വില്‍പ്പനയില്‍ പുതിയ തന്ത്രവുമായി റെനോ; കൈഗറിന് പുത്തന്‍ വേരിയന്റ് ഒരുങ്ങുന്നു

നിലവില്‍, ചില പ്രധാന ട്രിമ്മുകള്‍ക്കായി കാത്തിരിപ്പ് കാലാവധി ഏകദേശം 6 ആഴ്ചയോളമാണെന്ന് നേരത്തെ റിപ്പോര്‍ട്ടുകള്‍ പുറത്ത് വന്നിരുന്നു. ഇത് വാഹനത്തിന്റെ വില്‍പ്പനയെ ബാധിക്കുന്നുവെന്നാണ് കമ്പനിയുടെ കണക്കുകൂട്ടാല്‍.

വില്‍പ്പന വര്‍ധിപ്പിക്കുന്നതിനും കാത്തിരിപ്പ് കാലയളവ് കുറയ്ക്കാന്നതിനും ഫ്രഞ്ച് നിര്‍മാതാക്കള്‍ ഇപ്പോള്‍ കൈഗറിന്റെ പുതിയ വകഭേദം പുറത്തിറക്കാന്‍ തയ്യാറെടുക്കുന്നുവെന്നാണ് സൂചന. ഇത് ഉപഭോക്താവിന്റെ വാങ്ങല്‍ ഓപ്ഷനുകള്‍ കൂടുതല്‍ വര്‍ധിപ്പിക്കുമെന്നും റെനോ കണക്കുകൂട്ടുന്നു.

പുതിയ വകഭേദം കിഗര്‍ RXT ഓപ്ഷനായിട്ടാകും കമ്പനി അവതരിപ്പിക്കുക. RXZ ട്രിമിന്റെ പ്രധാന സവിശേഷതകള്‍ ഈ പതിപ്പില്‍ ഉള്‍പ്പെടുത്തുകയും ചെയ്യും, എന്നാല്‍ കൂടുതല്‍ ആകര്‍ഷകമായ വിലയില്‍ ലഭ്യമാകുമെന്നാണ് പുറത്തുവന്നിരിക്കുന്ന റിപ്പോര്‍ട്ട്.

കൈഗറിന്റെ നിരയില്‍, ഇത് RXT ട്രിമിന് മുകളിലായിരിക്കും ഇത് സ്ഥാനം പിടിക്കുക. കൂടാതെ 35,000 രൂപ അധികമായി (എക്‌സ്‌ഷോറൂം) ചെലവാകുമെന്നും റിപ്പോര്‍ട്ടില്‍ പറയുന്നു. RXT ട്രിമിന്റെ ഓണ്‍-റോഡ് വിലയേക്കാള്‍ വേരിയന്റിന്റെ റോഡ് വില ഏകദേശം 40,000 രൂപ കൂടുതലായിരിക്കും.

1.0 ലിറ്റര്‍ നാച്ചുറലി ആസ്പിറേറ്റഡ് കൈഗര്‍ RXT ട്രിമിന് നിലവില്‍ 7.02 ലക്ഷം രൂപയാണ് വില. RXT ഓപ്ഷന്‍ വേരിയന്റിന് 7.37 ലക്ഷം രൂപയോളം വില പ്രതീക്ഷിക്കാം. RXT (O)-യുടെ ബുക്കിംഗ് ഓഗസ്റ്റ് 6 മുതല്‍ ആരംഭിക്കുമെന്നും കമ്പനി അറിയിച്ചു.

ഈ പുതിയ ട്രിം 1.0 ലിറ്റര്‍ നാച്ചുറലി ആസ്പിറേറ്റഡ് പെട്രോള്‍ എഞ്ചിന്‍ ഓപ്ഷനില്‍ മാത്രമേ ലഭ്യമാകൂ. ടര്‍ബോ ചാര്‍ജ്ഡ് എഞ്ചിന്‍ വേരിയന്റുകള്‍ക്ക് RXT (O) അവതരിപ്പിക്കില്ലെന്ന് കമ്പനി അറിയിച്ചു.

ഡയമണ്ട് കട്ട് അലോയ് വീലുകള്‍, PM 2.5 ഫില്‍റ്റര്‍, ട്രൈ-ഒക്ട എല്‍ഇഡി ഹെഡ്‌ലാമ്പുകള്‍, വയര്‍ലെസ് സ്മാര്‍ട്ട്ഫോണ്‍ റെപ്ലിക്കേഷന്‍ സിസ്റ്റം എന്നിവയാണ് RXT (O) ട്രിമിന്റെ പ്രധാന സവിശേഷതകളില്‍ ചിലത്.

ഈ ട്രിം കൂട്ടിച്ചേര്‍ക്കുന്നത് ഉപഭോക്താക്കള്‍ക്ക് കൂടുതല്‍ ഓപ്ഷനുകള്‍ നല്‍കാനും താല്‍പ്പര്യമുള്ള ഉപഭോക്താക്കളെ നിലനിര്‍ത്താന്‍ റെനോയെ സഹായിക്കുമെന്നും റിപ്പോര്‍ട്ടില്‍ പറയുന്നു.

നിലവില്‍, കൈഗറിന്റെ പ്രാരംഭ പതിപ്പിന് 5.64 ലക്ഷം രൂപയാണ് എക്‌സ്‌ഷോറൂം വില. കൂടാതെ ടോപ്പ്-സ്‌പെക്ക് ട്രിമിനായി 10.09 ലക്ഷം രൂപ വരെ ഉപഭോക്താക്കള്‍ എക്‌സ്‌ഷോറൂം വിലയായി നല്‍കണം.

മൊത്തം ഓഫറില്‍ നിലവില്‍ 24 വ്യത്യസ്ത കോമ്പിനേഷനുകളും 14 മാനുവല്‍ ട്രാന്‍സ്മിഷനും 10 ഓട്ടോമാറ്റിക് ട്രാന്‍സ്മിഷന്‍ ഓപ്ഷനുകളും ഉള്ളതിനാല്‍ റെനോ ഒരു വലിയ അളവിലുള്ള വേരിയന്റുകള്‍ വാഹനത്തില്‍ വാഗ്ദാനം ചെയ്യുന്നു.

കൈഗറിന്റെ എന്‍ട്രി-ലെവല്‍ ട്രിമിനെ RXE എന്ന് വിളിക്കുന്നു, അതേസമയം ലൈന്‍ ട്രിമിന്റെ മുകളില്‍ RXZ ടര്‍ബോ CVT ഡ്യുവല്‍ ടോണ്‍ ആണ്. സമാരംഭിച്ചതിനുശേഷം, റെനോ ഉപഭോക്താക്കള്‍ക്ക് തെരഞ്ഞെടുക്കാന്‍ മൊത്തം 4 വ്യത്യസ്ത പവര്‍ട്രെയിന്‍ ഓപ്ഷനുകളും നല്‍കിയിട്ടുണ്ട്.

വാഗ്ദാനം ചെയ്യുന്നത് 1 പെട്രോള്‍ എഞ്ചിന്‍ മാത്രമാണെങ്കിലും, ഇത് നാച്ചുറലി ആസ്പിറേറ്റഡ്, ടര്‍ബോ ചാര്‍ജ്ഡ് പതിപ്പുകളില്‍ ലഭ്യമാണ്. നാച്ചുറലി ആസ്പിറേറ്റഡ് യൂണിറ്റ് 72 bhp കരുത്തും 96 Nm torque ഉം ഉത്പാദിപ്പിക്കുന്നു.

അതേസമയം ടര്‍ബോ-ചാര്‍ജ്ഡ് വേരിയന്റ് 100 bhp കരുത്തും 160 Nm torque ഉം പുറപ്പെടുവിക്കുന്നു. രണ്ട് വേരിയന്റുകളിലും 5 സ്പീഡ് മാനുവല്‍ സ്റ്റാന്‍ഡേര്‍ഡായി വാഗ്ദാനം ചെയ്യുന്നു.

മാത്രമല്ല നാച്ചുറലി ആസ്പിറേറ്റഡ് എഞ്ചിന് AMT ഓപ്ഷന്‍ കൂടി ലഭിക്കുമ്പോള്‍, ടര്‍ബോ മോട്ടോറിന് CVT ഗിയര്‍ബോക്‌സും ലഭിക്കുന്നു. നിസാന്‍ മാഗ്‌നൈറ്റ്, മാരുതി സുസുക്കി വിറ്റാര ബ്രെസ, ടൊയോട്ട അര്‍ബന്‍ ക്രൂയിസര്‍, കിയ സോണറ്റ്, ഹ്യുണ്ടായി വെന്യൂ, ടാറ്റ നെക്‌സോണ്‍, ഫോര്‍ഡ് ഇക്കോസ്‌പോര്‍ട്ട്, മഹീന്ദ്ര XUV300 എന്നിവയ്‌ക്കെതിരെയാണ് മത്സരിക്കുന്നത്.

ബ്രാന്‍ഡില്‍ നിന്നുള്ള മറ്റ് വാര്‍ത്തകളില്‍, രാജ്യാന്തര വിപണിയിലേക്ക് കൈഗറിന്റെ കയറ്റുമതി റെനോ ആരംഭിച്ചിരുന്നു. നേപ്പാളിലേക്ക് റെനോ ഇന്ത്യ നിര്‍മ്മിച്ച കൈഗറിന്റെ വിതരണം ആരംഭിച്ചു, അടുത്തിടെ ദക്ഷിണാഫ്രിക്കയിലേക്ക് 760 യൂണിറ്റുകള്‍ അയക്കുകയും ചെയ്തിരുന്നു.

പിന്നീട്, ആഫ്രിക്കയിലെയും SAARC മേഖലയിലെയും കൂടുതല്‍ രാജ്യങ്ങളിലേക്ക് കയറ്റുമതി വ്യാപിപ്പിക്കാന്‍ പദ്ധതിയിടുന്നുവെന്നും കമ്പനി അറിയിച്ചിട്ടുണ്ട്.

കൈഗര്‍ അവതരിപ്പിച്ചതോടെ, ഇന്ത്യന്‍ വാഹന വിപണിയിലെ ഏറ്റവും വലുതും അതിവേഗം വളരുന്നതുമായ വിഭാഗത്തില്‍ റെനോ മുന്നേറിയെന്നായിരുന്നു റെനോ ഇന്ത്യ സിഇഒയും മാനേജിംഗ് ഡയറക്ടറുമായ വെങ്കട്ട്‌റാം മാമില്ലപ്പള്ളി അഭിപ്രായപ്പെട്ടത്. ബ്രാന്‍ഡ് നിരയിലെ ട്രൈബര്‍ എംപിവിക്ക് അടിവരയിടുന്ന CMF-A+ പ്ലാറ്റ്‌ഫോമില്‍ തന്നെയാണ് കൈഗറും ഒരുങ്ങുന്നത്.