മഹീന്ദ്രയുടെ വില്‍പ്പനയില്‍ താങ്ങായി ഥാര്‍; 2021 ഏപ്രില്‍ മാസത്തെ വില്‍പ്പന കണക്കുകള്‍

2021 മാര്‍ച്ചിനെ അപേക്ഷിച്ച് 2021 ഏപ്രിലില്‍ മോഡല്‍ വോളിയം 78 ശതമാനമായി ഉയര്‍ന്നുവെന്നും കണക്കുകള്‍ വ്യക്തമാക്കുന്നു. പുതിയ മഹീന്ദ്ര ഥാര്‍ വെറും 6 മാസത്തിനുള്ളില്‍ 50,000-ല്‍ അധികം ബുക്കിംഗുകള്‍ മറികടന്നു.

എന്നിരുന്നാലും, മഹീന്ദ്രയുടെ ഏറ്റവും കൂടുതല്‍ വിറ്റഴിക്കപ്പെടുന്ന മോഡലായ ബൊലേറോ 2021 മാര്‍ച്ചിനെ അപേക്ഷിച്ച് 2021 ഏപ്രിലില്‍ 31 ശതമാനം ഇടിവ് രേഖപ്പെടുത്തി. XUV300, 4,144 യൂണിറ്റുകള്‍ വിറ്റു. നിലവില്‍ ഏറ്റവും കൂടുതല്‍ വിറ്റഴിക്കപ്പെട്ട രണ്ടാമത്തെ മോഡലാണ് ഇത്.

മഹീന്ദ്ര സ്‌കോര്‍പിയോയുടെ വില്‍പ്പന 53 ശതമാനം വര്‍ധിപ്പിച്ചു. അതേസമയം സ്‌കോര്‍പിയോയുടെ ഫെയ്‌സ്‌ലിഫ്റ്റ് പതിപ്പിനെ അവതരിപ്പിക്കാനൊരുങ്ങുകയാണ് കമ്പനി. KUV100 വില്‍പ്പനയില്‍ പിന്നോട്ടുപോയെന്ന് കമ്പനി അറിയിച്ചു.

മറാസോ, ആള്‍ട്യൂറാസ് G4 എന്നിവ യഥാക്രമം 37 ശതമാനവും 51 ശതമാനവും വില്‍പ്പന കുറഞ്ഞു. 2021 മാര്‍ച്ചിനെ അപേക്ഷിച്ച് 2021 ഏപ്രിലില്‍ മഹീന്ദ്രയുടെ വില്‍പ്പന അളവ് 9 ശതമാനം മാത്രമാണ് വര്‍ദ്ധിച്ചത്. സ്‌കോര്‍പിയോ, XUV300, ഥാര്‍ എന്നിവയുടെ വില്‍പ്പനയില്‍ മാത്രമാണ് മികച്ച വര്‍ധനവുണ്ടായത്.

ഥാറിനെക്കുറിച്ച് പറഞ്ഞാല്‍, വിപണിയില്‍ എത്തിയ നാള്‍ മുതല്‍ മികച്ച സ്വീകാര്യതയാണ് വാഹനത്തിന് ലഭിക്കുന്നത്. പെട്രോള്‍, ഡീസല്‍ എഞ്ചിനുകളാണ് എസ്‌യുവിക്ക് കരുത്ത് നല്‍കുന്നത്. 2.0 ലിറ്റര്‍ T-GDi എംസ്റ്റാലിയന്‍ പെട്രോള്‍ എഞ്ചിന്‍, 2.2 ലിറ്റര്‍ എംഹോക്ക് ഡീസല്‍ യൂണിറ്റ് എന്നിവ ഇതില്‍ ഉള്‍പ്പെടുന്നു.

പെട്രോള്‍ യൂണിറ്റ് 150 bhp കരുത്തും 320 Nm torque ഉം ഉത്പാദിപ്പിക്കുമ്പോള്‍ ഡീസല്‍ എഞ്ചിന്‍ 130 bhp കരുത്തും 300 Nm torque ഉം ആണ് പുറപ്പെടുവിക്കുന്നത്. ആറ് സ്പീഡ് മാനുവല്‍ അല്ലെങ്കില്‍ ആറ് സ്പീഡ് ടോര്‍ക്ക്-കണ്‍വെര്‍ട്ടര്‍ ഓട്ടോമാറ്റിക് ട്രാന്‍സ്മിഷനുമായി എഞ്ചിനുകള്‍ ജോടിയാക്കുന്നു.

എല്ലാ വേരിയന്റുകളിലും സ്റ്റാന്‍ഡേര്‍ഡായി മെക്കാനിക്കല്‍ ലോക്കിംഗ് ഡിഫറന്‍ഷ്യലുകളുള്ള ഷിഫ്റ്റ്-ഓണ്‍-ഫ്‌ലൈ ഫോര്‍-വീല്‍ ഡ്രൈവ് സിസ്റ്റങ്ങള്‍ സജ്ജീകരിച്ചിരിക്കുന്നു.

കൂടാതെ മഹീന്ദ്രയുടെ മറ്റ് വാര്‍ത്തകള്‍ പരിശോധിച്ചാല്‍ XUV700 എന്ന പുതിയ എസ്‌യുവി ഇന്ത്യന്‍ വിപണിയിലെത്തിക്കാന്‍ കമ്പനി ഒരുങ്ങുകയാണ്. XUV700 ഈ വര്‍ഷം ഒക്ടോബറില്‍ എപ്പോഴെങ്കിലും വിപണിയിലെത്തുമെന്ന് പ്രതീക്ഷിക്കുന്നു.

സമാരംഭിച്ചുകഴിഞ്ഞാല്‍, XUV700 നിലവിലുള്ള XUV500-ന് മുകളില്‍ സ്ഥാപിക്കും. XUV700-ലെ എഞ്ചിന്‍ ഓപ്ഷനുകള്‍ 2.2 ലിറ്റര്‍ എംഹോക്ക് ഡീസലിന്റെയും മഹീന്ദ്ര ഥാറില്‍ കാണുന്ന 2.0 ലിറ്റര്‍ T-GDi ടര്‍ബോ-പെട്രോള്‍ എഞ്ചിനുകളുടെയും ശക്തമായ പതിപ്പായിരിക്കുമെന്ന് പ്രതീക്ഷിക്കുന്നു.