ബിഎസ് VI കോഡിയാക് ഫെയ്‌സ്‌ലിഫ്റ്റിന്റെ അരങ്ങേറ്റം ഉടൻ; കൂടുതൽ വിവരങ്ങളുമായി സ്‌കോഡ

ഇപ്പോഴിതാ വാഹനത്തിന്റെ അരങ്ങേറ്റം സംബന്ധിച്ച കൂടുതൽ സൂചനകളാണ് പുറത്തുവരുന്നത്. ഉത്സവ സീസണിൽ ഇത് വിപണിയിലെത്തുമെന്നാണ് പുതിയ റിപ്പോർട്ട്. ബിഎസ് VI നിലവാരത്തിലുള്ള TSI പെട്രോൾ എഞ്ചിൻ ഉൾക്കൊള്ളുന്ന അപ്ഡേറ്റ് ചെയ്ത കോഡിയാക് 2021 കലണ്ടർ വർഷത്തിന്റെ നാലാം പാദത്തിൽ (Q4) വിപണിയിലെത്തുമെന്ന് കമ്പനിയുമായി അടുത്ത വൃത്തങ്ങൾ അറിയിച്ചിട്ടുണ്ട്.

ഇത് 2021 ഒക്ടോബർ അല്ലെങ്കിൽ നവംബർ മാസങ്ങളിലാകുമെന്നും റിപ്പോർട്ടിൽ വ്യക്തമാക്കുന്നു. 2021 ഏപ്രിലിൽ ആഗോളതലത്തിൽ വെളിപ്പെടുത്തിയ എസ്‌യുവിയുടെ ഫെയ്‌സ്‌ലിഫ്റ്റ് പതിപ്പായിരിക്കും ഇന്ത്യയിലേക്ക് വരുന്നത്.

2021 സ്‌കോഡ കോഡിയാക് ഇന്ത്യൻ വിപണിയിൽ ഒരു കംപ്ലീറ്റ് ബിൽറ്റ് യൂണിറ്റായി (CBU) വരും. 2.0 ലിറ്റർ ഫോർ സിലിണ്ടർ TSI എഞ്ചിനോടൊപ്പമുള്ള ടിഗുവാൻ ഓൾസ്പെയ്സുമായി എസ്‌യുവി പവർട്രെയിൻ പങ്കിടാൻ സാധ്യതയുണ്ട്.

ഇത് സ്‌കോഡ ഇന്ത്യയുടെ നിരയിൽ സൂപ്പർബ്, ഒക്ടാവിയ സെഡാനുകളെ ശക്തിപ്പെടുത്തുകയും ചെയ്യുന്നു. ഈ യൂണിറ്റ് 187 bhp കരുത്തും 320 Nm torque ഉം സൃഷ്ടിക്കുന്നു. കൂടാതെ 7 സ്പീഡ് DSG ഓട്ടോമാറ്റിക് ട്രാൻസ്മിഷനുമായി സ്റ്റാൻഡേർഡായി ജോടിയാക്കും.

കാഴ്ചയിൽ, കോഡിയാക് ഫെയ്‌സ്‌ലിഫ്റ്റിൽ അപ്ഡേറ്റുചെയ്ത മുൻവശം കാണാൻ സാധിക്കും. അതിൽ ക്രോം ഇൻസേർട്ടുകളുള്ള പുതിയ മൾട്ടി-സ്ലാറ്റ് ബട്ടർഫ്‌ലൈ ഗ്രിൽ, ഒരു ജോഡി നേർത്ത എൽഇഡി ഹെഡ്‌ലാമ്പുകൾ, ഒരു പുതിയ എൽഇഡി ഡിആർഎൽ എന്നിവ ഉൾപ്പെടുന്നു.

പുതിയ ഫോഗ് ലാമ്പുകളും പുതിയ എൻഡ്-ടു-എൻഡ് മെഷ് ഗ്രില്ലുമായി വരുന്ന പുതിയ ബമ്പറും കോഡിയാക്കിന് ലഭിക്കുന്നു. ആഗോളതലത്തിൽ, എസ്‌യുയിൽ 17 മുതൽ 20 ഇഞ്ച് വരെയുള്ള വിശാലമായ അലോയ് വീലുകളുണ്ട്, എന്നാൽ ഇന്ത്യയ്ക്ക് ഒരു ടോപ്പ്-സ്പെക്ക് വേരിയന്റ് മാത്രമേ ലഭിക്കൂ എന്നതിനാൽ 20 ഇഞ്ച് വലിയ ചക്രങ്ങൾ ഇതിൽ ഉൾപ്പെടും.

പുതിയ റൂഫിൽ ഘടിപ്പിച്ച സ്പോയിലർ, ശിൽപിത ടെയിൽഗേറ്റ്, ഷാർപ്പായിട്ടുള്ള റാപ്‌റൗണ്ട് എൽഇഡി ടെയിൽലാമ്പുകൾ, മസ്‌കുലർ റിയർ ബമ്പർ എന്നിവ ഉപയോഗിച്ച് പിൻഭാഗവും അപ്ഡേറ്റുചെയ്തു.

കോഡിയാക് ഫെയ്‌സ്‌ലിഫ്റ്റിന്റെ ക്യാബിനും കമ്പനി അപ്ഡേറ്റു ചെയ്തു. മൊത്തത്തിലുള്ള ലേഔട്ടും രൂപകൽപ്പനയും സമാനമായി കാണപ്പെടുമ്പോൾ ഒക്ടാവിയ, പുതിയ കുഷാഖ് എന്നിവയിൽ ഇതിനകം കണ്ട രണ്ട്-സ്പോക്ക്, ലെതർ പൊതിഞ്ഞ സ്റ്റിയറിംഗ് പോലുള്ള പുതിയ ഘടകങ്ങൾ എസ്‌യുവിക്ക് ലഭിക്കുന്നു.

എസ്‌യുവിയിൽ 9.2 ഇഞ്ച് ഇൻഫോടെയ്ൻമെന്റ് സിസ്റ്റവും 10.25 ഇഞ്ച് ഇൻസ്ട്രുമെന്റ് ക്ലസ്റ്ററും പുതിയ മസാജ് സീറ്റുകളും ഓപ്ഷണലായി ലഭിക്കും. റീസൈക്കിൾ ചെയ്ത വസ്തുക്കൾ ഉപയോഗിച്ചാണ് ഇക്കോ സീറ്റുകൾക്കുള്ള ഓപ്ഷനും സ്‌കോഡ വാഗ്ദാനം ചെയ്യുന്നു. എന്നിരുന്നാലും, ഇന്ത്യൻ വിപണിയിലേക്കുള്ള മോഡലിന് ഇത് ലഭിക്കുമോ ഇല്ലയോ എന്ന് കമ്പനി വെളിപ്പെടുത്തിയിട്ടില്ല.