പരുക്കന്‍ എസ്‌യുവിയുമായി ഫോര്‍ഡ്; ഇതാണ് പുതിയ ഇക്കോസ്‌പോര്‍ട് സ്‌റ്റോം എഡിഷന്‍

പക്ഷെ ശേഷം സംഭവിച്ച കോമ്പാക്ട് എസ്‌യുവികളുടെ കുത്തൊഴുക്കില്‍ ഇക്കോസ്‌പോര്‍ടിന് കാലിടറി. കൈവിട്ട പ്രതാപം തിരിച്ചുപിടിക്കാന്‍ വേണ്ടിയാണ് അടുത്തിടെ പുത്തന്‍ ഇക്കോസ്‌പോര്‍ടിനെ ഫോര്‍ഡ് ഇന്ത്യയില്‍ അവതരിപ്പിച്ചത്.

പ്രതീക്ഷിച്ച പോലെ ഇന്ത്യയില്‍ മികച്ച പ്രതികരണവും പുതിയ ഇക്കോസ്‌പോര്‍ട് നേടി. കാര്യങ്ങള്‍ ശുഭകരമായി നീങ്ങുന്നതിനിടെ പുതിയ ഇക്കോസ്‌പോര്‍ട് സ്‌റ്റോം പതിപ്പിനെ അമേരിക്കന്‍ നിര്‍മ്മാതാക്കള്‍ ഇപ്പോള്‍ പുറത്ത് കൊണ്ടുവന്നിരിക്കുകയാണ്.

കോമ്പാക്ട് എസ്‌യുവിയുടെ പരുക്കന്‍ പരിവേഷമാണ് ഇക്കോസ്‌പോര്‍ട് സ്‌റ്റോം. ബ്രൗണ്‍, വൈറ്റ്, ഗ്രെയ്, ബ്ലാക് എന്നീ നാല് നിറഭേദങ്ങളിലാണ് പുതിയ ഇക്കോസ്‌പോര്‍ട് സ്‌റ്റോമിന്റെ അവതരണം.

ബ്രസീലിയന്‍ വിപണിയിലേക്കാണ് പുതിയ ഇക്കോസ്‌പോര്‍ട് സ്‌റ്റോമിനെ ഫോര്‍ഡ് ആദ്യമായി നല്‍കിയിരിക്കുന്നത്. 99,990 ബ്രസീലിയന്‍ റയാലാണ് പുതിയ എസ്‌യുവിയുടെ വില (എകദേശം ഇരുപത് ലക്ഷം രൂപ).

പരിഷ്‌കരിച്ച രൂപഭാവമാണ് സ്റ്റോം പതിപ്പിന്റെ പ്രധാന ആകര്‍ഷണം. വലുപ്പമാര്‍ന്ന സ്റ്റോം ബാഡ്ജിംഗ് നേടിയ ഫ്രണ്ട് ഗ്രില്‍ തന്നെ എസ്‌യുവിയുടെ പരുക്കന്‍ മുഖഭാവം വെളിപ്പെടുത്തും.

എല്‍ഇഡി ഡെയ്‌ടൈം റണ്ണിംഗ് ലൈറ്റുകളോടെയുള്ള സിനോണ്‍ ഹെഡ്‌ലൈറ്റുകളും ഇക്കോസ്‌പോര്‍ട് സ്‌റ്റോമിന്റെ പരുക്കന്‍ പരിവേഷത്തിന് ശക്തമായ പിന്തുണ അര്‍പ്പിക്കുന്നുണ്ട്.

ബ്ലാക് ഫോഗ് ലാമ്പ് ഹൗസിംഗ്, ബോണറ്റിനും വശങ്ങള്‍ക്കും കുറുകെയുള്ള സ്‌പോര്‍ടി ബ്ലാക് സ്‌ട്രൈപുകള്‍, വെട്ടിച്ചുരുക്കിയ ഫ്രണ്ട് ബമ്പര്‍ എന്നിവ ഇക്കോസ്‌പോര്‍ട് സ്‌റ്റോമിന്റെ ഡിസൈന്‍ സവിശേഷതകളാണ്.

ഡോറുകള്‍ക്ക് സ്‌റ്റോം ഡീക്കലുകളും ലഭിച്ചിട്ടുണ്ട്. എസ്‌യുവിയുടെ സ്‌പോര്‍ടി ടാഗിനോട് നീതി പുലര്‍ത്തുന്നതാണ് ഡാര്‍ക്ക് ലണ്ടന്‍ ഗ്രെഡ് കളര്‍ കോമ്പിനേഷനിലുള്ള ഔട്ട്‌സൈഡ് റിയര്‍ വ്യൂ മിററുകള്‍.

പുത്തന്‍ 17 ഇഞ്ച് അലോയ് വീലുകളില്‍ സ്റ്റാന്‍ഡേര്‍ഡ് മിഷലിന്‍ ടയറുകളാണ് ഇടംപിടിക്കുന്നത്. ഓറഞ്ച്-ഗ്രെയ് ഡ്യൂവല്‍-ടോണ്‍ കളര്‍ സ്‌കീമിലാണ് അകത്തളം. ലെതര്‍ അപ്‌ഹോള്‍സ്റ്ററിക്ക് സ്‌റ്റോം ബാഡ്ജിംഗും ഫോര്‍ഡ് നല്‍കിയിട്ടുണ്ട്.

ആന്‍ഡ്രോയ്ഡ് ഓട്ടോ, ആപ്പിള്‍ കാര്‍പ്ലേ, നാവിഗേഷന്‍ ഫീച്ചറുകളോടെയുള്ള 8.0 ഇഞ്ച് Sync3 ടച്ച്‌സക്രീന്‍ ഇന്‍ഫോടെയ്ന്‍മെന്റ് സംവിധാനമാണ് മറ്റൊരു ഇന്റീരിയര്‍ ആകര്‍ഷണം.

ഏഴ് എയര്‍ബാഗുകള്‍, ഇബിഡിക്ക് ഒപ്പമുള്ള എബിഎസ്, സ്റ്റബിലിറ്റി കണ്‍ട്രോള്‍, ട്രാക്ഷന്‍ കണ്‍ട്രോള്‍, ഹില്‍-അസിസ്റ്റ്, ആന്റി-റോള്‍ഓവര്‍ സിസ്റ്റം, റിവേഴ്‌സിംഗ് ക്യാമറയ്ക്ക് ഒപ്പമുള്ള പാര്‍ക്കിംഗ് അസിസ്റ്റ് എന്നിങ്ങനെ നീളുന്ന സ്റ്റോം എഡിഷന്റെ സുരക്ഷാമുഖം.

പെട്രോള്‍, ഡീസല്‍ വകഭേദങ്ങളില്‍ ഫോര്‍ഡ് ഇക്കോസ്‌പോര്‍ട് സ്‌റ്റോം എഡിഷന്‍ ലഭ്യമാണ്. 170 bhp കരുത്തും 202 Nm torque ഉം ഉത്പാദിപ്പിക്കുന്നതാണ് 2.0 ലിറ്റര്‍ പെട്രോള്‍ എഞ്ചിന്‍.

176 bhp കരുത്തും 221 Nm torque മാണ് 2.0 ലിറ്റര്‍ ഡീസല്‍ എഞ്ചിന്‍ ഉത്പാദിപ്പിക്കുക. ഇരു എഞ്ചിന്‍ വകഭേദങ്ങളിലും 6 സ്പീഡ് ഓട്ടോമാറ്റിക് ടോര്‍ഖ് കണ്‍വേര്‍ട്ടര്‍ ഗിയര്‍ബോക്‌സ് മുഖേന നാല് വീലുകളിലേക്കും കരുത്തെത്തും.

ഇക്കോസ്‌പോര്‍ട് സ്‌റ്റോം എഡിഷന്റെ ഇന്ത്യന്‍ വരവ് സംബന്ധിച്ചു അമേരിക്കന്‍ നിര്‍മ്മാതാക്കള്‍ ഔദ്യോഗിക വിവരങ്ങള്‍ ലഭ്യമാക്കിയിട്ടില്ല. എന്നാല്‍ ഇന്ത്യയില്‍ പരീക്ഷണയോട്ടം നടത്തുന്ന ഇക്കോസ്‌പോര്‍ട് സിഗ്നേച്ചര്‍ പതിപ്പിനെ ക്യാമറ അടുത്തിടെ പകര്‍ത്തിയിരുന്നു.

ഒരുപക്ഷെ ഇക്കോസ്‌പോര്‍ട് സിഗ്നേച്ചര്‍ എഡിഷന്‍ വിപണിയില്‍ ഉടന്‍ തന്നെ എത്തും.