മധ്യപ്രദേശുകാരൻ വെറും 10 രൂപ വിലയുള്ള ഇന്ധനത്തിൽ കാറോടിക്കുന്നു!

By Santheep

Published: Monday, October 12, 2015, 10:50 [IST]

പെട്രോളിനും ഡീസലിനുമെല്ലാം ദിനംപ്രതിയെന്നോണം വില കയറിക്കൊണ്ടിരിക്കുകയാണ് കഴിഞ്ഞ കുറച്ചുമാസങ്ങളായി. ഇത് ഇതര സാധ്യതകളെ തേടാനുള്ള മനുഷ്യന്റെ ചോദനയെ ഉണർത്തിയതിൽ അത്ഭുതപ്പെടാനൊന്നുമില്ല. ആവശ്യമാണല്ലോ കണ്ടുപിടിത്തത്തിന്റെ തന്ത! മധ്യപ്രദേശുകാരനായ ഒരു മെക്കാനിക്ക് നടത്തിയ കണ്ടുപിടിത്തം ലോകത്തെ ഞെട്ടിച്ചിരിക്കുകയാണ്.

ലിറ്ററിന് വെറും 10 രൂപ മാത്രം ചെലവു വരുന്ന ഇന്ധനമാണ് ഈ മെക്കാനിക്ക് തന്റെ കാറിൽ ഉപയോഗിക്കുന്നത്. ഈ ഇന്ധനത്തെ അടുത്തറിയാം താഴെ.

10 രൂപ വിലയുള്ള ഇന്ധനത്തിൽ കാറോടിക്കുന്നു!

റഈസ് മർകാനി എന്ന മെക്കാനിക്കാണ് വാഹനമോടിക്കുന്നതിന് ഒരു ബദൽ ഇന്ധനസാധ്യതയുമായി വന്നിരിക്കുന്നത്.

തികച്ചും പരിസ്ഥിതി സൗഹൃദം പുലർത്തുന്നതാണ് ഈ ഇന്ധനം എന്ന പ്രത്യേകത കൂടിയുണ്ട്. പരിസ്ഥിതിസൗഹാർദ്ദം പുലർത്തുന്ന ഇന്ധനസാധ്യതകളെ ലോകം തിരഞ്ഞു നടക്കുന്നതിനിടയിലാണ് റഈസിന്റെ ഈ കണ്ടുപിടിത്തം പുറത്തുവരുന്നത് എന്നതും ശ്രദ്ധിക്കണം.

അസെറ്റലിൻ ഗാസ് എന്ന ഇന്ധനമാണ് റഈസ് ഉപയോഗിക്കുന്നത്. ഈ ഇന്ധനത്തിലോടുന്ന ഒരു കാർ റഈസ് വികസിപ്പിച്ചെടുത്തിട്ടുമുണ്ട്. ലിറ്ററിന് പത്ത് രൂപ മുതൽ ഇരുപത് രൂപ വരെ വിലയേയുള്ളൂ ഈ ഇന്ധനത്തിന്.

വ്യാവസായികാവശ്യങ്ങൾക്കായി വ്യാപകമായി ഉപയോഗിക്കപ്പെടുന്നുണ്ട് അസെറ്റലിൻ ഗാസ്. റഈസിന്റെ സാങ്കേതികത ഈ ഗാസ് നിർമിക്കുന്നത് കാൽസ്യം കാർബൈഡിന്റെയും വെള്ളത്തിന്റെയും പ്രതിപ്രവർത്തനത്തിലൂടെയാണ്.

ഈ കണ്ടുപിടിത്തത്തിന്റെ പേറ്റന്റിനായി അപേക്ഷ നൽകിയിട്ടുണ്ട് റഈസ്. ഇതിന്റെ നടപടിക്രമങ്ങൾ പൂർത്തിയായി വരികയാണ്.

ഇതിനിടെ ഒരു ചൈനീസ് കമ്പനി റഈസിനെ സമീപിച്ചിരുന്നു. വ്യാവസായികാടിസ്ഥാനത്തിൽ ഈ സാങ്കേതികത ഉപയോഗിക്കാമെന്ന നിർദ്ദേശം അവർ വെച്ചു. പക്ഷെ, റഈസ് ഇതിന് വഴങ്ങുകയുണ്ടായില്ല.

രാജ്യത്തു തന്നെ ഇത്തരമൊരു പ്ലാന്റ് സ്ഥാപിക്കാൻ കഴിയുമോ എന്നാണ് റഈസ് ആലോചിക്കുന്നത്.

തന്റെ നാടായ സദാർ ബജാർ സാഗറിൽ തന്നെ പ്ലാന്റ് സ്ഥാപിക്കണം. നാട്ടുകാർക്ക് തൊഴിൽ നൽകാൻ സാധിക്കണം.

റഈസ് മർക്കാനി ഈ കണ്ടുപിടിത്തം നടത്തിയിട്ട് ഏറെ നാളായി. പുതിയ സാങ്കേതികതയിലോടുന്ന റഈസിന്റെ കാറിനെ ആളുകൾ കളിയാക്കുകയായിരുന്നു. ഇപ്പോൾ രാജ്യാന്തര അംഗീകാരങ്ങൾ ഉദ്ദേഹത്തെ തേടിയെത്തുമ്പോൾ നാട്ടുകാർ അന്തംവിടുകയാണ്.