്പൂർണ ഇലക്ട്രിക് കാർ, XC40 റീചാർജ് ഒക്ടോബറിൽ അവതരിപ്പിക്കും

ഇതുമനസിലാക്കിയ വോൾവോ കാർ ഇന്ത്യ തങ്ങളുടെ ആദ്യത്തെ സമ്പൂർണ ഇലക്ട്രിക് കാർ XC40 റീചാർജ് ഒക്ടോബറിൽ രാജ്യത്ത് അവതരിപ്പിക്കുമെന്ന് പ്രഖ്യാപിച്ചിരിക്കുകയാണ്. വാഹനത്തിന്റെ വിതരണവും അതേ മാസം തന്നെ ആരംഭിക്കുമെന്നാണ് സ്വീഡിഷ് നിർമാതാക്കൾ വ്യക്തമാക്കിയിരിക്കുന്നത്.

XC40 റീചാർജ് ഇലക്‌ട്രിക് മോഡലിനായുള്ള ബുക്കിംഗ് ജൂണിൽ ഇന്ത്യയിൽ ആരംഭിക്കും. ശരിക്കും പറഞ്ഞാൽ കമ്പനി കഴിഞ്ഞ വർഷം XC40 റീചാർജ് ഇവി രാജ്യത്ത് അവതരിപ്പിക്കേണ്ടതായിരുന്നു. എന്നാൽ സെമികണ്ടക്‌ടർ ചിപ്പുകളുടെ കുറവ് കാരണം എസ്‌യുവിയുടെ അവതരണം കമ്പനി മാറ്റിവെക്കുകയായിരുന്നു. മാര്‍ച്ചില്‍ മോഡലിനെ ബ്രാൻഡ് രാജ്യത്ത് പ്രദര്‍ശിപ്പിക്കുകയും ചെയ്‌തിരുന്നതാണ്.

ലോഞ്ച് ഉള്‍പ്പടെ ആദ്യ ബാച്ച് ഡെലിവറികള്‍ ഈ വര്‍ഷം ഒക്ടോബറില്‍ നടത്താന്‍ തീരുമാനിച്ചിരുന്നുവെങ്കിലും ചിപ്പ് പ്രതിസന്ധി രൂക്ഷമായതോടെയാണ് പദ്ധതി മാറ്റിവെച്ചത്. തുടർന്ന് സെമി കണ്ടക്ടര്‍ ചിപ്പുകളുടെ ആഗോള അഭാവം കമ്പനിക്ക് ഉല്‍പാദനവും വിക്ഷേപണവും പുനക്രമീകരിക്കേണ്ടിവന്നു.

2040 ഓടെ കാർബൺ ന്യൂട്രൽ ആകാൻ ലക്ഷ്യമിടുന്ന കമ്പനിയുടെ സുസ്ഥിര സംരംഭങ്ങളുടെ ഭാഗമാണ് വോൾവോ XC40 റീചാർജ് മോഡൽ. ഒറ്റ ചാർജിൽ 400 കിലോമീറ്ററിലധികം സഞ്ചരിക്കാൻ ഇലക്ട്രിക് മോഡലിന് സാധിക്കുമെന്നാണ് വോൾവോ അവകാശപ്പെടുന്നത്. 4.7 സെക്കൻഡിനുള്ളിൽ 100 കിലോമീറ്റർ വേഗത കൈവരിക്കാൻ കഴിവുള്ള എഞ്ചിന് കരുത്ത് പകരാൻ 78 kWh ബാറ്ററി പായ്ക്കിലാണ് ബ്രാൻഡ് ഉൾപ്പെടുത്തിയിരിക്കുന്നത്.

അതേസമയം ഇലക്ട്രിക് എസ്‌യുവിക്ക് മണിക്കൂറിൽ പരമാവധി 180 കിലോമീറ്റർ വേഗത കൈവരിക്കാനും കഴിയും. ഇന്ത്യയിൽ അവതരിപ്പിക്കുമ്പോൾ XC40 റീചാർജ് മെർസിഡീസ് EQC, ജാഗ്വർ ഐ-പേസ്, ഔഡി ഇ-ട്രോൺ എന്നിവയുൾപ്പെടെയുള്ള എതിരാളികളുമായാണ് കൊമ്പുകോർക്കുക.

തങ്ങളുടെ ആദ്യത്തെ ഇലക്ട്രിക് കാർ XC40 റീചാർജിന് ആഗോളതലത്തിൽ മികച്ച സ്വീകാര്യതയാണ് ലഭിച്ചിരിക്കുന്നത്. ഇന്ത്യയിലും ഇത് തന്നെയാണ് കമ്പനി പ്രതീക്ഷിക്കുന്നതെന്ന് വോൾവോ കാർ ഇന്ത്യയുടെ മാനേജിംഗ് ഡയറക്ടർ ജ്യോതി മൽഹോത്ര പറഞ്ഞു.

രാജ്യത്തെ എല്ലാ ഡീലർഷിപ്പുകളും ഗ്രീൻ ഡീലർഷിപ്പുകളാക്കാനുള്ള ശ്രമത്തിലാണ് വോൾവോ ഇപ്പോൾ. ഇലക്ട്രിക് വാഹനങ്ങളുടെ പുതിയ സാങ്കേതികവിദ്യയുമായി പരിചയപ്പെടുത്തുന്നതിനും ഉപഭോക്താക്കളുടെ കൃത്യമായ ആവശ്യകതകളോട് പ്രതികരിക്കുന്നതിനുമായി ഡീലർ വർക്ക്ഫോഴ്‌സിന്റെ നൈപുണ്യ നവീകരണം ഇത് ഏറ്റെടുക്കുന്നു.

2025 ആകുമ്പോഴേക്കും കമ്പനിയുടെ വാർഷിക വിൽപ്പനയുടെ 80 ശതമാനവും ഇലക്ട്രിക് കാറുകളായിരിക്കുമെന്ന് വോൾവോ കണക്കാക്കുന്നു. തുടർന്ന് മുന്നോട്ട് പോകുമ്പോൾ 2030-ഓടെ പൂർണമായും ഇലക്ട്രിക് കാറുകൾ മാത്രം വിൽക്കാനും ഹൈബ്രിഡുകൾ ഉൾപ്പെടെയുള്ള ആന്തരിക ജ്വലന എഞ്ചിൻ മോഡലുകൾ ഘട്ടംഘട്ടമായി അവസാനിപ്പിക്കാനും കമ്പനി ഉദ്ദേശിക്കുന്നു.

ഇത് വോൾവോയുടെ ആഗോള കാലാവസ്ഥാ പദ്ധതിയുമായി സമന്വയിപ്പിച്ചാകും മുന്നോട്ടുപോവുക. ഇത് ഓരോ കാറിനും ലൈഫ് സൈക്കിൾ കാർബൺ മലിനീകരണം സ്ഥിരമായി കുറയ്ക്കാൻ ലക്ഷ്യമിടുന്നു. പുതിയ വോള്‍വോ XC40 റീചാര്‍ജ് ഇലക്ട്രിക് എസ്‌യുവി പൂര്‍ണമായും നിര്‍മിച്ച യൂണിറ്റ് (CBU) വഴി ഇന്ത്യയിലേക്ക് ഇറക്കുമതി ചെയ്യാനാണ് തീരുമാനം.

വോൾവോയുടെ ബെല്‍ജിയത്തിലെ ജെന്റിലുള്ള ബ്രാന്‍ഡിന്റെ പ്ലാന്റിലാണ് വാഹനം നിര്‍മിക്കുന്നത്. ഇന്ത്യന്‍ വിപണിക്കായി ആസൂത്രണം ചെയ്ത നിരവധി ഉല്‍പ്പന്നങ്ങളില്‍ ആദ്യത്തേത് XC40 റീചാര്‍ജ് ആയിരിക്കുമെന്നും കമ്പനി വ്യക്തമാക്കുന്നുണ്ട്. ഇനി ഡിസൈനിലേക്ക് നോക്കിയാൽ ഇലക്‌ട്രിക് എസ്‌യുവി അതിന്റെ പെട്രോൾ എഞ്ചിൻ മോഡലുമായി വളരെയധികം സാമ്യമുള്ളതായിരിക്കും.

ഡിസൈനിലെ ചില മാറ്റങ്ങളും പ്രത്യേകം എടുത്തുപറയേണ്ടതാണ്. വൈദ്യുതീകരിച്ച പതിപ്പിലെ ഏറ്റവും ശ്രദ്ധേയമായ നവീകരണം പരമ്പരാഗത മെഷ് പോലുള്ള ഗ്രില്ലിന് പകരമായി പുതിയ സീൽ ചെയ്ത മുൻവശം ആയിരിക്കുമെന്നതാണ്. ഇതിന് മുന്നിൽ ഒരു 'റീചാർജ്' ബാഡ്‌ജിംഗും ലഭിക്കും. ഫ്യുവൽ ഫില്ലർ ക്യാപ്പിന്റെ അതേ സ്ഥലത്താണ് വാഹനത്തിന്റെ ബാറ്ററി ചാർജിംഗ് പോർട്ട് സ്ഥാപിച്ചിരിക്കുന്നത്.

ഏകദേശം 320 കിലോമീറ്റർ WLTP സർട്ടിഫൈഡ് റേഞ്ച് അവകാശപ്പെടുന്ന വോൾവോയ്‌ക്കൊപ്പം 907 കിലോഗ്രാം ടവിംഗ് കപ്പാസിറ്റിയും ഉള്ള ബാറ്ററി പായ്ക്ക് ഫ്ലോറിലാണ് വോൾവോ സ്ഥാപിച്ചിരിക്കുന്നത്. ഏകദേശം 40 മിനിറ്റിനുള്ളിൽ 10 ശതമാനം മുതൽ 80 ശതമാനം വരെ വേഗത്തിൽ ചാർജ് ചെയ്യാൻ കഴിയുന്ന 11kW എസി ചാർജർ വഴിയോ 150 kW DC ഫാസ്റ്റ് ചാർജർ വഴിയോ ബാറ്ററി ചാർജ് ചെയ്യാം.

ഇന്റീരിയറും അതിന്റെ പെട്രോൾ എഞ്ചിൻ വേരിയന്റിന് സമാനമാണ് ഡിസൈൻ. വാട്ടർ ബോട്ടിലുകൾ, ഫോണുകൾ, മറ്റ് നിക്ക്-നാക്കുകൾ എന്നിവയ്ക്ക് ആവശ്യമായ സംഭരണ ​​സ്ഥലങ്ങൾ ക്യാബിൻ നൽകുന്നു. ഫീച്ചറുകളുടെ കാര്യം വരുമ്പോൾ, ഇതിന് പുതിയ ആൻഡ്രോയിഡ് അധിഷ്ഠിത ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം ലഭിക്കുന്നുണ്ട്.

മുന്നിലും പിന്നിലും വെന്റിലേറ്റഡ് സീറ്റുകൾ, മൾട്ടിഫങ്ഷണൽ സ്റ്റിയറിംഗ് വീൽ, ഓട്ടോമാറ്റിക് ക്ലൈമറ്റ് കൺട്രോൾ എന്നിവയും ഇലക്‌ട്രിക് എസ്‌യുവിയിൽ ഉൾപ്പെടുന്നുണ്ട്. സുരക്ഷാ സവിശേഷതകളിൽ 360-ഡിഗ്രി പാർക്കിംഗ് ക്യാമറ, ഒന്നിലധികം എയർബാഗുകൾ, ലെയ്ൻ അസിസ്റ്റ്, എമർജൻസി ബ്രേക്കിംഗ് സിസ്റ്റം എന്നിവയെല്ലാം വോൾവോ വാഗ്ദാനം ചെയ്യും.