മാരുതി എസ് ക്രോസ്സിന് പൂഷോ ഡീസല്‍ എന്‍ജിന്‍

മാരുതി സുസൂക്കിയുടെ എസ്എക്‌സ്4 എസ് ക്രോസ് മോഡലില്‍ ഘടിപ്പിക്കുവാനാണ് ഈ എന്‍ജിന്‍ കൊണ്ടുവരുന്നതെന്നാണ് അറിവ്. എക്‌സ്എക്‌സ്4 എസ് ക്രോസ്സിൻറെ ഉൽപാദനത്തോടടുത്ത മോഡൽ ഫെബ്രുവരിയില്‍ നടന്ന ഇന്ത്യന്‍ ഓട്ടോ എക്‌സ്‌പോയില്‍ അവതരിപ്പിക്കപ്പെട്ടിരുന്നു.

നിലവില്‍ എസ് ക്രോസ് ലഭ്യമായ വിപണികളിലെല്ലാം ഡീസല്‍ എന്‍ജിനുകളോടെ ലഭ്യമാണ്. 1.6 ലിറ്റര്‍ ശേഷിയുള്ള ഈ എന്‍ജിനുകള്‍ ഫിയറ്റില്‍ നിന്നാണ് സോഴ്‌സ് ചെയ്യുന്നത്. ഇന്ത്യയില്‍ ഈ വഴിക്കു നീങ്ങാന്‍ മാരുതി തയ്യാറല്ല എന്നാണറിയുന്നത്. 1.3 ലിറ്ററിന്റെ മറ്റൊരെന്‍ജിന്‍ മാരുതി ഫിയറ്റില്‍ നിന്ന് നിലവില്‍ വാങ്ങുന്നുണ്ട്. ഈ എന്‍ജിന്‍ പക്ഷേ എസ് ക്രോസ്സില്‍ ഉപയോഗിക്കുന്നത് തന്ത്രപരമായിരിക്കില്ല.

4.3 മീറ്റര്‍ നീളമുള്ള എസ് ക്രോസ്സിന് ചെറുകാറുകള്‍ക്കുള്ള നികുതിയിളവിന് അര്‍ഹമാകില്ല ഇന്ത്യയില്‍. ഈ നിലയ്ക്ക് ചെറിയ എന്‍ജിന്‍ ഉപയോഗിക്കേണ്ട കാര്യവും വരുന്നില്ല. കുറെക്കൂടി കരുത്തുറ്റ എന്‍ജിനോടെ, കുറെക്കൂടി ഉയര്‍ന്ന ഒരു ഉപഭോക്തൃസമൂഹത്തെ അഭിസംബോധന ചെയ്യാന്‍ മാരുതിക്ക് സാധിക്കും.

പൂഷോയുടെ 1.6 ലിറ്റര്‍ ഡീസല്‍ എന്‍ജിന്റെ 110 കുതിരശക്തിയുള്ള പതിപ്പ് ലഭ്യമാണ്. ഈ പതിപ്പായിരിക്കും എസ് ക്രോസ്സില്‍ ഘടിപ്പിക്കുക.