അശോക് ലെയ്ലാന്‍ഡ് ഇലക്ട്രിക് ബസ്സ് ദില്ലിയില്‍

സിയാം സംഘടിപ്പിച്ച ബസ് ആന്‍ഡ് സ്പെഷ്യല്‍ വെഹിക്കിൾ ഷോയില്‍ അശോക് ലെയ്ലാന്‍ഡിന്‍റെ പുതിയ ഇലക്ട്രിക് ബസ്സ് അവതരിപ്പിക്കപ്പെട്ടു. വേഴ്സ എന്നാണ് ഈ ബസ്സിനു പേര്. പൂര്‍ണമായും ഇലക്ട്രിസിറ്റിയില്‍ പ്രവര്‍ത്തിക്കുന്ന ബസ്സാണിത്. ‌

അശോക് ലെയ്ലാന്ഡിന്‍റെ യുകെ വിഭാഗമായ ഓപ്റ്റയര്‍‌ വികസിപ്പിച്ചെടുത്തതാണ് വേഴ്സ ബസ്സ്.

ഡിസല്‍ എന്‍ജിനില്‍ പ്രവര്‍ത്തിക്കുന്ന ഒരു ബസ്സിന്‍റെ അതേ പ്രകടനശേഷിയുണ്ട് ഈ ബസ്സിനെന്ന് അവകാശപ്പെടുന്നു അശോക് ലെയ്ലാന്‍ഡ്. ഒട്ടും കരിമ്പുക പുറന്തള്ളുന്നില്ല വേഴ്സ. 44 യാത്രികര്‍ക്ക് സുഖമായി ഇരുന്ന് സഞ്ചരിക്കാം ഈ ബസ്സില്‍. ഈ ലോ ഫ്ലോര്‍ ബസ്സ് നഗരങ്ങള്]ക്കിടയിലുള്ള സര്‍വീസുകൾക്ക് അനുയോജ്യമാണെന്നും ലെയ്ലാന്‍ഡ് പറയുന്നു.

എയര്‍ സസ്പെന്‍ഷന്‍ സിസ്റ്റമാണ് വാഹനത്തിലുള്ളത്. വില്‍ചെയര്‍ സ്പേസ് അടക്കമുള്ള സൗകര്യങ്ങൾ നല്‍കിയിട്ടുണ്ട്. 9.7 മീറ്റര്‍ നീളം മുതല്‍ 11.8 മീറ്റര്‍ നീളം വരെയുള്ള അളവുകളില്‍ വാഹനം ലഭിക്കും.