ഹാരിയറും ക്രെറ്റയും വരെ ബാറ്ററി ഘടിപ്പിച്ച വർഷം, 2025-ൽ പിറവിയെടുത്ത തകർപ്പൻ ഇലക്‌ട്രിക് എസ്‌യുവികൾ

ഇലക്ട്രിക് കാറുകൾക്കുള്ള ആവശ്യം ഇന്ത്യയിൽ ഏറിവരികയാണ്. സെഗ്മെൻ്റും വിലയും നോക്കാതെ തന്നെ പലരും ഇവികളിലേക്ക് വേഗത്തിൽ ചേക്കേറിത്തുടങ്ങിയിട്ടുണ്ട്. അതിനാൽ തന്നെ വാഹന നിർമാതാക്കൾക്ക് വിശ്രമമില്ലാത്തൊരു വർഷമാണ് കടന്നുപോയത്. കഴിഞ്ഞ കലണ്ടർ വർഷത്തേക്കാൾ കൂടുതൽ ഇലക്ട്രിക് വാഹനങ്ങൾ വിപണിയിലെത്തിയ വർഷം കൂടിയായിരുന്നു 2025. പ്രത്യേകിച്ച് എസ്‌യുവി മോഡലുകളാണ് ഇത്തവണ കളംനിറഞ്ഞത് എന്നുപറഞ്ഞാലും തെറ്റില്ല. കോം‌പാക്‌ട് സിറ്റി ക്രോസ്ഓവറുകൾ മുതൽ ഫാമിലി ഫ്രണ്ട്ലിയായിട്ടുള്ള വലിയ ഇലക്ട്രിക് എസ്‌യുവികൾ വരെ ഷോറൂമിലെത്തി. ഈ വർഷം ഇന്ത്യൻ വിപണിയിലെത്തിയ ചില കിടിലൻ ഇലക്ട്രിക് എസ്‌യുവികളെ പരിചയപ്പെട്ടാലോ?

വോൾവോ EX30

സുരക്ഷയിലും പ്രകടനത്തിലും ശ്രദ്ധ കേന്ദ്രീകരിച്ചുകൊണ്ട് പ്രീമിയം കോംപാക്റ്റ് ഇലക്ട്രിക് എസ്‌യുവിയായാണ് വോൾവോ EX30 ഇന്ത്യയിലെത്തിയത്. ഇന്ത്യ-സ്പെക്ക് മോഡലിൽ 69 kWh ലിഥിയം-അയൺ ബാറ്ററിയാണ് ഉപയോഗിക്കുന്നത്, ഏകദേശം 272 bhp കരുത്തും 343 Nm torque ഉം ഉത്പാദിപ്പിക്കുന്ന പിൻവശത്ത് ഘടിപ്പിച്ച മോട്ടോറും ഇതിൽ ഉൾപ്പെടുന്നു. 480 കിലോമീറ്റർ വരെ WLTP റേഞ്ച് വോൾവോ അവകാശപ്പെടുന്നു, അതേസമയം 0-100 kmph ആക്സിലറേഷൻ ഏകദേശം 5.3 സെക്കൻഡ് എടുക്കും. ഉയർന്ന ഔട്ട്‌പുട്ട് DC ചാർജർ ഉപയോഗിച്ച് ഏകദേശം 28 മിനിറ്റിനുള്ളിൽ 10-80 ശതമാനം ചാർജ് ചെയ്യാൻ ഫാസ്റ്റ് ചാർജിംഗ് പിന്തുണ അനുവദിക്കുന്നു.

ടാറ്റ ഹാരിയർ ഇവി

ടാറ്റ മോട്ടോർസ് തങ്ങളുടെ ജനപ്രിയ മിഡ്-സൈസ് എസ്‌യുവിയായ ഹാരിയറിനേയും ഇലക്ട്രിക് യുഗത്തിലേക്ക് കൊണ്ടുവന്നത് ഈ വർഷമായിരുന്നു. പുതിയ ആക്‌ടി ഡോട്ട് ഇവി പ്ലസ് ഇവി പ്ലാറ്റ്‌ഫോമിൽ നിർമിച്ച മോഡൽ വലിയ തരംഗമാവുകയും ചെയ്‌തിരുന്നു. 65 kWh, 75 kWh ബാറ്ററി പായ്ക്കുകൾ വാഗ്ദാനം ചെയ്യുന്ന മോഡലിന് ഫുൾ ചാർജിൽ 627 KM വരെ റേഞ്ചും നൽകാനാവുമെന്നതാണ് ഹൈലൈറ്റ്. റിയർ-വീൽ-ഡ്രൈവ്, ഓൾ-വീൽ-ഡ്രൈവ് കോൺഫിഗറേഷനുകളിലും ഹാരിയർ ഇവി വാങ്ങാനാവും. 21.49 ലക്ഷം മുതലാണ് വില തുടങ്ങുന്നത്.

ഹ്യുണ്ടായി ക്രെറ്റ ഇവി

രാജ്യത്ത് ഏറ്റവും കൂടുതൽ വിറ്റഴിക്കപ്പെടുന്ന എസ്‌യുവികളിൽ ഒന്നായ ഹ്യുണ്ടായി ക്രെറ്റയും ഈ വർഷം ഇലക്‌ട്രിക് വേഷത്തിൽ വിപണിയിലെത്തിയിരുന്നു. 42 kWh, 51.4 kWh ബാറ്ററി പായ്ക്കുകളിൽ വിപണനത്തിന് എത്തിയ മോഡൽ ഫുൾ ചാർജിൽ 420 കിലോമീറ്റർ മുതൽ 510 കിലോമീറ്റർ വരെയാണ് റേഞ്ച് വാഗ്‌ദാനം ചെയ്യുന്നത്. വേരിയൻ്റിനെ ആശ്രയിച്ച്കൂടാതെ DC ഫാസ്റ്റ് ചാർജിംഗിലൂടെ ഏകദേശം 58 മിനിറ്റുകൊണ്ട് ക്രെറ്റ ഇവി ചാർജ് ചെയ്യാനും സാധിക്കും. 18.02 ലക്ഷമാണ് ഹ്യുണ്ടായിയുടെ ഇലക്ട്രിക് എസ്‌യുവിക്ക് വരുന്ന വില.

മഹീന്ദ്ര XEV 9S

ഈ വർഷം ഇലക്ട്രിക് എസ്‌യുവി വിപണിയെ കളറാക്കിയ മോഡലാണ് മഹീന്ദ്ര XEV 9S. 7-സീറ്റർ ഫോർമാറ്റ് നൽകുന്ന രാജ്യത്തെ ആദ്യത്തെ മാസ്മാർക്കറ്റ് എസ്‌യുവിയായി ഇതിനെ വിശേഷിപ്പിക്കാം. 59 kWh, 70 kWh, 79 kWh എന്നിങ്ങനെ മൂന്ന് ബാറ്ററി കോൺഫിഗറേഷനുകളിൽ ലഭ്യമാണ്. ഇവയെല്ലാം ആജീവനാന്ത ബാറ്ററി വാറണ്ടിയോടെയാണ് വരുന്നത്. ബാറ്ററി പായ്ക്കിനെയും വേരിയൻ്റിനെയും ആശ്രയിച്ച് ഏകദേശം 521 കിലോമീറ്റർ മുതൽ 679 കിലോമീറ്റർ വരെ റേഞ്ചും ഇവി നൽകും. വില ആരംഭിക്കുന്നത് 19.95 ലക്ഷം മുതലാണ്.

വിൻഫാസ്റ്റ് VF7

വിയറ്റ്നാമീസ് ഇവി ബ്രാൻഡായ വിൻഫാസ്റ്റ് ഈ വർഷം ഇന്ത്യയിൽ പ്രവർത്തനം ആരംഭിച്ചത് VF7 എന്ന കിടിലൻ മോഡലുമായിട്ടാണ്. 70.8-75.3 kWh ശ്രേണിയിൽ ലിഥിയം അയൺ ഫോസ്ഫേറ്റ് (LFP) ബാറ്ററിയുള്ള സിംഗിൾ-മോട്ടോർ, ഡ്യുവൽ-മോട്ടോർ വേരിയൻ്റുകളിൽ ഇത് വാഗ്ദാനം ചെയ്യുന്നു. 438 കിലോമീറ്റർ മുതൽ 532 കിലോമീറ്റർ വരെ റേഞ്ചുള്ള ഇവിയിൽ ലെവൽ-2 ADAS പോലുള്ള കിടിലൻ ഫീച്ചറുകളും കൊടുത്തിട്ടുണ്ട്. 20.89 ലക്ഷം മുതലാണ് VF7 ഇലക്ട്രിക് എസ്‌യുവിക്ക് വരുന്ന എക്സ്ഷോറൂം വില.

വിൻഫാസ്റ്റ് VF6

VF7 ഇവിയേക്കാൾ ചെറുതായ VF6 ഒരു കോം‌പാക്‌ട് ഇലക്ട്രിക് എസ്‌യുവിയാണ് രൂപമെടുത്തിരിക്കുന്നത്. സാധാരണയായി 59.6 kWh ബാറ്ററി പായ്ക്കാണ് വാഹനത്തിൽ ഒരുക്കിയിരിക്കുന്നത്. ഫ്രണ്ട്-മോട്ടോർ സജ്ജീകരണവും ഫാസ്റ്റ്-ചാർജിംഗ് ശേഷിയും ചേർന്ന് ഏകദേശം 468 കിലോമീറ്റർ റേഞ്ച് വാഗ്ദാനം ചെയ്യാനും യോഗ്യമാണ്. വിലയായാലും ആരേയും ആകർഷിക്കുന്ന വിധത്തിലാണ് വിയറ്റ്‌നാമീസ് ബ്രാൻഡ് നിശ്ചയിച്ചിരിക്കുന്നത്. 16.49 ലക്ഷം മുതലാണ് ഇതിൻ്റെ പ്രാരംഭ വില വരുന്നത്.