2017 മാരുതി സുസൂക്കി ദക്ഷിണ്‍ ഡെയര്‍ റാലി; മൂന്നാം ദിനം സുരേഷ് റാണയ്ക്ക് ആധിപത്യം

2017 മാരുതി സുസൂക്കി ദക്ഷിണ്‍ ഡെയര്‍ റാലിയുടെ മൂന്നാം ദിവസം ആധിപത്യം നേടിയത് സുരേഷ് റാണ-അശ്വിന്‍ നായിക്ക് സഖ്യം. 06:59:02 സമയം കൊണ്ട് 495 കിലോമീറ്റര്‍ സഖ്യം പിന്നിട്ടു.

മൂന്നാം ദിനം അയ്മംഗലത്ത് നിന്നും ആരംഭിച്ച റാലി ബെല്‍ഗാമില്‍ അവസാനിച്ചു. ആദ്യ രണ്ട് ദിനങ്ങളിലും ആധിപത്യം നേടിയ സാമ്രാട്ട് യാദവ്, എസ് എന്‍ നിസാമി സഖ്യം, മൂന്നാം ദിനം രണ്ടാം സ്ഥാനത്തേക്ക് പിന്തള്ളപ്പെട്ടു.

07:05:46 സമയം കുറിച്ച സന്ദീപ് ശര്‍മ്മ-കരണ്‍ ആര്യ സഖ്യം അള്‍ട്ടിമേറ്റ് കാര്‍ വിഭാഗത്തില്‍ മൂന്നാമതായി ഫിനിഷ് ചെയ്തു. അള്‍ട്ടിമേറ്റ് ബൈക്ക് വിഭാഗത്തില്‍ ആദ്യ രണ്ട് ദിനങ്ങളുടെ പിന്തുടര്‍ച്ചയാണ് മൂന്നാം ദിനവും കണ്ടത്. 04:29:30 സമയം രേഖപ്പെടുത്തിയ ടി നടരാജ് ഒന്നാമതും, 04:31:26 സമയം രേഖപ്പെടുത്തിയ അബ്ദുള്‍ വാഹിദ് രണ്ടാമതും, 04:35:57 സമയം രേഖപ്പെടുത്തിയ സഞ്ജയ് കുമാര്‍ മൂന്നാമതും ഫിനിഷ് ചെയ്തു.

സംസ്ഥാന അതിര്‍ത്തി പിന്നിട്ട് മഹാരാഷ്ട്രയിലെ കൊലാപൂരിലാണ് നാലം ദിനം റാലി അവസാനിക്കുക.