മാരുതി ഡിസൈറിന് അപായമണി മുഴക്കി പുത്തന്‍ അമേസ്; ഇത്തവണ ഹോണ്ടയാണ് താരം!

മാരുതി ഡിസൈര്‍, ഹ്യുണ്ടായി എക്‌സെന്റ്, ടാറ്റ ടിഗോര്‍ മോഡലുകള്‍ക്ക് മുന്നില്‍ പിടിച്ചു നില്‍ക്കാന്‍ പുതിയ അമേസിന് സാധിക്കുമെന്ന കാര്യം ഉറപ്പ്. സിറ്റി സെഡാനില്‍ നിന്നുമുള്ള ഡിസൈന്‍ പാഠങ്ങള്‍ ഉള്‍ക്കൊണ്ടാണ് ഇത്തവണ അമേസിന്റെ വരവ്.

മുന്നില്‍ മൂര്‍ച്ചയേറിയ ഹെഡ്‌ലാമ്പുകള്‍, ഹോണ്ട ബാഡ്ജ് നേടിയ ക്രോം ഗ്രില്‍, ഒഴുക്കമാര്‍ന്ന ആകാരം - ശ്രദ്ധ പിടിച്ചുപറ്റുന്നതില്‍ അമേസ് ഇത്തവണ ഏറെ മുന്നിലാണ്.

ഹെഡ്‌ലൈറ്റുകളില്‍ നിന്നും ടെയില്‍ ലൈറ്റുകല്‍ നീളുന്ന ക്യാരക്ടര്‍ ലൈനാണ് മോഡലിന്റെ മറ്റൊരു വിശേഷം. മുന്‍ മോഡലില്‍ നിന്നും വ്യത്യസ്മായി 15 ഇഞ്ച് വീലുകളിലാണ് പുതിയ അമേസിന്റെ ഒരുക്കം. ബൂട്ട് ലിഡില്‍ നിന്നും മുന്നിലേക്ക് ഉയര്‍ന്നു നില്‍ക്കുന്ന ചെറിയ സ്‌പോയിലറും അമേസിന്റെ ഡിസൈന്‍ വിശേഷങ്ങളില്‍ ഉള്‍പ്പെടും.

വിശാലമായ അകത്തളമാണ് പുതിയ അമേസില്‍ ഹോണ്ട ഒരുക്കിയിരിക്കുന്നത്. നിലവിലുള്ള 1.2 ലിറ്റര്‍ പെട്രോള്‍, 1.5 ലിറ്റര്‍ ഡീസല്‍ എഞ്ചിന്‍ പതിപ്പുകളില്‍ തന്നെയാണ് പുതിയ ഹോണ്ട അമേസിന്റെ വരവും. അതേസമയം പുതിയ പവര്‍ട്രെയിനുകള്‍ മികവാര്‍ന്ന ഇന്ധനക്ഷമത കാഴ്ചവെക്കുമെന്നാണ് ഹോണ്ടയുടെ വാദം.

87 bhp കരുത്തും 109 Nm torque ഉം ഉത്പാദിപ്പിക്കുന്നതാണ് 1.2 ലിറ്റര്‍ പെട്രോള്‍ എഞ്ചിന്‍. പുതിയ അമേസിന്റെ ഡിസല്‍ പതിപ്പില്‍ കരുത്ത് ഉത്പാദനം ഒരല്‍പം വര്‍ധിക്കുമെന്നാണ് സൂചന. നിലവില്‍ 98 bhp കരുത്തും 200 Nm torque മാണ് അമേസ് ഡീസല്‍ പതിപ്പില്‍ പരമാവധി ലഭ്യമാകുന്നത്. ഇരു എഞ്ചിന്‍ പതിപ്പുകളിലും 5 സ്പീഡ് ഗിയര്‍ബോക്‌സാണ് ലഭ്യമാവുക.