ഇത് കാറല്ല, കൊട്ടാരമാണ്; ലക്ഷ്വറിയുടെ ആധുനിക മുഖവുമായി ടൊയോട്ട എംപിവി ഇന്ത്യയിലും

ടൊയോട്ട എന്ന ജാപ്പനീസ് വാഹന നിർമാതാക്കൾക്ക് ഇന്ത്യയിലുള്ളത് ഒരു പ്രത്യേക ഇമേജാണ്. ടൊയോട്ടയുടെ ബാഡ്‌ജ് മലയാളികൾക്ക് ഒരു സ്റ്റാറ്റസ് സിമ്പലാണെന്നു വേണം പറയാൻ. ഇന്നോവ മുതൽ അങ്ങ് ഫോർച്യൂണർ വരെ നീളുന്ന മോഡൽ നിരയ്ക്ക് രാജ്യത്ത് ലഭിക്കുന്ന സ്വീകാര്യതയും വേറെ തന്നെയാണ്. എന്നാൽ ലക്ഷ്വറി കാറുകളോട് കിടപിടിക്കുന്ന തരത്തിൽ ഒരു പ്രീമിയം എംപിവിയെയും ടൊയോട്ട കുറച്ചുകാലം മുമ്പ് വിപണിയിൽ അവതരിപ്പിച്ചിരുന്നു.

സിനിമാ താരങ്ങൾക്കും വ്യവസായികൾക്കും ഇടയിൽ ഏറെ ജനപ്രിയമായ വെൽഫയറിനെ കുറിച്ചാണീ പറഞ്ഞു വരുന്നത്. ആദ്യതലമുറ ആവർത്തനത്തിൽ വലിയ ഹിറ്റായ ഈ എംപിവിയുടെ പുതുതലമുറ മോഡലുമായി രംഗത്തെത്തിയിരിക്കുകയാണ് ടൊയോട്ടയിപ്പോൾ. അടുത്തിടെ ആഗോളതലത്തിൽ അരങ്ങേറ്റം കുറിച്ച വെൽഫയറിനെ ഇന്ത്യയിൽ 1.20 കോടി രൂപയുടെ എക്സ്ഷോറൂം വിലയിലാണ് പരിചയപ്പെടുത്തിയിരിക്കുന്നത്.

കൂടുതൽ ആഡംബരത്തോടെ നിയമിക്കപ്പെട്ട ലെക്സസ് LM എന്ന റീബാഡ്‌ജ് പതിപ്പാണ് ഇതെന്നും വേണമെങ്കിൽ പറയാം. ഹായ്, വിഐപി എന്നിങ്ങനെ രണ്ട് വേരിയന്റുകളിലാണ് ഇന്ത്യയിൽ വെൽഫയർ വിൽപ്പനയ്ക്ക് എത്തുക. രണ്ടാമത്തേതിന് എക്സിക്യൂട്ടീവ് ലോഞ്ച് പാക്കേജും ലഭിക്കുന്നുണ്ട്. ഇതിന് 1.30 കോടി രൂപയാണ് പക്ഷേ എക്‌സ്ഷോറൂം വിലയായി മുടക്കേണ്ടി വരിക. പഴയ മോഡലിനേക്കാൾ 24 ലക്ഷം രൂപ കൂടുതലാണ് പുതുതലമുറ വാഹനത്തിനായി മുടക്കേണ്ടി വരുന്നത്.

അതായത് ഒരു ഇന്നോവയുടെ വിലയോളം വരുന്ന വർധനവാണ് ഈ ലക്ഷ്വറി കാറിൽ നടപ്പിലാക്കിയിരിക്കുന്നതെന്ന് സാരം. ആഡംബരത്തിന്റെ ആധുനിക മുഖവുമായി എത്തുമ്പോൾ തീർച്ചയായും മുൻഗാമിയേക്കാൾ ആകർഷമാണ് ഈ പുതുതലമുറ മോഡൽ എന്നതിൽ സംശയമൊന്നുമില്ല. അകത്തും പുറത്തും ശരിക്കും ആഡംബര ഫീൽ ഉണർത്തുന്ന രീതിയിലാണ് വാഹനത്തെ ടൊയോട്ട പണികഴിപ്പിച്ചിരിക്കുന്നത്.

നിലവിലുണ്ടായിരുന്ന മോഡലുമായി താരതമ്യപ്പെടുത്തുമ്പോൾ പുതിയ വെൽഫയർ സമാനമായ രൂപം നിലനിർത്തുന്നുണ്ടെങ്കിലും ഡിസൈനിൽ അതിശയിപ്പിക്കും വിധമുള്ള മാറ്റങ്ങൾ കൊണ്ടുവന്നത് ഏവരേയും അതിശയിപ്പിക്കുന്നുണ്ട്. മുന്നിലെ ആറു പടികളുള്ള ഗ്രില്ലാണ് പുതിയ വെല്‍ഫയറിന്റെ രൂപത്തില്‍ ആദ്യം ശ്രദ്ധിക്കപ്പെടുക. സ്പ്ലിറ്റ് ഹെഡ്‌ലാമ്പുകളാൽ ചുറ്റപ്പെട്ടിരിക്കുന്നതും ടൊയോട്ടയുടെ വൈദഗ്ധ്യത്തെ ചൂണ്ടിക്കാണിക്കുന്നുണ്ട്.

വലിയ ആറ് സ്ലാറ്റ് ഗ്രില്ലിലാണ് ടൊയോട്ട ലോഗോയുടെ പ്രധാന സ്ഥാനം. ഹെഡ്‌ലാമ്പുകളുടെ താഴത്തെ ഭാഗത്ത് എൽഇഡി ഡേടൈം റണ്ണിംഗ് ലാമ്പുകളുമുണ്ട്. അതേസമയം U-ആകൃതിയിലുള്ള ക്രോം സ്ട്രിപ്പ് രണ്ട് ഹെഡ്‌ലാമ്പുകളെ ബന്ധിപ്പിക്കുന്ന ബമ്പറിലുടനീളം പ്രവർത്തിക്കുന്നതും പ്രീമിയം ഫീൽ ഉയർത്തുന്ന കാര്യമാണ്. ഇനി വശക്കാഴ്ച്ചയിലേക്ക് വന്നാൽ എംപിയുടെ ഗ്ലാസ്ഹൗസ് ഇപ്പോൾ ഒരു ക്രോം ഔട്ട്‌ലൈനോടുകൂടിയ ഒരു പ്രൊമിനന്റ് കിങ്കും ബ്ലാക്ക്ഡ്-ഔട്ട് പില്ലറുകളുള്ള ഒരൊറ്റ യൂണിറ്റായാണ് ഒരുക്കിയിരിക്കുന്നതും.

വളരെ പരിചിതമായ വി-ആകൃതിയിലുള്ള ടെയിൽ ലാമ്പ്, ക്രോമിന്റെ ഉപയോഗം, വെൽഫയർ ബാഡ്‌ജിംഗ്, മധ്യഭാഗത്ത് ഒരു വലിയ ടൊയോട്ട ലോഗോ എന്നിവയാണ് പിൻവശത്തെ ആകർഷകമാക്കുന്ന കാര്യങ്ങൾ. ജാപ്പനീസ് ബ്രാൻഡിന്റെ TNGA-K പ്ലാറ്റ്‌ഫോമിനെ അടിസ്ഥാനമാക്കി നിർമിച്ചിരിക്കുന്നതിനാൽ മുൻ മോഡലിനെ അപേക്ഷിച്ച് പുതുതലമുറ ടൊയോട്ട വെൽഫയറിന് വലിപ്പമേറിയതിനൊപ്പം ഭാരം കുറക്കാനും സാധിച്ചിട്ടുണ്ട്.

പുതിയ പ്രീമിയം എംപിവിക്ക് ഇപ്പോൾ മൊത്തത്തിൽ 4,995 മില്ലീമീറ്റർ നീളം, 1,850 മില്ലീമീറ്റർ വീതി, 1,950 മില്ലീമീറ്റർ ഉയരം, 3,000 മില്ലീമീറ്റർ വീൽബേസ് നീളവുമാണുള്ളതെന്ന് ടൊയോട്ട പറയുന്നു. ഇനി ഇന്റീരിയറിലേക്ക് കയറിയാലും ആരേയും ഞെട്ടിക്കും വിധമാണ് ഈ അൾട്രാ ലക്ഷ്വറി കാറിന്റെ അകത്തളം ഒരുക്കിയിരിക്കുന്നത്. വലിപ്പമേറിയ 14 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം അവതരിപ്പിക്കുന്നതിനാൽ ഇന്റീരിയറിൽ ഫിസിക്കൽ ബട്ടണുകളുടെ ഉപയോഗം കുറവാണ്.

പുതിയ സീറ്റുകൾ, ADAS ടെക്, യാത്രക്കാർക്കുള്ള ഒരു ഓവർഹെഡ് കൺസോൾ, എക്‌സിക്യൂട്ടീവ് ലോഞ്ച് പായ്ക്കിൽ റെട്രാക്‌ടബിൾ ടേബിളുകളുള്ള ക്യാപ്റ്റൻ സീറ്റുകൾ, വയർലെസ് സ്‌മാർട്ട്‌ഫോൺ ചാർജർ, ഹെഡ്‌സ് അപ്പ് ഡിസ്പ്ലേ (HUD), എട്ട് തരത്തിൽ ക്രമീകരിക്കാനാവുന്ന ഡ്രൈവർ സീറ്റ് തുടങ്ങിയവയാണ് പുതിയ 2023 ടൊയോട്ട വെൽഫയറിന്റെ അകത്തളത്തെ കിടിലമാക്കുന്ന ഫീച്ചറുകൾ.

സുരക്ഷാ ഫീച്ചറുകളുടെ കാര്യത്തിൽ വെൽഫയർ എംപിവിക്ക് ടൊയോട്ട സേഫ്റ്റി സെൻസ് ADAS സിസ്റ്റം ലഭിക്കുന്നുണ്ട്. ഇതിൽ പ്രീ-കൊളിഷൻ സേഫ്റ്റി സിസ്റ്റം, ലെയ്ൻ ട്രെയ്സ് അസിസ്റ്റ്, അഡാപ്റ്റീവ് ക്രൂയിസ് കൺട്രോൾ, ബ്ലൈൻഡ് സ്പോട്ട് മോണിറ്റർ എന്നിവയെല്ലാമാണ് ഉൾപ്പെടുത്തയിരിക്കുന്നത്. കൂടാതെ എംപിവിക്ക് ആറ് എയർബാഗുകൾ, സ്റ്റെബിലിറ്റി കൺട്രോൾ, പാർക്ക് അസിസ്റ്റ്, ഹിൽ അസിസ്റ്റ് കൺട്രോൾ എന്നിവയും അതിലേറെയും പോലുള്ള സംവിധാനങ്ങളം ലഭിക്കുന്നുണ്ട്.

ഹൈബ്രിഡ് സംവിധാനമുള്ള 2.5 ലിറ്റർ ഫോർ-സിലിണ്ടർ പെട്രോൾ എഞ്ചിനാണ് പുതിയ ടൊയോട്ട വെൽഫയർ എംപിവിക്ക് തുടിപ്പേകുന്നത്. ഇത് 193 bhp പവറിൽ പരമാവധി 240 Nm torque വരെ ഉത്പാദിപ്പിക്കാൻ ശേഷിയുള്ളതാണ്. ഒരു ഇ-സിവിടി ഓട്ടോമാറ്റിക് ട്രാൻസ്മിഷനുമായാണ് എഞ്ചിൻ ജോടിയാക്കിയിരിക്കുന്നത്. 19.28 കി.മീ. ഇന്ധനക്ഷമതയുണ്ടെന്നാണ് ടൊയോട്ട അവകാശപ്പെടുന്നത്.