തകർപ്പൻ ബുക്കിംഗ്; താരം ഫോർച്യൂണർ തന്നെ!!!

അരങ്ങേറ്റം കുറിച്ച് രണ്ടുമാസത്തിനകം ഈ പ്രീമിയം എസ്‌യുവിയുടെ 10,000യൂണിറ്റുകളാണ് കമ്പനി വിറ്റഴിച്ചിട്ടുള്ളത്. കഴിഞ്ഞവർഷം നവംബറിലായിരുന്നു അവതരണം അതിനുതൊട്ടു പിന്നാലെ തന്നെ വാഹനകൈമാറ്റവും ആരംഭിച്ചിരുന്നു.

അയ്യായിരത്തോളം പേർക്കാണ് ഇതുവരെയായി വാഹനം കൈമാറിയിരിക്കുന്നത്. ഇതിനകം ബുക്കിംഗ് തികച്ചവർക്ക് കാത്തിരിപ്പു സമയം ഒഴിവാക്കി പുതിയ ഫോർച്യൂണർ ലഭ്യമാക്കുമെന്നും കമ്പനി അറിയിച്ചിട്ടുണ്ട്.

നിലയിൽ പുത്തൻ ഫോർച്യൂണർ സ്വന്തമാക്കാൻ രണ്ടു മുതൽ മൂന്നു മാസം വരെ കാത്തിരിക്കേണ്ട സ്ഥിതിയാണുള്ളത്.

ഇതുവരെയായി ഉപഭോക്താക്കളിൽ നിന്നും മികച്ച പ്രതികരണമാണ് ലഭിച്ചുക്കൊണ്ടിരിക്കുന്നതെന്ന് കമ്പനി ഡയറക്ടറും മാർക്കറ്റിങ് ആൻഡ് സെയിൽസ് സീനിയർ വൈസ് പ്രസിഡന്റുമായ എൻ രാജ അറിയിച്ചു.

കറൻസി വിലക്കു മൂലം സാമ്പത്തിക മേഖലയിലുണ്ടായ അനിശ്ചിതത്വത്തിനിടയിലും മികച്ച സ്വീകാര്യത കൈവരിച്ചു മുന്നേറാൻ പുതിയ ‘ഫോർച്യൂണറിന് സാധിച്ചതും വൻവിജയമായി കമ്പനി കണക്കാക്കുന്നു.

ഫോർച്യൂണറിന്റെ ടു വീൽ ഡ്രൈവ്, ഫോർ വീൽ ഡ്രൈവ് മോഡലുകളിൽ ഓട്ടമാറ്റിക് ട്രാൻസ്മിഷനുള്ള വകഭേദത്തിനാണ് കൂടുതൽ പ്രതിപത്തിയെന്നാണ് കമ്പനി വ്യക്തമാക്കുന്നത്.

ഫോർച്യൂണറിന്റെ മുന്തിയ വകഭേദങ്ങൾക്കാണു കൂടുതൽ ആവശ്യക്കാർ. ബുക്കിങ്ങിൽ 60 ശതമാനവും സൂപ്പർ വൈറ്റ് നിറമുള്ള ഫോർച്യൂണറാണ് മുൻനിരയിൽ.

ക്രോം ഗ്രിൽ, പുതിയ ശൈലിയിലുള്ള ഹെഡ്‌ലൈറ്റ്, എൽഇഡി ഡിആർഎൽ, 18 ഇഞ്ച് അലോയ് വീൽ, പുതിക്കിയ ടെയിൽലാമ്പ് എന്നിവയാണ് പുതിയ ഫോർച്യൂണറിന്റെ ഡിസൈൻ സവിശേഷതകൾ.

മുൻ മോഡലുകളിൽ നിന്ന് വിഭിന്നമായി പുത്തൻ തലമുറയിൽ പെട്രോൾ വകഭേദവും ഉൾപ്പെടുത്തിയിട്ടുണ്ട്. ഇന്നോവ ക്രിസ്റ്റയിലേതിനു സമാനമായിട്ടുള്ള ഡീസൽ, പെട്രോൾ എൻജിനുകളാണ് പുതിയ ഫോർച്യൂണറിന്റെ കരുത്ത്.

164 ബിഎച്ച്പി കരുത്തുള്ളതാണ് ഇതിലെ 2.7ലിറ്റർ പെട്രോൾ എൻജിൻ. 2.8ലിറ്റർ ഡീസൽ എൻജിന് 174 ബിഎച്ച്പി കരുത്താണുള്ളത്.

ട്രാൻസ്മിഷനെ കുറിച്ച് പറയുകയാണെങ്കിൽ 5 സ്പീഡ് മാനുവൽ, 6 സ്പീഡ് ഓട്ടോമാറ്റിക് എന്നിവയാണ് പെട്രോൾ വകഭേദത്തിലുള്ളത്. 6 സ്പീഡ് മാനുവൽ, ഓട്ടോമാറ്റിക് ട്രാൻസ്മിഷനാണ് ഡീസൽ ഫോർച്യൂണറിലുള്ളത്. കൂടാതെ ഫോർവീൽ ഡ്രൈവും ഈ വേരിയന്റിൽ ലഭ്യമാക്കിയിട്ടുണ്ട്.

പെട്രോൾ മാനുവൽ ലിറ്ററിന് 10.01 കിമി മൈലേജ് നൽകുമ്പോൾ പെട്രോൾ ഓട്ടോമാറ്റികിന് 10.26 കിമി/ലി ആണ് മൈലേജ്. ഡീസൽ മാനുവലാകട്ടെ ലിറ്ററിന് 14.24 കിമി മൈലേജും ഓട്ടോമാറ്റിക് ലിറ്ററിന്12.90 കി.മി മൈലേജുമാണ് വാഗ്ദാനം ചെയ്യുന്നത്.

എസ്‌‌യുവി വിഭാഗത്തിലാദ്യമായി ഓട്ടോമാറ്റിക് എൽഇഡി പ്രൊജക്ടർ ഹെഡ്‌ലാമ്പ് ഉൾപ്പെടുത്തിയിട്ടുള്ള വാഹനമാണ് പുതിയ ഫോർച്യൂണർ. വൈദ്യുതി നിയന്ത്രിത ബാഹ്യമിററുകൾ, ബട്ടൺ അമർത്തി തുറക്കാവുന്ന ഡിക്കി ഡോർ, എട്ട് വിധത്തിൽ ക്രമീകരിക്കാവുന്ന ഡ്രൈവർ സീറ്റ്, ലെതർ അപ്ഹോൾസ്ട്രി, 7 ഇഞ്ച് ടച്ച് സ്ക്രീൻ ഇൻഫോടെയിൻമെന്റ് സിസ്റ്റം, ഓട്ടോമാറ്റിക് ക്ലൈമറ്റ് കൺട്രോൾ എന്നിവയാണ് സെവൻ സീറ്റർ ഫോർച്യൂണറിന്റെ സവിശേഷതകൾ.

സുരക്ഷ കണക്കിലെടുത്ത് 7 എയർബാഗുകൾ, എബിഎസ്, ഹിൽഹോൾഡ് അസിസ്റ്റ്, ഹിൽ ഡിസന്റ് കൺട്രോൾ, ക്രൂസ് കൺട്രോൾ എന്നീ ഫീച്ചറുകളും നൽകിയിട്ടുണ്ട്.