പുതിയ മാരുതി ഡിസൈറിലും പ്രശ്‌നങ്ങള്‍?; ഡീലര്‍ഷിപ്പുകളില്‍ ഡെലിവറി നിര്‍ത്തിവെച്ചതായി റിപ്പോര്‍ട്ട്

2017 ഡിസൈറിലെ സ്റ്റീയിറിംഗ് അസംബ്ലിയിലാണ് പ്രശ്‌നങ്ങള്‍ കണ്ടെത്തിയിരിക്കുന്നത്. പുതിയ ഡിസൈറിന്റെ സ്റ്റീയറിംഗ് അസംബ്ലി മാറ്റിസ്ഥാപിക്കാനുള്ള നടപടികള്‍ മാരുതി ആരംഭിച്ചതായി റിപ്പോര്‍ട്ട് വ്യക്തമാക്കുന്നു. TeamBHP യാണ് ഇതുസംബന്ധമായ വിവരങ്ങള്‍ ലഭ്യമാക്കിയത്.

പ്രശ്‌നം പരിഹരിക്കപ്പെടുന്നത് വരെ ഡിസൈറുകളുടെ വില്‍പന നിര്‍ത്തിവെയ്ക്കാന്‍ ഡീലര്‍ഷിപ്പുകളോട് മാരുതി ആവശ്യപ്പെട്ടതായും സൂചനയുണ്ട്.

എന്നാല്‍ പുതിയ എല്ലാ ഡിസൈര്‍ മോഡലിലും സ്റ്റീയറിംഗ് അസംബ്ലി പ്രശ്‌നമുണ്ടോ, അതോ പ്രത്യേക ബാച്ചില്‍ നിന്നുമുള്ള മോഡലുകള്‍ക്ക് മാത്രമാണോ എന്നതില്‍ വ്യക്തത ലഭിച്ചിട്ടില്ല.

നിലവില്‍ ഡീലര്‍ഷിപ്പുകളില്‍ പുതിയ സ്റ്റീയറിംഗ് അസംബ്ലിയെ മാരുതിഎത്തിച്ച് കൊണ്ടിരിക്കുകയാണ്. ഡിസൈര്‍ മോഡലുകളുടെ ഡെലിവറിക്ക് മുമ്പ് തന്നെ സ്റ്റീയറിംഗ് അസംബ്ലി മാറ്റിസ്ഥാപിക്കണമെന്ന് ഡീലർഷിപ്പുകൾക്ക് മാരുതിയുടെ കർശന നിർദ്ദേശവുമുണ്ട്.

ഡീലര്‍ഷിപ്പുകളിലേക്ക് എത്താനിരിക്കുന്ന ഡിസൈറുകളിലും മാരുതി സ്റ്റീയറിംഗ് അസംബ്ലി മാറ്റുന്നതായും റിപ്പോര്‍ട്ടുകള്‍ പറയുന്നു.

രണ്ട് എഞ്ചിന്‍ ഓപ്ഷനുകളിലാണ് മൂന്നാം തലമുറ മാരുതി ഡിസൈര്‍ ലഭ്യമാകുന്നത്. 1.2 ലിറ്റര്‍ ഫോര്‍-സിലിണ്ടര്‍ പെട്രോള്‍ എഞ്ചിന്‍, 1.3 ലിറ്റര്‍ ഫോര്‍-സിലിണ്ടര്‍ ഡീസല്‍ എഞ്ചിനുകളിലാണ് ഡിസൈര്‍ എത്തുന്നത്.

ഇരു എഞ്ചിന്‍ വേര്‍ഷനുകളിലും 5 സ്പീഡ് മാനുവല്‍ ഗിയര്‍ബോക്‌സ് അല്ലെങ്കില്‍ എഎംടി ഗിയര്‍ബോക്‌സുകളാണ് ഉപഭോക്താക്കള്‍ക്ക് ലഭിക്കുക.