ആദ്യ ക്രോസ്ഓവര്‍ ഹാച്ച്ബാക്കുമായി ഫോര്‍ഡ്; പുതിയ ഫ്രീസ്റ്റൈല്‍ ഇന്ത്യയിൽ — അറിയേണ്ടതെല്ലാം

വിപണിയില്‍ വില്‍പനയിലുള്ള ഫിഗൊ ഹാച്ച്ബാക്കിനെ അടിസ്ഥാനപ്പെടുത്തിയാണ് പുതിയ ഫോര്‍ഡ് ഫ്രീസ്റ്റൈലിന്റെ ഒരുക്കം. ഈ വര്‍ഷം രണ്ടാം പാദത്തോടെ ഫോര്‍ഡ് ഫ്രീസ്റ്റൈല്‍ വിപണിയില്‍ ലഭ്യമാകും.

ഏറ്റവും പുതിയ ഡ്രാഗണ്‍ നിര എഞ്ചിനുകളാണ് പുത്തന്‍ ഫോര്‍ഡ് അവതാരത്തിന്റെ വിശേഷം. ഫ്രീസ്റ്റൈലില്‍ ഒരുങ്ങിയിരിക്കുന്ന പൂര്‍ണ അലൂമിനിയം 1.2 ലിറ്റര്‍, ത്രീ-സിലിണ്ടര്‍ എഞ്ചിന്‍ ശ്രേണിയിലെ ഏറ്റവും കരുത്തന്‍ പതിപ്പാണ്.

94.6 bhp കരുത്തും 120 Nm torque ഉം ഉത്പാദിപ്പിക്കുന്നതാണ് 1.2 ലിറ്റര്‍ എഞ്ചിന്‍. പുതിയ ഡ്രാഗൺ നിര എഞ്ചിനൊപ്പം പുത്തന്‍ ഗിയര്‍ബോക്‌സും ഫ്രീസ്റ്റൈലിന്റെ ഹൈലൈറ്റാണ്. 'ഗെട്രാഗില്‍' നിന്നുള്ള പുത്തന്‍ 5 സ്പീഡ് മാനുവല്‍ ഗിയര്‍ബോക്‌സിലാണ് ഫോര്‍ഡ് ഫ്രീസ്റ്റൈലിന്റെ വരവ്.

പരീക്ഷിച്ച് വിജയിച്ച 1.5 ലിറ്റര്‍, ത്രീ-സിലിണ്ടര്‍ ഡീസല്‍ എഞ്ചിനും ഫ്രീസ്റ്റൈലില്‍ ഫോര്‍ഡ് നല്‍കുന്നുണ്ട്. ഫിഗൊയെക്കാളും 15 mm വര്‍ധിച്ച സസ്‌പെന്‍ഷനാണ് ഫോര്‍ഡ് ഫ്രീസ്റ്റൈലില്‍ സാന്നിധ്യമറിയിക്കുന്നത്.

189 mm ആണ് പുതിയ ക്രോസ്ഓവറിന്റെ ഗ്രൗണ്ട് ക്ലിയറന്‍സ്. ഫ്രീസ്റ്റൈലിന്റെ ടയറുകളിലും ഫോര്‍ഡ് പുതുമ ഒരുക്കിയിട്ടുണ്ട്. 15 ഇഞ്ച് വീലുകളില്‍ 185/60 R15 ഗുഡ്ഇയര്‍ അഷൂറന്‍സ് ടയറുകളാണ് ഇടംപിടിക്കുന്നത്.

ഫോര്‍ഡ് ഫ്രീസ്റ്റൈല്‍ ഡിസൈന്‍

ഫിഗൊ ഹാച്ച്ബാക്കിനെ അടിസ്ഥാനമാക്കിയാണ് ഫോര്‍ഡ് ഫ്രീസ്റ്റൈലിന്റെ വരവ്. അതേസമയം രൂപത്തിലും ഭാവത്തിലും പരുക്കനാണ് ഫ്രീസ്റ്റൈല്‍.

മസ്താംഗില്‍ നിന്നും പ്രചോദനം ഉള്‍ക്കൊണ്ട ഹെക്‌സഗണല്‍ ഹണികോമ്പ് ഗ്രില്ലാണ് ഫ്രീസ്റ്റൈലിന്റെ മുഖരൂപത്തെ കാര്യമായി സ്വാധീനിക്കുന്നുണ്ട്. ഒപ്പം പുതിയ ബോണറ്റും ഫ്രീസ്റ്റൈലിന് ലഭിച്ചിട്ടുണ്ട്.

സ്വെപ്റ്റ്ബാക്ക് ഹെഡ്‌ലാമ്പുകളാണ് പുതിയ ഗ്രില്ലിന് ഇരുവശത്തുമായി നിലയുറപ്പിച്ചിരിക്കുന്നത്. ഹെഡ്‌ലാമ്പുകള്‍ക്ക് കീഴെ ഇരുവശത്തുമായി ഫോഗ് ലാമ്പുകളുമുണ്ട്. ഫൊക്‌സ് സ്‌കിഡ് പ്ലേറ്റിനൊപ്പമാണ് പുതിയ ബമ്പര്‍ കാണപ്പെടുന്നത്.

പരുക്കന്‍ പരിവേഷത്തിനോട് നീതിപുലര്‍ത്താന്‍ ബ്ലാക് ക്ലാഡിംഗും ഫ്രീസ്റ്റൈലിന്റെ ബമ്പറില്‍ ഫോര്‍ഡ് നല്‍കിയിട്ടുണ്ട്. ബമ്പറില്‍ നിന്നു വശങ്ങളിലേക്കും പിന്നിലേക്കും തുടരുന്ന ബ്ലാക് ക്ലാഡിംഗ് ആരുടെയും ശ്രദ്ധയാകര്‍ഷിക്കും.

റൂഫ് റെയിലുകളും ഡോറുകളിലൂടെയുള്ള സ്‌ട്രൈപുകളും ക്രോസ്ഓവറിന്റെ സ്‌പോര്‍ടി ടാഗിന് പിന്തുണ അര്‍പ്പിക്കുന്നതാണ്. ഫിഗൊയ്ക്ക് സമാനമാണ് ഫോര്‍ഡ് ഫ്രീസ്റ്റൈലിന്റെ റിയര്‍ എന്‍ഡ്.

അകത്തളത്തും ഇതേ ഫിഗൊ എഫക്ട് അനുഭവപ്പെടും. ഡാഷ്‌ബോര്‍ഡിന് മുകളിലായുള്ള പുതിയ 6.5 ഇഞ്ച് ഇന്‍ഫോടെയ്ന്‍മെന്റ് സംവിധാനമാണ് അകത്തളത്തെ പ്രധാന ആകര്‍ഷണം.

ആന്‍ഡ്രോയ്ഡ് ഓട്ടോ, ആപ്പിള്‍ കാര്‍പ്ലേ ഫീച്ചറുകള്‍ ഫോര്‍ഡ് Sync 3 ഇന്‍ഫോടെയ്ന്‍മെന്റ് സംവിധാനത്തിന്റെ ഭാഗമായി ലഭ്യമാണ്. ദുര്‍ഘടമേറിയ ഇന്ത്യന്‍ റോഡുകള്‍ക്കുള്ള ഫോര്‍ഡിന്റെ സമര്‍പ്പണമാണ് പുതിയ ഫ്രീസ്റ്റൈല്‍.

പുതിയ കരുത്തന്‍ എഞ്ചിന്‍, ഉയര്‍ന്ന ഗ്രൗണ്ട് ക്ലിയറന്‍സ്, പുതിയ ഇന്‍ഫോടെയ്ന്‍മെന്റ് സംവിധാനം - ഫ്രീസ്റ്റൈലിനെ തെരഞ്ഞെടുക്കാന്‍ ഉപഭോക്താക്കള്‍ക്ക് വേറെ പുതിയ കാരണങ്ങള്‍ ഒന്നും വേണ്ട.

ഹ്യുണ്ടായി i20 ആക്ടിവ്, ടൊയോട്ട എത്തിയോസ് ക്രോസ്, ഫിയറ്റ് അര്‍ബന്‍ ക്രോസ് എന്നിവരുമായി ഫോര്‍ഡ് ഫ്രീസ്റ്റൈല്‍ വിപണിയില്‍ കൊമ്പുകോര്‍ക്കും.