മഹീന്ദ്ര പൊളിയല്ലേ... ഏത് മലയിലും കയറിചെല്ലാൻ സ്കോർപിയോ N ആംബുലൻസ് റെഡി

ഇന്ത്യയിലെ എസ്‌യുവികളുടെ മുഖമാണ് സ്കോർപിയോ. രണ്ടാം തലമുറയിലെത്തിയ N മോഡൽ അവതരിപ്പിച്ച് അരമണിക്കൂറിനുള്ളിൽ സ്വന്തമാക്കാൻ എത്തിയത് ലക്ഷങ്ങളായിരുന്നു. ഇന്നും സ്കോർപിയോ N എസ്‌യുവിയുടെ ആരവം ഒഴിഞ്ഞിട്ടില്ലെന്നു വേണം പറയാൻ. ഇന്ത്യക്കാരുടെ ജനപ്രിയ ബ്രാൻഡുകളിൽ ഒന്നായി മഹീന്ദ്രയെ വളർത്തിയെടുത്തിന്റെ പൂർണ ക്രെഡിറ്റും ഉടമയായ ആനന്ദ് മഹീന്ദ്രക്കുള്ളതാണ്.

രത്തൻ ടാറ്റയെ പോലെ തന്നെ ആളുകൾക്ക് ഏറെ പ്രിയങ്കരനാണ് ആനന്ദ് മഹീന്ദ്ര. സാമൂഹ്യ കാര്യങ്ങളിലെല്ലാം ഇടപെടുന്ന ഇദ്ദേഹം സോഷ്യൽ മീഡിയയിലും വളരെ സജീവമായ വ്യക്തിയാണ്. ഇപ്പോഴിതാ അസമിൽ ഏറ്റവും പുതിയ സ്കോർപിയോ N എസ്‌യുവിയെ ജീവകാരുണ്യ പ്രവർത്തനങ്ങൾക്കായി ഇറക്കിയിരിക്കുകയാണ് മഹീന്ദ്ര ആൻഡ് മഹീന്ദ്ര. ഇന്ത്യയിലെ വടക്കുകിഴക്കൻ സംസ്ഥാനമായ അസം, മലമ്പ്രദേശങ്ങളും ഇടതൂർന്ന വനങ്ങളും ഉൾപ്പെടെയുള്ള വൈവിധ്യമാർന്ന ഭൂപ്രദേശങ്ങൾക്ക് പേരുകേട്ടതാണ്.

മോശം റോഡ് കണക്റ്റിവിറ്റിയും പരിമിതമായ ആരോഗ്യ സംരക്ഷണ അടിസ്ഥാന സൗകര്യങ്ങളും കാരണം ഇത്തരം മേഖലകളിൽ സമയബന്ധിതമായി വൈദ്യസഹായം നൽകുന്നത് കാര്യമായ വെല്ലുവിളികൾ ഉയർത്തിയിരുന്നു. ഈയൊരു സാഹചര്യത്തെ നേരിടാനായി സ്കോർപിയോയെ ആംബുലൻസായി പരിഷ്ക്കരിച്ച് അസമിൽ നിയോഗിച്ചിരിക്കുകയാണ് കമ്പനി. അവശ്യ മെഡിക്കൽ സൗകര്യങ്ങളുള്ള പൂർണമായും പ്രവർത്തനക്ഷമമായ ആംബുലൻസുകളാക്കി മാറ്റുന്നതിന് മഹീന്ദ്ര അസം സർക്കാരുമായി അടുത്തിടെ പങ്കാളിത്തം പ്രഖ്യാപിച്ചിരുന്നു.

ഇതിന്റെ ഭാഗമായാണ് സ്കോർപിയോ N ആംബുലൻസ് വേഷത്തിൽ പുറത്തിറക്കിയിരിക്കുന്നത്. വിദൂരവും വെല്ലുവിളി നിറഞ്ഞതുമായ ഭൂപ്രദേശങ്ങളിൽ ആരോഗ്യ സേവനങ്ങളുടെ പ്രവേശനക്ഷമതയും ഗുണനിലവാരവും മെച്ചപ്പെടുത്താൻ ഈ സംരംഭം സഹായകരമാവും. സ്കോർപിയോ N എസ്‌യുവികളെ ആംബുലൻസുകളായി പുനർനിർമിക്കുന്നതിലൂടെ, ഈ മേഖലയിലെ സാമൂഹിക ക്ഷേമത്തിനും ആരോഗ്യ സംരക്ഷണത്തിനുമുള്ള പ്രതിബദ്ധത മഹീന്ദ്ര എടുത്തുകാണിക്കുന്നു.

ശരിക്കും ഒരു ലൈഫ് സ്റ്റൈൽ എസ്‌യുവിയായാണ് മഹീന്ദ്ര സ്കോർപിയോ N മോഡലിനെ പുറത്തിറക്കിയിരിക്കുന്നതെങ്കിലും വാഹനത്തിന്റെ കരുത്തുറ്റ ബിൽഡും ശക്തമായ പെർഫോമൻസും കാരണം ആംബുലൻസ് പരിവർത്തനത്തിന് അനുയോജ്യമാണിത്. സ്‌ട്രെച്ചറുകൾ, പ്രഥമശുശ്രൂഷ കിറ്റുകൾ, ഓക്‌സിജൻ സിലിണ്ടറുകൾ, മറ്റ് അവശ്യസാധനങ്ങൾ എന്നിവയുൾപ്പെടെ നിരവധി മെഡിക്കൽ ഉപകരണങ്ങളാണ് വാഹനങ്ങളിൽ മഹീന്ദ്ര സജ്ജീകരിച്ചിരിക്കുന്നത്.

സ്കോർപിയോ N എസ്‌യുവിയുടെ വിശാലമായ ഇന്റീരിയർ അടിയന്തര വൈദ്യസഹായം കാര്യക്ഷമമായി നിർവഹിക്കാൻ അനുവദിക്കുന്നു. മാത്രമല്ല, ആശുപത്രികളുമായും എമർജൻസി റെസ്‌പോൺസ് ടീമുകളുമായും തടസമില്ലാത്ത കണക്റ്റിവിറ്റി ഉറപ്പാക്കുന്ന നൂതന ആശയവിനിമയ സംവിധാനങ്ങളും വാഹനത്തിൽ മഹീന്ദ്ര സജ്ജീകരിച്ചിരിക്കുന്നു. ഈ വാഹനങ്ങൾക്ക് പരുക്കൻ ഭൂപ്രദേശങ്ങളിലൂടെ സഞ്ചരിക്കാനും ഇടുങ്ങിയ റോഡുകളിലൂടെ സഞ്ചരിക്കാനും വിദൂര ഗ്രാമങ്ങളിലേക്കും മുമ്പ് പ്രവേശിക്കാൻ പ്രയാസമുള്ള ആദിവാസി മേഖലകളിലേക്കും എത്തിച്ചേരാനാകും.

സ്കോർപിയോ N എസ്‌യുവികൾ സുഗമമാക്കുന്ന പെട്ടെന്നുള്ള പ്രതികരണ സമയം മെഡിക്കൽ അത്യാഹിത സമയത്ത് ജീവൻ രക്ഷിക്കുന്നതിൽ നിർണായകമാണെന്ന് തെളിയിക്കപ്പെട്ടിട്ടുണ്ട്. കൂടാതെ, ആംബുലൻസുകളിൽ ജിപിഎസ് ട്രാക്കിംഗ് സംവിധാനങ്ങൾ സജ്ജീകരിച്ചിരിക്കുന്നതും ശ്രദ്ധേയമാണ്. കേന്ദ്രീകൃത നിരീക്ഷണവും അടിയന്തര സേവനങ്ങളുടെ മികച്ച ഏകോപനവുമാണ് ഇതിലൂടെ സാധ്യമാക്കുന്നത്. ആംബുലൻസുകളുടെ കാര്യക്ഷമത വർധിപ്പിക്കുന്നതിന്, ഡ്രൈവർമാർക്കും പാരാമെഡിക്കുകൾക്കുമായി മഹീന്ദ്ര പ്രത്യേക പരിശീലന പരിപാടികളും ആവിഷ്ക്കരിച്ചിട്ടുണ്ട്.

മെഡിക്കൽ അത്യാഹിതങ്ങൾ കൈകാര്യം ചെയ്യുന്നതിനും ഉപകരണങ്ങൾ ഫലപ്രദമായി ഉപയോഗിക്കുന്നതിനും ആവശ്യമായ പ്രീ-ഹോസ്പിറ്റൽ പരിചരണം നൽകുന്നതിനും ഉദ്യോഗസ്ഥർക്ക് നല്ല അറിവുണ്ടെന്ന് സമഗ്രമായ പരിശീലനം ഉറപ്പാക്കുന്നു. 2.2 ലിറ്റർ ടർബോ ഡീസൽ അല്ലെങ്കിൽ 2.0 ലിറ്റർ ടർബോ പെട്രോൾ എഞ്ചിനാണ് മഹീന്ദ്ര സ്‌കോർപിയോ N എസ്‌യുവിയുടെ ഹൃദയം.

6-സ്പീഡ് മാനുവൽ അല്ലെങ്കിൽ 6-സ്പീഡ് ഓട്ടോമാറ്റിക് ട്രാൻസ്മിഷനുമായാണ് എഞ്ചിൻ ജോടിയാക്കിയിരിക്കുന്നത്. മോഡലിന്റെ ടോപ്പ് വേരിയന്റുകൾക്ക് ഫോർ-വീൽ ഡ്രൈവ് കോൺഫിഗറേഷനുള്ളതിനാൽ ഓഫ്-റോഡിംഗ് ശേഷിയും വർധിപ്പിക്കുന്നുണ്ട്. 13.05 ലക്ഷം മുതൽ 24.51 ലക്ഷം രൂപ വരെയാണ് രണ്ടാം തലമുറ സ്കോർപിയോയുടെ എക്‌സ്ഷോറൂം വില വരുന്നത്.