ഇഗ്നിസിനെ വെല്ലാൻ ഇതാ 'ഗോ ക്രോസ് ' തൊട്ടുപിറകെ!!!

ക്രോസോവർ സെഗ്മന്റിൽ ഡാറ്റ്സൻ അവതരിപ്പിക്കുന്ന ആദ്യവാഹനമാണ് ഗോ ക്രോസ്. 2016 ദില്ലി എക്സ്പോയിൽ ഒരു കൺസ്പെറ്റ് മോഡലായിട്ടായിരുന്നു ഈ വാഹനത്തിന്റെ അവതരണം.

എക്സ്പോ പവല്യനിൽ വച്ചുതന്നെ മികച്ച പ്രതികരണമായിരുന്നു ഗോ ക്രോസിന് ലഭിച്ചിരുന്നത് അതുകൊണ്ട് തന്നെ ഡാറ്റ്സൻ ഈ ക്രോസോവർ മോഡലിന്റെ നിർമാണം ദ്രുതഗതിയിലാക്കുകയായിരുന്നു.

ഏപ്രിലോടുകൂടി നിസാൻ എക്സ്ട്രെയിൽ ഹൈബ്രിഡ് വിപണിയിലെത്തിയതിനു ശേഷമായിരിക്കും ഡാറ്റ്സൻ ഗോ ക്രോസ് മോഡലിന്റെ അവതരണമുണ്ടാവുക.

1.2ലിറ്റർ, 1.5ലിറ്റർ ടിഡിസിഐ ഡീസൽ എൻജിനായിരിക്കും ഗോ ക്രോസിന് കരുത്തേകുന്നത്. നിസാൻ മൈക്രയ്ക്ക് കരുത്തേകുന്നവയാണ് ഈ രണ്ട് എൻജിനുകളും.

ദൈനംദിന ഉപയോഗം, നാഗരിക ഉപയോഗം എന്നിവയ്ക്കു പുറമെ അത്യാവശ്യം അവധിക്കാല യാത്രകൾക്കും ഉപയോഗിക്കാൻ തക്കരീതിയിൽ രൂപകല്പന നടത്തിയിട്ടുള്ള വാഹനമാണിത്.

ബോക്സി ഡിസൈൻ കൈവരിച്ചിരിക്കുന്ന ഗോ ക്രോസിൽ ഹെക്സാഗണൽ ഗ്രിൽ, എൽഇഡി ഹെഡ്‌ലൈറ്റ്, സ്കിഡ് പ്ലേറ്റ്, പ്ലാസ്റ്റിക് ക്ലാഡിംഗ് എന്നീ സവിശേഷതകളാണ് പുറമെ നൽകിയിരിക്കുന്നത്.

സാഹസികത ഇഷ്ടപ്പെടുന്ന പുത്തൻ തലമുറയെയാണ് ഈ മോഡൽ ലക്ഷ്യമിടുന്നത്. ഡാറ്റ്സന്റെ ഗോ പ്ലസ് മോഡലിനു സമാനമായ മൂന്നു നിര സീറ്റാണ് ഈ ക്രോസോവറിലും ഉള്ളത്. എന്നാൽ ഡിസൈനും ഫീച്ചറുകളും ഗോ പ്ലസിൽ നിന്നു വിഭിന്നമാണ്.

ഈ വർഷം പകുതിയോടു കൂടി വിപണിയിലെത്തുമെന്ന് കരുതുന്ന ഈ വാഹനത്തിന് ഏതാണ്ട് അഞ്ചു ലക്ഷത്തോളമായിരിക്കും വില.

നാലാമതായി ഡാറ്റ്സൻ വിപണിയിലെത്തിക്കുന്ന ഈ ക്രോസോവറിന് പുറത്തിറങ്ങാനിരിക്കുന്ന മാരുതി ഇഗ്നിസ്, ഹ്യുണ്ടായ് ആക്ടീവ് ഐ20, ടൊയോട്ട എത്യോസ് ക്രോസ് എന്നീ മോഡലുകളായിരിക്കും മുൻനിര എതിരാളികളാവുക.

വിപണിയും കാത്ത് പുത്തൻ ഷവർലെ എസ്‌യുവി ട്രെയിൽബ്ലെയ്സർ

ടൊയോട്ട ആഡംബരക്കാർ ലക്സസ് മാർച്ചിൽ