ഹ്യൂണ്ടായ് വെര്‍ണയുടെ 2015 മോഡല്‍ ബുക്കു ചെയ്യാം

ഹ്യൂണ്ടായ് വെര്‍ണയുടെ 2015 പതിപ്പിന്റെ ബുക്കിങ് തുടങ്ങിയതായി അറിയുന്നു. ചില ഡീലര്‍ഷിപ്പുകളില്‍ നിന്നാണ് ഈ വിവരം ലഭിച്ചിരിക്കുന്നത്. നിരവധി മാറ്റങ്ങളോടെയാണ് വെര്‍ണയുടെ 2015 മോഡല്‍ വിപണിയിലെത്തുന്നത്.

ഫെബ്രുവരി 16നാണ് വെര്‍ണയുടെ ലോഞ്ച് നടക്കുക.

പുതിയ വെര്‍ണയില്‍ നിലവിലുള്ള അതേ എന്‍ജിനുകള്‍ തന്നെയാണ് ഉപയോഗിക്കുക. രണ്ട് പെട്രോള്‍ എന്‍ജിനുകളും രണ്ട് ഡീസല്‍ എന്‍ജിനുകളുമാണ് വാഹനത്തിലുള്ളത്.

എന്‍ജിനുകള്‍ വിശദമായി

• 1.4 ലിറ്റര്‍ ശേഷിയുള്ള പെട്രോള്‍ എന്‍ജിനാണ് ഒന്ന്. 105 കുതിരശക്തി പകരുന്നു ഈ എന്‍ജിന്‍. 138 എന്‍എം ആണ് ചക്രവീര്യം. എന്‍ജിനോടൊപ്പം 5 സ്പീഡ് മാന്വല്‍ ഗിയര്‍ബോക്‌സ് ചേര്‍ത്തിരിക്കുന്നു. ഇന്ധനക്ഷമത: ലിറ്ററിന് 17.43 കിലോമീറ്റര്‍.
• 1.6 ലിറ്റര്‍ ശേഷിയുള്ള മറ്റൊരു പെട്രോള്‍ എന്‍ജിന്‍ കൂടി വെര്‍ണയ്ക്കുണ്ട്. 121 കുതിരശക്തിയും 155 എന്‍എം ചക്രവീര്യവും പകരുന്നു. എന്‍ജിനോടൊപ്പം 5 സ്പീഡ് മാന്വല്‍ ഗിയര്‍ബോക്‌സ് ഘടിപ്പിച്ചിരിക്കുന്നു. മൈലേജ്: ലിറ്ററിന് 17.01 കിലോമീറ്റര്‍.
• 1.4 ലിറ്റര്‍ ശേഷിയുള്ള ഡീസല്‍ എന്‍ജിന്‍ പതിപ്പ് 89 കുതിരശക്തി പകരുന്നു. 224 എന്‍എം ആണ് പരമാവധി ചക്രവീര്യം. എന്‍ജിനോടൊപ്പെം 5 സ്പീഡ് മാന്വല്‍ ഗിയര്‍ബോക്‌സ് നല്‍കിയിരിക്കുന്നു. മൈലേജ്: ലിറ്ററിന് 23.5 കിലോമീറ്റര്‍.
• 1.6 ലിറ്റര്‍ ശേഷിയുള്ള ഡീസല്‍ പതിപ്പും വെര്‍ണയ്ക്കുണ്ട്. 126 കുതിരശക്തിയും 259 എന്‍എം ചക്രവീര്യവും വാഹനത്തിനുണ്ട്. എന്‍ജിനോടൊപ്പം 6 സ്പീഡ് മാന്വല്‍ ഗിയര്‍ബോക്‌സാണുള്ളത്. മൈലേജ്: ലിറ്ററിന് 22.32 കിലോമീറ്റര്‍.

ഓട്ടോമാറ്റിക് ഗിയര്‍ബോക്‌സ്?
വെര്‍ണയുടെ പെട്രോള്‍ എന്‍ജിനുകളില്‍ 1.6 ലിറ്റര്‍ പതിപ്പിനോടൊപ്പം ഒരു ഓട്ടോമാറ്റിക് ഗിയര്‍ബോക്‌സ് നല്‍കുന്നുണ്ട് ഹ്യൂണ്ടായ്. ഇത് ഓപ്ഷണലായാണ് നല്‍കുന്നത്. കൂടുതല്‍ വിവരങ്ങള്‍ക്ക് താഴെ ഡാറ്റാബേസിലേക്കു ചെല്ലുക.