ജിഎസ്ടി എഫക്ട്; മാരുതി സുസൂക്കി കാറുകളുടെ വില കുറഞ്ഞു

ജിഎസ്ടിയുടെ മുഴുവന്‍ ആനുകൂല്യവും ഉപഭോക്താക്കളില്‍ എത്തിക്കുകയാണ് തങ്ങളുടെ ലക്ഷ്യമെന്ന് മാരുതി വ്യക്തമാക്കി. പുതിയ നടപടിയുടെ പശ്ചാത്തലത്തില്‍ മാരുതി കാറുകളുടെ എക്‌സ്‌ഷോറൂം വിലകളില്‍ മൂന്ന് ശതമാനം വരെ കുറവ് രേഖപ്പെടുത്തും.

ജിഎസ്ടിക്ക് മുമ്പ് നിലനിന്നിരുന്ന മൂല്യവര്‍ധിത നികുതിയെ അടിസ്ഥാനപ്പെടുത്തി വിലക്കുറവില്‍ നേരിയ വ്യത്യാസമുണ്ടാകുമെന്നും മാരുതി സൂചിപ്പിച്ചു.

ജിഎസ്ടി പ്രാബല്യത്തില്‍ കൊണ്ട് വന്ന കേന്ദ്ര നടപടി അഭിനന്ദാര്‍ഹമാണെന്നും ഇത് വിപണിയില്‍ വിപ്ലവ മാറ്റങ്ങള്‍ ഒരുക്കുമെന്നും മാരുതി സുസൂക്കി സിഇഒ, കെനിച്ചി അയൂഖവ പറഞ്ഞു.

അതേസമയം, ഹൈബ്രിഡ് കാറുകള്‍ക്ക് മേലുള്ള വര്‍ധിച്ച നികുതി, സ്മാര്‍ട്ട് ഹൈബ്രിഡ് സിയാസ് ഡീസല്‍, സ്മാര്‍ട്ട് ഹൈബ്രിഡ് എര്‍ട്ടിഗ ഡീസല്‍ കാറുകളുടെ വില വര്‍ധിപ്പിച്ചുവെന്നും മാരുതി അറിയിച്ചു.

ജൂലായ് ഒന്ന് മുതല്‍ ജിഎസ്ടി നിരക്കിനെ അടിസ്ഥാനപ്പെടുത്തി പുതുക്കിയ വില മാരുതി കാറുകളില്‍ പ്രാബല്യത്തില്‍ വരും.