വില 9.99 ലക്ഷം തന്നെ, 365 കിലോമീറ്റർ റേഞ്ചുള്ള ടാറ്റയുടെ പുതിയ ഇലക്‌ട്രിക് എസ്‌യുവി വരുന്നു

ഇലക്ട്രിക് കാറുകളെ ഇന്ത്യക്കാർക്കിടയിൽ ജനകീയരാക്കിയ വാഹന നിർമാതാക്കളാണ് ടാറ്റ മോട്ടോർസ്. നെക്സോൺ ഇവി, ടിഗോർ ഇവി എന്നിവയിലൂടെയായിരുന്നു തുടക്കമെങ്കിലും പിന്നീട് തങ്ങളുടെ നിരയിലെ ജനപ്രിയ മോഡലുകളെയെല്ലാം ബാറ്ററി ഹൃദയം ഘടിപ്പിച്ച് പുറത്തിറക്കാനും കമ്പനി തയാറായി. ടിയാഗോ ഇവി, പഞ്ച് ഇവി, കർവ് ഇവി തുടങ്ങിയവരും വൈദ്യുത വാഹന നിരയിലേക്ക് എത്തിയതോടെ ബ്രാൻഡിൻ്റെ കച്ചോടം ഇരട്ടിയായി ഉയർന്നു. ഇന്ന് ഇവി രംഗത്തെ നമ്പർ 1 ബ്രാൻഡായി മുന്നിലോടുകയാണ് ടാറ്റ. വാഹനങ്ങൾ കൃത്യമായ ഇടവേളകളിൽ പരിഷ്ക്കരിച്ച് വിപണിയിലെത്തിക്കുന്നത് ടാറ്റയുടെ പ്രധാന ഹോബിയാണ്.

അടുത്തിടെ പഞ്ച് മൈക്രോ എസ്‌യുവിയുടെ മുഖംമിനുക്കിയ കമ്പനി ഇപ്പോഴിതാ പഞ്ച് ഇലക്ട്രിക് എസ്‌യുവിയുടെ ഫെയ്‌സ്‌ലിഫ്റ്റ് മോഡലുമായി രംഗത്തിറങ്ങാൻ പോവുകയാണ്. 2026 ഫെബ്രുവരി 20-ാം തീയതി ഇവിയുടെ പുത്തൻ പതിപ്പിനെ ടാറ്റ മോട്ടോർസ് വിപണിയിൽ അവതരിപ്പിക്കുമെന്നാണ് കാർ ആൻഡ് ബൈക്ക് റിപ്പോർട്ട് ചെയ്യുന്നത്. പെട്രോൾ പതിപ്പിനെപ്പോലെ തന്നെ ഇവിക്കും നിരവധി എക്സ്റ്റീരിയർ, ഇൻ്റീരിയർ, ഫീച്ചർ അപ്‌ഗ്രേഡുകൾ ലഭിക്കും.

വിപണിയിലെത്തി ഏകദേശം രണ്ട് വർഷത്തിനുള്ളിലാണ് ടാറ്റ പഞ്ച് ഇവിക്ക് മുഖംമിനുക്കൽ ലഭിക്കുന്നത്. അതേസമയം സാധാരണ പഞ്ചിന് അതിന്റെ മിഡ്-ലൈഫ് അപ്‌ഡേറ്റിനായി നാല് വർഷത്തിലധികം കാത്തിരിക്കേണ്ടി വന്നു. എന്തായാലും സ്റ്റൈലായി വരുന്ന പഞ്ച് ഇലക്ട്രിക്കിനെ സ്വീകരിക്കാൻ വിപണി ഒരുങ്ങിക്കഴിഞ്ഞുവെന്ന് പറയാം. നിലവിലെ 9.99 ലക്ഷമെന്ന പ്രാരംഭ വില അതേപടി നിലനിർത്തായാവും പുത്തൻ മോഡലും വിപണിയിലേക്ക് എത്തുക. ഡിസൈനിലേക്ക് വന്നാൽ പുതിയ ടാറ്റ പഞ്ച് ഇവിയിൽ ICE പതിപ്പിന് സമാമായിരിക്കും എക്സ്റ്റീരിയർ.

ടാറ്റയുടെ നിലവിലെ ഡിസൈൻ ഭാഷ സ്വീകരിച്ച ആദ്യത്തെ മോഡലുകളിൽ ഒന്നായിരുന്നു പഞ്ച് ഇവി. അതിനാൽ വലിയ മാറ്റങ്ങളൊന്നും പ്രതീക്ഷിക്കേണ്ടതില്ല. എന്നിരുന്നാലും കാര്യങ്ങൾ കൂടുതൽ പുതുമയുള്ളക്കാൻ ഷാർപ്പ് എൽഇഡി ഹെഡ്‌ലാമ്പുകൾ, എൽഇഡി ഡിആർഎല്ലുകൾ, കണക്റ്റഡ് എൽഇഡി ടെയിൽലാമ്പുകൾ എന്നിവയെല്ലാം വാഹനത്തിൽ ഇടംപിടിക്കും. ക്ലോസ്‌ജ് പാനൽ ഗ്രിൽ, ഫ്രണ്ട് ചാർജിംഗ് പോർട്ട്, എയ്‌റോ-സ്റ്റൈൽ അലോയ് വീലുകൾ തുടങ്ങിയ ഇവി നിർദ്ദിഷ്ട സ്റ്റൈലിംഗ് ഘടകങ്ങൾ ടാറ്റ നിലനിർത്താൻ സാധ്യതയുണ്ട്.

സവിശേഷതകളുടെയും സുഖസൗകര്യങ്ങളുടെയും കാര്യത്തിൽ പഞ്ച് ഇവി എപ്പോഴും സാധാരണ പഞ്ചിനേക്കാൾ കുറച്ച് ചുവടുകൾ മുന്നിലാണ്. പുതിയ പഞ്ച് ഫെയ്‌സ്‌ലിഫ്റ്റിൽ ലഭിച്ച നിരവധി സവിശേഷതകൾ ഇതിനകം തന്നെ നിലവിലെ പഞ്ച് ഇവിയിൽ വാഗ്ദാനം ചെയ്തിരുന്നുവെന്ന് കണക്കിലെടുക്കുമ്പോൾ ചില വലിയ അപ്‌ഗ്രേഡുകൾ കാണാൻ കഴിഞ്ഞേക്കും. ഇലുമിനേറ്റഡ് സ്റ്റിയറിംഗ് വീൽ, കപ്പാസിറ്റീവ് ടച്ച് കൺട്രോൾ പാനൽ തുടങ്ങിയ ഘടകങ്ങൾ നിലനിർത്തും.

പക്ഷേ ടാറ്റയ്ക്ക് വലിയ 12.3 ഇഞ്ച് ടച്ച്‌സ്‌ക്രീൻ, മികച്ച ഫിറ്റ്, ഫിനിഷ്, കൂടുതൽ പ്രീമിയം അപ്ഹോൾസ്റ്ററി എന്നിവ വൈദ്യുത പതിപ്പിൽ വാഗ്ദാനം ചെയ്യാൻ കഴിയും. 360-ഡിഗ്രി ക്യാമറ, വോയ്‌സ്-ആക്ടിവേറ്റഡ് സൺറൂഫ്, വയർലെസ് ഫോൺ ചാർജർ, ഓട്ടോ-ഡിമ്മിംഗ് IRVM, വെന്റിലേറ്റഡ് ഫ്രണ്ട് സീറ്റുകൾ തുടങ്ങി നിരവധി മോഡൺ ഫീച്ചറുകൾ ഇവിയിൽ തുടർന്നും ലഭ്യമാകും. ബാറ്ററി പായ്ക്ക് ഓപ്ഷനുകളിലും അപ്‌ഡേറ്റുകളൊന്നും പ്രതീക്ഷിക്കേണ്ടതില്ല.

ടാറ്റ മോട്ടോർസിൻ്റെ അഡ്വാൻസ്ഡ് കണക്റ്റഡ് ടെക് ഇൻ്റലിജൻ്റ് ഇലക്ട്രിക് വെഹിക്കിൾ ( Acti.EV) പ്ലാറ്റ്‌ഫോമിലാണ് പഞ്ച് ഇവി പണികഴിപ്പിച്ചിരിക്കുന്നത്. സ്റ്റാൻഡേർഡ് റേഞ്ച്, ലോംഗ് റേഞ്ച് എന്നിങ്ങനെ രണ്ട് മോഡലുകളിലാണ് ഇലക്‌ട്രിക് എസ്‌യുവി വിപണനത്തിന് എത്തുന്നത്. സ്റ്റാൻഡേർഡ് പതിപ്പിന് 25kWh ബാറ്ററി കിട്ടുമ്പോൾ ലോംഗ് റേഞ്ചിന് 35kWh ബാറ്ററി പായ്ക്കാണ് ലഭിക്കുക. ഇലക്ട്രിക് എസ്‌യുവിയിലെ ചെറിയ 25kWh ബാറ്ററി ഓപ്ഷന് 82 bhp കരുത്തിൽ പരമാവധി 114 Nm ടോർക്ക് നിർമിക്കാൻ ശേഷിയുള്ളതാണ്.

മറുവശത്ത് വലിയ 35kWh ബാറ്ററി പായ്ക്ക് 122 bhp പവറിൽ 190 Nm ടോർക്കാണ് ഉത്പാദിപ്പിക്കുക. ഇലക്ട്രിക് എസ്‌യുവിയുടെ സ്റ്റാൻഡേർഡ് റേഞ്ച് വേരിയൻ്റിന് 265 കിലോമീറ്ററും ലോംഗ് റേഞ്ച് പതിപ്പുകൾക്ക് 365 കിലോമീറ്ററുമാണ് ടാറ്റ പഞ്ച് ഇവി അവകാശപ്പെടുന്ന റേഞ്ച് കണക്കുകൾ. 9.5 സെക്കൻഡിനുള്ളിൽ എസ്‌യുവിക്ക് പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കാൻ കഴിയും. അതേസമയം മണിക്കൂറിൽ 140 കിലോമീറ്ററാണ് ടോപ്പ് സ്പീഡ്. പുതിയ നവീകരണത്തിൻ്റെ ഭാഗമായി റേഞ്ച് കണക്കുകളിൽ അൽപം വർധനവുണ്ടായാൽ സംഗതി പൊളിച്ചടുക്കും.