കണക്റ്റിവിറ്റിയിലും ഇനി ഒന്നാമൻ; ഗൂഗിൾ അസിസ്റ്റന്റ് ഫീച്ചർ ഹോണ്ട സിറ്റിയിലും

ഒരു പ്രമുഖ ഗവേഷണ കമ്പനി നടത്തിയ പഠനമനുസരിച്ച് 80 ശതമാനം ഇന്ത്യക്കാരും കണക്റ്റിവിറ്റി സവിശേഷതകൾ ദീർഘകാലത്തേക്ക് തങ്ങൾക്ക് ഗുണം ചെയ്യുമെന്നാണ് അഭിപ്രായപ്പെട്ടിരിക്കുന്നത്. ഇന്ത്യയിൽ 2019 മെയ് മാസത്തിൽ സമാരംഭിച്ച ഹ്യുണ്ടായി വെന്യുവാണ് രാജ്യത്ത് സമഗ്രമായ കണക്റ്റിവിറ്റി സവിശേഷതകൾ ആദ്യമായി അവതരിപ്പിച്ചത്.

മറ്റ് നിരവധി കാർ നിർമ്മാതാക്കളും സമീപകാലത്ത് കണക്റ്റിവിറ്റി സവിശേഷതകൾ അവതരിപ്പിക്കുന്നതിൽ മുൻപന്തിയിലേക്ക് എത്തുകയും ചെയ്‌തു. ദേ ഈ നിരയിലേക്ക് ഇപ്പോൾ നമ്മുടെ ഹോണ്ടയും കടന്നുവന്നിരിക്കുകയാണ്

ഗൂഗിൾ പ്ലേ, ആപ്പ് സ്റ്റോർ എന്നിവയിൽ ലഭ്യമായ ഹോണ്ട കണക്റ്റ് അപ്ലിക്കേഷൻ വഴിയാണ് 36 കണക്റ്റഡ് സവിശേഷതകൾ കമ്പനി അവതരിപ്പിച്ചത്. ദേ ഇപ്പോൾ നെക്സ്റ്റ് ജനറേഷൻ ഹോണ്ട കണക്റ്റിന്റെ മെച്ചപ്പെടുത്തിയ പതിപ്പും ഹോണ്ട കാർസ് ഇന്ത്യ പ്രഖ്യാപിച്ചു.

അഞ്ചാംതലമുറ ഹോണ്ട സിറ്റിയിൽ വാഗ്ദാനം ചെയ്യുന്ന ഇന്റഗ്രേറ്റഡ് കണക്റ്റഡ് ടെക്നോളജിയുടെ വിപുലീകരണമാണ് ഈ സവിശേഷത. ഇതിനകം അലക്സാ റിമോട്ട് ശേഷിയും വാഹനത്തിന്റെ പ്രത്യേകതയായിരുന്നു.

ഗൂഗിൾ ഹോണ്ട ആക്ഷൻ അവതരിപ്പിച്ചതോടെ പുതിയ ഹോണ്ട സിറ്റി ഇപ്പോൾ ഓകെ ഗൂഗിൾ കമാന്റോടെ പ്രവർത്തിക്കും. പുതിയ നാല് പ്രവർത്തനങ്ങളോടെ ഹോണ്ട കണക്‌ട് പ്ലാറ്റ്‌ഫോമും കമ്പനി സമ്പുഷ്‌ടമാക്കിയിട്ടുണ്ട്.

മെച്ചപ്പെട്ട സുരക്ഷ, സൗകര്യത്തോടൊപ്പം 36 സവിശേഷതകളും ഉപഭോക്താക്കൾക്കായി ഹോണ്ട വാഗ്‌ദാനം ചെയ്യുന്നു. ഗൂഗിൾ നെസ്റ്റ് സ്പീക്കറുകൾ, ആൻഡ്രോയിഡ് ഫോണുകൾ പോലുള്ള ഗൂഗിൾ അസിസ്റ്റന്റ് പ്രാപ്തമാക്കിയ ഉപകരണങ്ങൾ വഴി നടപ്പിലാക്കാൻ കഴിയുന്ന 10 വോയ്‌സ് പ്രാപ്‌തമാക്കിയ സവിശേഷതകൾ ഗൂഗിളിലെ ഹോണ്ട ആക്ഷൻ വാഗ്ദാനം ചെയ്യും.

ഈ പ്രവർത്തനത്തെ iOS ഉപകരണങ്ങളും പിന്തുണയ്‌ക്കും. ഗൂഗിളിന്റെ ടെക്സ്റ്റ് അധിഷ്ഠിത കമാൻഡ് പ്രവർത്തനത്തിലും ഈ 10 സവിശേഷതകൾ ഉപയോഗിക്കാൻ കഴിയുമെന്നതും ശ്രദ്ധേയമാണ്.

ഹോണ്ട കണക്റ്റ് ഉപയോഗിച്ച് ഉപയോക്താക്കൾക്ക് എസി ഓണാക്കുക / ഓഫ് ചെയ്യുക, താപനില ക്രമീകരിക്കുക, ഡോർ ലോക്ക് / അൺലോക്ക് ചെയ്യുക, റിമോട്ട് ബൂട്ട് ഓപ്പണിംഗ് തുടങ്ങിയ വിവിധ റിമോട്ട് പ്രവർത്തനങ്ങൾ ആക്സസ് ചെയ്യാൻ കഴിയും.

ഉപഭോക്താക്കൾക്ക് ഓഡോമീറ്റർ റീഡിംഗ്, പാർക്കിംഗ് ബ്രേക്ക് സ്റ്റാറ്റസ്, സീറ്റ് ബെൽറ്റ് സ്റ്റാറ്റസ്, എഞ്ചിൻ നില, ഫ്യുവൽ നില, ബാറ്ററി ഹെൽത്ത് മുതലായവയും പരിശോധിക്കാം. മറ്റ് സവിശേഷതകൾ കുടുംബാംഗങ്ങളുമായും സുഹൃത്തുക്കളുമായും കാർ ലൊക്കേഷൻ ഷെയറിംഗ്, യാത്രയുടെ അവിസ്മരണീയ നിമിഷങ്ങൾ പകർത്താൻ ട്രിപ്പ് ഡയറി എന്നിവ സോഷ്യൽ മീഡിയയിൽ പങ്കിടാം.