പുതിയ എൻജിനിൽ കൂടുതൽ സ്റ്റൈലിഷായി ഗ്രാന്റ് ഐ10; വില 4.85ലക്ഷം

കഴിഞ്ഞ വർഷം നടന്ന പാരീസ് മോട്ടോർഷോയിലായിരുന്നു ഗ്രാന്റ് ഐ 10 പുതുക്കിയ മോഡലിന്റെ ആദ്യപ്രദർശനം നടന്നിരുന്നത്. നിലവിൽ വില്പനയിലുള്ള മോഡലിനേക്കാൾ സ്റ്റൈലിഷ് ഡിസൈനിലാണ് ഈ ഹാച്ച്ബാക്കിന്റെ അവതരണം.

ഹെക്സാഗണൽ ഹണികോംമ്പ് ഗ്രിൽ, പുതുക്കിയ ഫോഗ് ലാമ്പ്, എൽഇഡി ഡെ ടൈം റണ്ണിംഗ് ലാമ്പുകൾ എന്നിവ ഉൾപ്പെടുത്തി വാഹനത്തെ പുതുമ ഏറെ വർധിപ്പിച്ചിട്ടുണ്ട്.

ക്രോം ഹാന്റിലുകൾ, റിയർ ഗ്ലാസ് വൈപ്പർ, റൂഫ് സ്പോയിലർ, സ്റ്റോപ് ലാമ്പ്, പുതുക്കിയ അലോയ് വീലുകൾ, സ്പോർടി ലുക്ക് വരുത്തുന്ന പുതുക്കിയ ബംബറുകൾ എന്നിവയും ഈ വാഹനത്തിന്റെ പുതുമകളിൽപ്പെടുന്നു.

7 ഇഞ്ച് ടച്ച്സ്ക്രീൻ ഇൻഫോടെയിൻമെന്റ് സിസ്റ്റം, ത്രീ സ്പോക് മൾട്ടിഫംങ്ഷൻ സ്റ്റിയറിംഗ് വീൽ എന്നിവ ഉൾപ്പെടുത്തി അകത്തളവും പുതുമയുള്ളതാക്കി തീർത്തിട്ടുണ്ട്.

ഇതിനുപുറമെ ഓട്ടോ ഡിമ്മിംഗ് റിയർ വ്യൂ മിറർ, ക്ലൈമറ്റ് കൺട്രോൾ, റിയർ ഏസി വെന്റുകൾ, ഇവക്ട്രിക്കലി അഡ്ജസ്റ്റബിൾ ഒആർവിഎമുകൾ എന്നിവയാണ് ഈ വാഹനത്തിലെ ശ്രദ്ധേയമായിട്ടുള്ള മറ്റ് സവിശേഷതകൾ.

ഈ പുതുമകൾ കൂടാതെ പുതിയ 1.2ലിറ്റർ യു2 സിആർഡിഐ എൻജിനും ഗ്രാന്റ് ഐ10 ഫേസ്‌ലിഫ്റ്റ് മോഡലിന്റെ മറ്റൊരു പ്രധാന സവിശേഷതയാണ്.

കൂടുതൽ ഇന്ധനക്ഷമത വാഗ്ദാനം ചെയ്യുമെന്ന് കമ്പനി അവകാശപ്പെടുന്ന ഈ പുതിയ ഡീസൽ എൻജിന് 75 കുതിരശക്തിയാണുള്ളത്.

അതൊടൊപ്പം 85ബിഎച്ച്പി ഉല്പാദിപ്പിക്കുന്ന 1.2ലിറ്റർ പെട്രോൾ എൻജിനും ഈ ഫേസ്‌ലിഫ്റ്റ് മോഡലിന് കരുത്തേകുന്നുണ്ട്.

ട്രാൻസ്മിഷൻ സംബന്ധിച്ച കാര്യങ്ങൾക്ക് 5 സ്പീഡ് മാനുവൽ ഗിയർബോക്സ്, 4 സ്പീഡ് ഓട്ടോമാറ്റിക് ട്രാൻസ്മിഷൻ എന്നിവയും ഉൾപ്പെടുത്തിയിട്ടുണ്ട്. എന്നാൽ പെട്രോൾ വേരിയന്റിൽ മാത്രമാണ് ഓട്ടോമാറ്റിക് ട്രാൻസ്മിഷൻ ലഭ്യമാവുക.

മാരുതി സ്വിഫ്റ്റ്, ഫോഡ് ഫിഗോ, ടാറ്റ ടിയാഗോ, പുറത്തിറങ്ങാനിരിക്കുന്ന ഹോണ്ട ബ്രിയോ ഫേസ്‌ലിഫ്റ്റ് എന്നീ ഹാച്ച്ബാക്കുകളോട് കിടപിടിക്കുന്നതിനാണ് 2017 ഗ്രാന്റ് ഐ 10 മോഡലിന്റെ അവതരണം.