മഹീന്ദ്ര ടിയുവി 300 എന്ന മിനി യുദ്ധടാങ്ക്!!

By Santheep

Updated: Saturday, August 1, 2015, 17:27 [IST]

മഹീന്ദ്രയുടെ പുതിയ എസ്‌യുവിയായി ടിയുവി 300 മോഡലിന്റെ സ്കെച്ചുകൾ പുറത്തുവിട്ടത് ഇക്കഴിഞ്ഞ ദിവസങ്ങളിലാണ്. നേരത്തെ യു301 എന്ന ഒളിപ്പേരിൽ മഹീന്ദ്ര വികസിപ്പിച്ചെടുത്തുകൊണ്ടിരുന്ന വാഹനമാണിത്. ടിയുവി ത്രീ ഡബിൾ ഓ എന്നാണ് വാഹനത്തെ വിളിക്കേണ്ടത്. 300 എന്നത് സീരീസിന്റെ പേരാണ്.

ഈ വാഹനത്തിന്റെ ഒരു ടീസർ വീഡിയോയും മഹീന്ദ്ര പുറത്തുവിട്ടിട്ടുണ്ട്. ടിയുവി 300നെക്കുറിച്ച് ലഭ്യമായ വിവരങ്ങളെല്ലാം താഴെ വായിക്കാം.

അടുത്ത ആറാഴ്ചയ്ക്കുള്ളിൽ ടിയുവി 300 വിപണിയിലെത്തുമെന്ന് കമ്പനി അറിയിക്കുന്നു. അതായത് ദീപാവലിക്കാലത്ത് വാഹനം നിരത്തുകളിലുണ്ടായിരിക്കും എന്ന്.

4 മീറ്ററിനു താഴെയാണ് ടിയുവി 300 മോഡലിന്റെ വലിപ്പം. അതായത് ഇക്കോസ്പോർട് എസ്‌യുവിക്ക് നേരിട്ടുള്ള ഒരെതിരാളി.

യുദ്ധടാങ്കിന്റെ ഡിസൈൻ ശൈലിയുടെ ചുവടുപിടിച്ചാണ് മഹീന്ദ്ര ഡിസൈനർമാർ ഈ കാർ രൂപകൽപന ചെയ്തിരിക്കുന്നത്. കൃത്യമായും ഒരു എസ്‌യുവിയായിരിക്കും ഈ വാഹനമെന്നാണ് കമ്പനി പറയുന്നത്. ഇന്ന് വിപണിയിൽ എസ്‌യുവി എന്ന പേരിൽ ഇടംപിടിച്ചിട്ടുള്ള മിക്ക വാഹനങ്ങളും ക്രോസ്സോവർ സ്വഭാവം പുലർത്തുന്നവയാണ്.

മഹീന്ദ്ര വികസിപ്പിച്ചെടുത്ത എംഹോക്ക്80 എന്ന പുതിയ ഡീസൽ എൻജിനായിരിക്കും ടിയുവി 300 മോഡലിൽ ഘടിപ്പിക്കുക.

ഇതൊരു 1.5 ലിറ്റർ എൻജിനാണ്. മാന്വൽ, സെമി ഓട്ടോമാറ്റിക് ഗിയർബോക്സുകൾ വാഹനത്തിൽ ഘടിപ്പിക്കുമെന്ന് അറിയുന്നു.

ഫോർ വീൽ ഡ്രൈവ് സിസ്റ്റത്തിലായിരിക്കില്ല വാഹനം വരിക. എന്നാൽ, വിൽപന ശരിയായ പാതയിലെത്തിക്കഴിഞ്ഞാൽ ഫോർ വീൽ ഡ്രൈവ് കൊണ്ടുവരാനുള്ള സാധ്യത തള്ളിക്കളയാനാവില്ല.