ഹോണ്ടയുടെ തലവര മാറ്റാൻ CR-V എസ്‌യുവി മടങ്ങിയെത്തുന്നു, ഇനി ഷോറൂമുകൾ പൂരപ്പറമ്പാവും

എസ്‌യുവി വിപണി ഇന്ന് കാണുന്ന തലത്തിലേക്ക് വളരുന്നതിന് മുമ്പേ തന്നെ ഒരു അഡാറ് സ്പോർട് യൂട്ടിലിറ്റി വാഹനം ഇന്ത്യക്കാർക്ക് സമ്മാനിച്ചവരാണ് ജാപ്പനീസ് വാഹന നിർമാതാക്കളായ ഹോണ്ട. ഇന്ന് വിപണിയിലില്ലെങ്കിലും വണ്ടിഭ്രാന്തൻമാർക്കെല്ലാം CR-V (Honda CR-V) എന്ന പേര് സുപരിചിതമായിരിക്കും. അതും ഇന്ന് കാണുന്ന പല മോഡലുകളിലും ഇല്ലാത്ത സൌകര്യങ്ങളോടെയാണ് മോഡൽ വിപണിയിലുണ്ടായിരുന്നത്. 1995-ൽ പുറത്തിറങ്ങിയ ഈ വാഹനം, ഹോണ്ടയുടെ ചരിത്രത്തിലെ ഏറ്റവും കൂടുതൽ വിറ്റഴിക്കപ്പെട്ട മോഡലുകളിൽ ഒന്നാണ്. മോളിവുഡിലെ മിക്ക സെലിബ്രിറ്റികളുടെയും ഗരാജിൽ വരെ ഇവൻ ഇടംപിടിച്ചിട്ടുമുണ്ടായിരുന്നു.

പിന്നീട് കച്ചോടം കുറഞ്ഞത് കാരണം നിർത്തലാക്കിയ CR-V സെക്കൻഡ് ഹാൻഡ് വിപണിയിൽ ഇപ്പോഴും പലരും തപ്പി നടക്കുന്നുണ്ട്. മൈലേജ് കുറവാണെങ്കിലും എഞ്ചിനും അതിൽ നിന്ന് കിട്ടുന്ന പെർഫോമൻസും ഒന്ന് വേറെ തന്നെയാണ്. 2003-ലാണ് ഹോണ്ട ആദ്യമായി CR-V ഇന്ത്യയിൽ അവതരിപ്പിക്കുന്നത്. തുടർന്ന് 2020 വരെ വിൽപ്പനയ്ക്ക് എത്തിയിരുന്ന മോഡൽ നോയിഡയിൽ സ്ഥിതി ചെയ്യുന്ന മോഡൽ അസംബിൾ ചെയ്യുന്ന ഫാക്ടറി അടച്ചുപൂട്ടേണ്ടി വന്നതിനാലാണ് നിർത്തലാക്കുന്നത്.

രാജസ്ഥാനിലെ തപുകരയിൽ സ്ഥിതി ചെയ്യുന്ന ശേഷിക്കുന്ന ഏക പ്രവർത്തന പ്ലാന്റിൽ വാഹനം അസംബിൾ ചെയ്യുന്നത് പ്രായോഗികമല്ലായിരുന്നു. ഇപ്പോഴിതാ CR-V എസ്‌യുവിയുടെ ഏറ്റവും പുതിയ മോഡലിന്റെ ഇന്ത്യയിൽ അവതരിപ്പിക്കാൻ ഹോണ്ട തയാറെടുക്കുന്നുവെന്ന വാർത്തകളാണ് പുറത്തുവരുന്നത്. നിലവിൽ ആഗോള വിപണികളിലുള്ള ആറാം തലമുറ ആവർത്തനത്തെ ആയിരിക്കില്ല.

പകരം CR-V എസ്‌യുവിയുടെ ഏറ്റവും പുതിയ ഏഴാം തലമുറ മോഡലിനെയായിരിക്കും കമ്പനി ഇന്ത്യൻ വിപണിയിലെത്തിക്കുകയെന്നാണ് ഗാഡിവാഡി റിപ്പോർട്ട് ചെയ്യുന്നത്. നിലവിൽ വികസന ഘട്ടത്തിലുള്ള വാഹനം അധികം വൈകാതെ പിറവിയെടുക്കുമെന്നാണ് സൂചന. ന്യൂജെൻ ഹോണ്ട എസ്‌യുവിയുടെ പ്ലാറ്റ്‌ഫോം നിലവിലെ മോഡലിനേക്കാൾ ഭാരം കുറഞ്ഞതായിരിക്കും.

ഹോണ്ട സിവിക്, അടുത്ത തലമുറ ഹോണ്ട അക്കോർഡ് എന്നിവ ഉൾപ്പെടുന്ന കാറുകളും ഇതേ പ്ലാറ്റ്ഫോമിൽ തന്നെ പണികഴിപ്പിക്കുന്നതിനാൽ വരാനിരിക്കുന്ന CR-V അതിന്റെ 60 ശതമാനത്തിലധികം പാർട്‌സുകളും ഈ മോഡലുകളുമായി പങ്കിടുകയും ചെയ്യും. പുതിയ പ്ലാറ്റ്‌ഫോമിനൊപ്പം ന്യൂജെൻ പതിപ്പിൽ ഒരു പുതിയ ഹൈബ്രിഡ് സിസ്റ്റവും ഉണ്ടാവുമെന്നാണ് റിപ്പോർട്ടുകൾ സൂചിപ്പിക്കുന്നത്.

പുതിയ 2.0-ലിറ്റർ ഡയറക്ട്-ഇഞ്ചക്ഷൻ പെട്രോൾ എഞ്ചിൻ, റെയർ-എർത്ത് ഫ്രീ ട്രാക്ഷൻ മോട്ടോർ, പുതിയ ജനറേറ്റർ മോട്ടോർ എന്നിവ ഈ ഹൈബ്രിഡ് സിസ്റ്റത്തിൽ ഉൾപ്പെടും. ഉയർന്ന വോൾട്ടേജ് ബാറ്ററി പായ്ക്കും പുത്തൻ യൂണിറ്റായിരിക്കുമെന്നാണ് ഹോണ്ട വൃത്തങ്ങൾ സ്ഥിരീകരിച്ചിരിക്കുന്നത്. നിലവിലെ CR-V ഹൈബ്രിഡിൽ മെക്കാനിക്കൽ ഓൾ-വീൽ ഡ്രൈവ് ഓപ്ഷൻ വാഗ്ദാനം ചെയ്യുന്നുണ്ടെങ്കിലും തലമുറ മാറ്റത്തിലൂടെ റിയർ വീലുകൾക്ക് കരുത്ത് പകരുന്ന സെക്കൻഡ് ട്രാക്ഷൻ മോട്ടോർ ഉപയോഗിച്ച് ഇലക്ട്രിക് ഓൾ-വീൽ ഡ്രൈവ് ഓപ്ഷൻ നൽകും.

പുതിയ സജ്ജീകരണം സെൻട്രൽ ടണലിന്റെ വലിപ്പം കുറയ്ക്കാൻ അനുവദിക്കുമെന്നും റിയർ സീറ്റ് യാത്രക്കാർക്ക് സ്ഥലവും സുഖസൗകര്യങ്ങളും മെച്ചപ്പെടുത്തുമെന്നും കമ്പനി പറഞ്ഞു. പുതിയ പ്ലാറ്റ്‌ഫോമും എഞ്ചിനും പുതുതലമുറയിൽ CR-V ഹൈബ്രിഡിന്റെ ഭാരം 90 കിലോഗ്രാം വരെ കുറയ്ക്കുമെന്നാണ് ഹോണ്ടയുടെ അനുമാനം. നിലവിലുള്ള 9 ഇഞ്ച് യൂണിറ്റിന് പകരമായി ഹോണ്ട ഒരു വലിയ ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം വികസിപ്പിച്ചുകൊണ്ടിരിക്കുകയാണ്.

പുത്തൻ CR-V-യിലും ഇത് വാഗ്ദാനം ചെയ്യാൻ സാധ്യതയുണ്ട്. പുതിയ സിസ്റ്റം ഏകദേശം 15 ഇഞ്ച് വലിപ്പമുള്ളതാവുമെന്നാണ് പ്രതീക്ഷിക്കുന്നത്. ഇലക്ട്രോണിക്‌സ് വശങ്ങളിലെ മറ്റൊരു പ്രധാന മാറ്റം സ്റ്റിയറിംഗ് കോളം-മൗണ്ടഡ് ഗിയർ ഷിഫ്റ്ററായിരിക്കും. ഇത് സെന്റർ കൺസോളിൽ സ്പേസ് അധികം കിട്ടാൻ സഹായിക്കുന്ന നീക്കം കൂടിയാണ്. പുത്തൻ ഹോണ്ട CR-V എസ്‌യുവി പുറത്തിറങ്ങാൻ 2027 വരെ കാത്തിരിക്കേണ്ടി വരുമെന്ന് മാത്രം.

അതേ വർഷം തന്നെ ഇന്ത്യയിലും വാഹനം എത്തിയേക്കാം. ഫോക്‌സ്‌വാഗൺ ടെയ്‌റോൺ, സ്കോഡ കൊഡിയാക് എന്നിവയുമായി മത്സരിക്കാൻ പ്രാപ്‌തമായിരിക്കും. പക്ഷേ മൂന്ന് നിര സീറ്റുകൾ ഇതിൽ ഉണ്ടാകാൻ സാധ്യതയില്ല. അതായത് ഇതൊരു 5-സീറ്റർ ഫുൾ-സൈസ് എസ്‌യുവി ആയിരിക്കുമെന്ന് ചുരുക്കം. അതിനാൽ ടൊയോട്ട ഫോർച്യൂണർ പോലുള്ള എതിരാളികൾക്ക് തത്ക്കാലം ആശ്വസിക്കാം.