Compass വിപണിയില്‍ എത്തിയിട്ട് അഞ്ച് വര്‍ഷം; പ്രത്യേക പതിപ്പ് അവതരിപ്പിക്കാനൊരുങ്ങി Jeep

പോയ വര്‍ഷത്തിന്റെ തുടക്കത്തിലാണ് കമ്പനി കോമ്പസിന്റെ ഫെയ്‌സ്‌ലിഫ്റ്റ് പതിപ്പിനെ അവതരിപ്പിക്കുന്നത്. കോമ്പസ് വിപണിയില്‍ എത്തിയിട്ട് ഇപ്പോള്‍ അഞ്ച് വര്‍ഷം പൂര്‍ത്തിയാക്കിയിരിക്കുകയാണ്. ഇതിന്റെ ഭാഗമായി കോമ്പസിന് അഞ്ചാം വാര്‍ഷിക പതിപ്പ് അവതരിപ്പിക്കാന്‍ ഒരുങ്ങുകയാണ് നിര്‍മാതാക്കള്‍.

അമേരിക്കന്‍ കാര്‍ നിര്‍മാതാവിന്റെ ഇന്ത്യയിലെ ആദ്യത്തെ മാസ്-മാര്‍ക്കറ്റ് ഓഫറായിരുന്നു ജീപ്പ് കോമ്പസ്. 2017 ഓഗസ്റ്റില്‍ ഇത് ആദ്യമായി നിരത്തിലെത്തി. അതിനുശേഷം, ബ്രാന്‍ഡിന്റെ വില്‍പ്പനയില്‍ ആധിപത്യം പുലര്‍ത്തുന്ന ജീപ്പിന്റെ ബ്രെഡ് ആന്‍ഡ് ബട്ടര്‍ മോഡലാണ് കോമ്പസ്.

കഴിഞ്ഞ വര്‍ഷം മിഡ്-ലൈഫ് അപ്ഡേറ്റ് നല്‍കുന്നതിന് മുമ്പ്, മോഡല്‍ പുതുമ നിലനിര്‍ത്താനുള്ള ശ്രമത്തില്‍ കോമ്പസിന്റെ നിരവധി ലിമിറ്റഡ് എഡിഷനുകളും കമ്പനി ഇന്ത്യയില്‍ അവതരിപ്പിച്ചിരുന്നു.

ഈ വര്‍ഷം ആദ്യമാണ്, ജീപ്പ് ഇന്ത്യയില്‍ കോമ്പസ് ഫെയ്‌സ്‌ലിഫ്റ്റിന്റെ നൈറ്റ് ഈഗിള്‍ എഡിഷന്‍ അവതരിപ്പിക്കുന്നത്. ഇത് നിലവില്‍ ഇന്ത്യയില്‍ വില്‍പ്പനയ്ക്കെത്തുന്ന കോമ്പസിന്റെ പൂര്‍ണ്ണമായും ബ്ലാക്ക് തീം ട്രിം ആയിരുന്നു, കൂടാതെ പുറത്തും അകത്തും തികച്ചും ഗ്ലോസ് ബ്ലാക്ക് ട്രീറ്റ്മെന്റ് ലഭിക്കുന്നു.

തുടക്കത്തില്‍, ഇതിന് സമാനമായ ഫിനിഷ് ചെയ്ത ഗ്രില്‍ റിംഗുകള്‍, 18 ഇഞ്ച് ബ്ലാക്ക് അലോയ് വീലുകള്‍, ബ്ലാക്ക് റൂഫ് റെയിലുകള്‍, ഗ്ലോസ് ബ്ലാക്ക് വിംഗ് മിററുകള്‍, ഫോഗ് ലാമ്പ് ബെസലുകള്‍ എന്നിവയ്ക്കൊപ്പം ഗ്ലോസ് ബ്ലാക്ക് ഗ്രില്ലും ലഭിച്ചു.

പുതിയ ജീപ്പ് കോമ്പസ് അഞ്ചാം വാര്‍ഷിക പതിപ്പിന് അകത്തും പുറത്തും സമാനമായ ട്രീറ്റ്‌മെന്റ് ലഭിക്കുമെന്നാണ് പ്രതീക്ഷിക്കുന്നത്. അതേസമയം യാന്ത്രികമായി കാര്‍ മാറ്റമില്ലാതെ തുടരുമെന്നും റിപ്പോര്‍ട്ടുകള്‍ പറയുന്നു. പെട്രോള്‍, ഡീസല്‍ എഞ്ചിന്‍ ഓപ്ഷനുകള്‍ക്കൊപ്പം ഇത് വാഗ്ദാനം ചെയ്യും.

ആറ് സ്പീഡ് മാനുവല്‍ ട്രാന്‍സ്മിഷനോ ഒമ്പത് സ്പീഡ് ഓട്ടോമാറ്റിക് ഗിയര്‍ബോക്‌സോ ഉള്ള 2.0 ലിറ്റര്‍, നാല് സിലിണ്ടര്‍ മള്‍ട്ടിജെറ്റ് ടര്‍ബോ യൂണിറ്റാണ് ഡീസല്‍, ഏഴ് സ്പീഡ് ഓട്ടോമാറ്റിക് ട്രാന്‍സ്മിഷനോട് കൂടിയ 1.4 ലിറ്റര്‍ മള്‍ട്ടി എയര്‍ ടര്‍ബോ പെട്രോള്‍ യൂണിറ്റാണ് പെട്രോള്‍.

1.4 ലിറ്റര്‍ മള്‍ട്ടി എയര്‍ ടര്‍ബോ പെട്രോള്‍ യൂണിറ്റ് 163 bhp കരുത്തും 250 Nm torque ഉം ആയിരുന്നു ഉത്പാദിപ്പിക്കുന്നത്. അതേസമയം 2.0 ലിറ്റര്‍, നാല് സിലിണ്ടര്‍ മള്‍ട്ടിജെറ്റ് ടര്‍ബോ ഡീസല്‍ യൂണിറ്റ് 173 bhp കരുത്തും 350 Nm പീക്ക് ടോര്‍ക്കും സൃഷ്ടിച്ചിരുന്നു.

ഫ്രണ്ട്-വീല്‍-ഡ്രൈവ് സിസ്റ്റം എല്ലാ ട്രിമുകളിലും സ്റ്റാന്‍ഡേര്‍ഡ് ആയി വരും. ജീപ്പ് ലിമിറ്റഡ്, മോഡല്‍ S, 80-ാം വാര്‍ഷിക പതിപ്പ് 4x4 ഡ്രൈവ് എന്നിവ വാഗ്ദാനം ചെയ്യുന്നു. ഇത് ബ്രാന്‍ഡിന്റെ ആക്ടീവ് ഡ്രൈവിന്റെയും സെലക്ട് ടെറൈന്‍ 4x4 സിസ്റ്റത്തിന്റെയും രൂപത്തിലായിരിക്കും. 4x4 സിസ്റ്റം മുകളില്‍ സൂചിപ്പിച്ച മൂന്ന് ട്രിമ്മുകളുടെ ഡീസല്‍-പവര്‍ വേരിയന്റുകളുമായി സംയോജിപ്പിക്കും.

കഴിഞ്ഞ വര്‍ഷത്തിന്റെ തുടക്കത്തിലാണ് അടിമുടി മാറ്റങ്ങളുമായി കോമ്പസ് എത്തുന്നത്. അതുകൊണ്ട് തന്നെ അഞ്ചാം വാര്‍ഷിക പതിപ്പിന്റെ ഡിസൈനിലോ, ഫീച്ചറുകളിലോ കാര്യമായ മാറ്റങ്ങള്‍ ഉണ്ടായിരിക്കില്ല. പകരം കോസ്‌മെറ്റിക് മാറ്റങ്ങള്‍ മാത്രമാകും കമ്പനി ഉള്‍പ്പെടുത്തുകയെന്ന് വേണം പ്രതീക്ഷിക്കാന്‍.

എക്സ്റ്റീരിയറില്‍ തുടങ്ങിയാല്‍, പുതിയ കോമ്പസ് എസ്‌യുവിയുടെ സിഗ്‌നേച്ചര്‍ സെവന്‍ സ്ലാറ്റ് വെര്‍ട്ടിക്കല്‍ ഗ്രില്‍ പുതിയ ഫ്രണ്ട് എന്‍ഡ് ഫീച്ചര്‍ ചെയ്യുന്നുവെന്ന് വേണം പറയാന്‍.

ഇന്റഗ്രേറ്റഡ് എല്‍ഇഡി ഡിആര്‍എല്ലുകളോട് കൂടിയ മിനുസമാര്‍ന്ന എല്‍ഇഡി ഹെഡ്‌ലാമ്പുകള്‍, സെന്‍ട്രല്‍ എയര്‍ ഇന്‍ടേക്കിന് അരികിലുള്ള മുന്‍ ബമ്പറില്‍ എല്‍ഇഡി ഫോഗ് ലാമ്പുകള്‍, പുതുതായി ഡിസൈന്‍ ചെയ്ത ഡ്യുവല്‍-ടോണ്‍ 18 ഇഞ്ച് അലോയ് വീലുകള്‍, പനോരമിക് സണ്‍റൂഫ്, എല്‍ഇഡി ടെയില്‍ലൈറ്റുകള്‍ തുടങ്ങി നിരവധി പുതുമകള്‍ കാണാന്‍ സാധിക്കും.

ഇനി ഇന്റീരിയറിലേക്ക് വന്നാല്‍, പുതിയ ജീപ്പ് കോമ്പസ് നിരവധി നവീകരണങ്ങളും അധിക ഫീച്ചറുകളും ഉള്‍ക്കൊള്ളുന്നു.

എല്ലായിടത്തും സോഫ്റ്റ്-ടച്ച് മെറ്റീരിയലുകളുള്ള ചെറുതായി പരിഷ്‌കരിച്ച ഡാഷ്ബോര്‍ഡ് ലേഔട്ട്, മൗണ്ടഡ് കണ്‍ട്രോളുകളുള്ള പുതിയ സ്റ്റിയറിംഗ് വീല്‍ ഡിസൈന്‍, 10.25 ഇഞ്ച് ഡിജിറ്റല്‍ ഇന്‍സ്ട്രുമെന്റ് ക്ലസ്റ്റര്‍, ആന്‍ഡ്രോയിഡ് ഓട്ടോയും ആപ്പിള്‍ കാര്‍പ്ലേയുള്ള 10.1 ഇഞ്ച് ടച്ച്സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റം, ബ്രാന്‍ഡിന്റെ ഏറ്റവും പുതിയ 'UConnect5' സാങ്കേതികവിദ്യയും ഇതില്‍ ഉള്‍പ്പെടുന്നു.

വയര്‍ലെസ് ചാര്‍ജിംഗ്, വെന്റിലേറ്റഡ് സീറ്റുകള്‍, ഡ്രൈവര്‍ സൈഡ് ഇലക്ട്രോണിക് അഡ്ജസ്റ്റ് ചെയ്യാവുന്ന സീറ്റുകള്‍, 60:40 പിന്‍ സീറ്റ് സ്പ്ലിറ്റ്, റിമോട്ട് കീലെസ് എന്‍ട്രി തുടങ്ങി നിരവധി സൗകര്യങ്ങളും എസ്‌യുവിയില്‍ ഉണ്ട്. ജീപ്പ് കോമ്പസ് സുരക്ഷയും ഓഫ്-റോഡ് നിര്‍ദ്ദിഷ്ട സവിശേഷതകളും കൊണ്ട് നിറഞ്ഞിരിക്കുന്നുവെന്നത് എടുത്ത് പറയേണ്ട കാര്യമാണ്.

നിലവിലെ കോമ്പസ് എസ്‌യുവി ഏഴ് കളര്‍ ഓപ്ഷനുകളോടെയാണ് വാഗ്ദാനം ചെയ്യുന്നത്. വിപണിയില്‍ പ്രധാനമായും എംജി ഹെക്ടര്‍, കിയ സെല്‍റ്റോസ്, ഹ്യുണ്ടായി ക്രെറ്റ, സിട്രണ്‍ C5 എയര്‍ക്രോസ് എന്നിവയ്ക്ക് എതിരെയാണ് ഇത് മത്സരിക്കുന്നത്.