ഔഡി Q8 എസ്‌യുവി 2020 ജനുവരിയിൽ ഇന്ത്യൻ വിപണിയിൽ എത്തും

2025-ഓടെ ഇന്ത്യൻ വിപണിയിൽ തങ്ങളുടെ സാന്നിധ്യം ശക്തിപ്പെടുത്തുകയാണ് ലക്ഷ്യമെന്നും കമ്പനി അറിയിച്ചു. അതിനായി C,D ശ്രേണി വാഹനങ്ങളെ ഇന്ത്യൻ വിപണിയിൽ അണിനിരത്തുകയാണെന്ന് ഔഡി ഇന്ത്യ തലവൻ ബൽബീർ സിംഗ് ദില്ലൺ പറഞ്ഞു. D-വിഭാഗത്തിൽ Q8 വളരെ വലിയ സംഭാവന നൽകുന്നെന്നും അതിനാൽ ഇന്ത്യൻ വിപണിയിൽ വാഹനത്തെ അവതരിപ്പിക്കുകയാണെന്നും അദ്ദേഹം കൂട്ടിച്ചേർത്തു.

ഔഡി ഇന്ത്യ പുതിയ Q8-ന്റെ ബുക്കിംഗ് സ്വീകരിക്കാൻ തുടങ്ങിയതായി റിപ്പോർട്ടുകളുണ്ട്. ബിഎസ്-VI മലിനീകരണ മാനദണ്ഡത്തിന് അനുസൃതമായ ഔഡിയുടെ രണ്ടാമത്തെ കാറായിരിക്കും Q8 എസ്‌യുവി. അടുത്തിടെ പുറത്തിറക്കിയ A6 പ്രീമിയം സെഡാനാണ് കമ്പനിയുടെ ആദ്യത്തെ ബിഎസ്-VI മോഡൽ.

ഉടൻ പുറത്തിറങ്ങുന്ന എസ്‌യുവി ഇറക്കുമതിയായും സിബിയു ഫോർമാറ്റിലുമാകും ലഭ്യമാവുക. ആഢംബര കൂപ്പെകളിൽ നിന്നുള്ള ‘ഫോർ-ഡോർ' ചാരുതയും വലിയ എസ്‌യുവികളുടെ പ്രായോഗികതയുമാണ് Q8-നെ വ്യത്യസ്തമാക്കുന്നത്.

അന്താരാഷ്ട്ര വിപണിയിൽ ലഭ്യമായ ഔഡി Q8-യിൽ 3.0 ലിറ്റർ, ടർബോചാർജ്ഡ്, V6 എഞ്ചിനാണ് വാഗ്ദാനം ചെയ്യുന്നത്. ഇത് 335 bhp കരുത്തിൽ 500 Nm torque ഉത്പാദിപ്പിക്കുന്നു. എട്ട് സ്പീഡ് ടിപ്‌ട്രോണിക് ഓട്ടോമാറ്റിക്ക് ഗിയർബോക്സുമായി ജോടിയാക്കിയ ഈ എഞ്ചിൻ കമ്പനിയുടെ ക്വാട്രോ ഓൾ വീൽ ഡ്രൈവ് അവതരിപ്പിക്കുന്നു.

ത്രീ-സോൺ ക്ലൈമറ്റ് കൺട്രോൾ, ഓട്ടോ ഡിമ്മിംഗ് ഇന്റീരിയർ റിയർ വ്യൂ മിറർ, ഡിജിറ്റൽ കോമ്പസ്, പവർ ഷേഡുകളുള്ള സൺറൂഫ്, വെന്റിലേറ്റഡ് എട്ട്-വേ അഡ്ജസ്റ്റ് ചെയ്യാവുന്ന പവർ ഫ്രണ്ട് സീറ്റുകൾ, ഉയർന്ന ബീം അസിസ്റ്റുള്ള പൂർണ്ണ എൽഇഡി ഹെഡ്‌ലൈറ്റുകള്‍, ക്ലാസിക്ക്, ഇൻഫോടെയിൻമെന്റ് മോഡുകളിൽ പ്രവർത്തിക്കുന്ന 12.3 എൽസിഡി ഡിജിറ്റൽ ഇൻസ്ട്രുമെന്റ് ക്ലസ്റ്റർ എന്നിവയെല്ലാം വാഹനത്തിന്റെ സവിശേഷതകളിൽ ഉൾപ്പെടുന്നു.

Most Read: കലിനന്‍ ബ്ലാക്ക് ബാഡ്ജ് എഡിഷനുമായി റോള്‍സ് റോയ്‌സ്

ആറ് എയർബാഗുകൾ, ഇലക്ട്രോണിക് സ്റ്റെബിലിറ്റി കൺട്രോൾ, ഇബിഡിയുള്ള എബിഎസ്, ടയർ പ്രഷർ മാനേജ്മെന്റ് സിസ്റ്റം, ഇലക്ട്രോമാഗ്നെറ്റിക്ക് പാർക്കിംഗ് ബ്രേക്ക്, എന്നിവ Q8-ലെ സുരക്ഷാ സവിശേഷതകളിൽ ഉൾപ്പെടുന്നു.

Most Read: 2020 ജാഗ്വർ XE ഫെയിസ്‌ലിഫ്റ്റ്‌ ഡിസംബർ നാലിന് ഇന്ത്യൻ വിപണിയിലെത്തും

ഇന്റീരിയറുകളും മറ്റ് ഫീച്ചറുകളും അന്തർദ്ദേശീയ മോഡൽ എസ്‌യുവിയുടെ അതേ രീതിയിൽ തുടരുമെന്നാണ് പ്രതീക്ഷിക്കുന്നത്. പക്ഷേ എഞ്ചിനിൽ ചെറിയ മാറ്റങ്ങൾ ഔഡി വരുത്തുമെന്നാണ് ലഭിക്കുന്ന സൂചന.

Most Read: G 350d എസ്‌യുവിയുടെ മുഴുവൻ യൂണിറ്റുകളും വിറ്റഴിച്ച് മെഴ്‌സിഡീസ് ബെൻസ്

ഔഡി Q8-ന് നിലവിൽ 68,200 യുഎസ് ഡോളറാണ് വില. അതായത് ഏകദേശം 48.66 ലക്ഷം രൂപ. എന്നാൽ ഇന്ത്യൻ പതിപ്പ് എസ്‌യുവിയുടെ വില നിർണ്ണയത്തെക്കുറിച്ച് കമ്പനി ഒരു വിവരവും പുറത്തുവിട്ടിട്ടില്ല. എന്നിരുന്നാലും Q8-ന് 90 ലക്ഷം രൂപയ്ക്ക് മുകളിലായിരിക്കുമെന്ന് പ്രതീക്ഷിക്കുന്നു.