ലോകത്തിലെ ആദ്യത്തെ 'ഇ-ഹൈവെ' സ്വീഡനിൽ

By Praseetha

Published: Friday, June 24, 2016, 12:11 [IST]

ഇലക്ട്രിക് റെയിൽവെ സംവിധാനത്തെ കുറിച്ച് നമ്മുക്കേവർക്കും അറിയാമെങ്കിലും ഇലക്ട്രിക് ഹൈവെയെ കുറിച്ച് കേട്ടറിവ് തന്നെയില്ല. എന്നാൽ ഇലക്ട്രിക് ഹൈവേയും കടന്നുവന്നിരിക്കുന്നു. സ്വീഡനിലാണ് ലോകത്തിലെ ആദ്യത്തെ ഇലക്ട്രിക് ഹൈവെ പ്രവർത്തനമാരംഭിച്ചിരിക്കുന്നത്.

2000 വർഷം പഴക്കമുള്ള മരങ്ങളിൽ തീർത്ത ഈ പാതകൾ നിങ്ങളെ ഞെട്ടിക്കും

മധ്യ സ്വീഡനിലെ യാവ്‌ലെയിൽ ഇ16 ഹൈവേയിലാണ് രണ്ട് കിലോമീറ്റർ ദൂരത്തേക്ക് ഇലക്ട്രിക് റോഡ് തുറന്ന് നൽകിയിട്ടുള്ളത്. ജൂൺ 22 നായിരുന്നു സ്വീഡനിലെ പുതിയ ഇ-ഹൈവെ പരീക്ഷണത്തിനായി തുറന്ന് കൊടുത്തത്.

സ്വീഡനിലെ ട്രാൻസ്പോർട്ട് ഭരണസമതിയുമായി കൂടിയാലോചിച്ച് സീമെൻസാണ് ലോകത്തിലെ ആദ്യത്തെ ഇഹൈവെ സിസ്റ്റത്തിന് തുടക്കം കുറിച്ചിരിക്കുന്നത്.

ട്രക്ക് നിർമാതാക്കളായ സ്കാനിയയുമായുള്ള പങ്കാളിത്തത്തിലാണ് സീമെൻസ് ഈ പദ്ധതിയാരംഭിച്ചത്. സീമെൻസിന്റെ ഇഹൈവെ സിസ്റ്റം കാലിഫോർണിയയിലും ആരംഭിക്കുന്നതാണ്.

സ്കാനിയായുടെ ഇലക്ട്രിക് മോട്ടോറുകൾ ഘടിപ്പിച്ച ട്രക്കുകൾ ഉപയോഗിച്ചാണ് ആദ്യഘട്ട പരീക്ഷണയോട്ടം നടത്തിയത്.

ഫോസില്‍ ഇന്ധനങ്ങള്‍ ഉപയോഗിക്കാത്ത വാഹനങ്ങള്‍ സാധ്യമാക്കുക എന്ന ലക്ഷ്യത്തിന്റെ ഭാഗമായാണ് സ്വീഡന്‍ ഈ പദ്ധതിക്ക് തുടക്കമിട്ടത്.

ഫോസില്‍ ഇന്ധനങ്ങള്‍ പാടെ ഉപേക്ഷിച്ച് 2030 ഓടുകൂടി പ്രകൃതി സൗഹൃദമായ ഇലക്ട്രിക് വാഹനങ്ങൾ മാത്രം നിരത്തിലിറക്കമെന്നാണ് സ്വീഡന്റെ ലക്ഷ്യം.

ഇലക്ട്രിക് റെയിൽ പോലെ റോഡിന് മുകളിലായി ഇലക്ട്രിക് ലൈനുകളും സ്ഥാപിച്ചിട്ടുണ്ട്. ഈ ലൈനിലിൽ നിന്നും വൈദ്യുതി സ്വീകരിക്കുന്ന പാന്റോഗ്രാഫ് ഘടിപ്പിച്ച ട്രക്കുകളാണ് പരീക്ഷണത്തിനായി ഉപയോഗിച്ചിരിക്കുന്നത്.

യൂറോ 6 മലിനീകരണ ചട്ടങ്ങള്‍ പാലിക്കുന്ന സ്‌കാനിയയുടെ ഡീസല്‍ ട്രക്കുകളിലാണ് വൈദ്യുത ഹൈവെയിലുള്ള പരീക്ഷണാടിസ്ഥാനത്തിലുള്ള ഓട്ടം നടത്തിയത്.

വണ്ടി ഓടിക്കൊണ്ടിരിക്കുമ്പോൾ തന്നെ പാന്റോഗ്രാഫ് ഉയര്‍ത്തി വൈദ്യുതി സ്വീകരിക്കാനും വൈദ്യുത റോഡ് അവസാനിക്കുന്നയിടത്ത് അത് താഴ്ത്തി ഇന്ധനത്തിൽ ഓടാനും സാധിക്കും.